Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NOVEMBER 2015

 NHLOKOMHAKA YA XIFUNENGETO | XANA XIKWEMBU XI RI YINI HI TINYIMPI?

Ndlela Leyi Xikwembu Xi Langutaka Tinyimpi Ha Yona Namuntlha

Ndlela Leyi Xikwembu Xi Langutaka Tinyimpi Ha Yona Namuntlha

Namuntlha vanhu va tshikileriwa. Vo tala va rila hi ku phikelela eka Xikwembu va lava mpfuno naswona va tivutisa loko mpfuno wolowo va ta wu kuma. Xana Xikwembu xa swi twa swirilo swa vona swo lava mpfuno? Xana ku vuriwa yini hi lava lwaka nyimpi hi xikongomelo xo lwisana ni lava va va tshikilelaka? Xana Xikwembu xa ma seketela matshalatshala ya vona, xi languta nyimpi ya vona tanihi leyi amukelekaka?

Armagedoni i nyimpi yo herisa tinyimpi hinkwato

Xo sungula, onge marito lawa ma nga ku chavelela: Xikwembu xa ku vona ku xaniseka loku nga kona emisaveni namuntlha naswona xi ti yimisele ku endla swo karhi hi kona. (Pisalema 72:13, 14) Eka Rito ra xona ku nga Bibele, xi tshembisa leswaku ‘lava weriwaka hi nhlomulo, xi ta va hakela hi ku va wisisa.’ Rini? “Eku hlavuteriweni ka Hosi Yesu a huma etilweni swin’we ni tintsumi takwe ta matimba . . . a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.” (2 Vatesalonika 1:7, 8) Ku hlavuteriwa loku ka Yesu ku ta endleka enkarhini lowu taka, lowu Bibele yi wu vitanaka “nyimpi ya siku lerikulu ra Xikwembu xa Matimba Hinkwawo” leyi nakambe yi vuriwaka Armagedoni.—Nhlavutelo 16:14, 16.

Eka nyimpi yoleyo Xikwembu a xi nge tirhisi vanhu kambe xi ta tirhisa N’wana wa xona, Yesu Kreste, swin’we ni tintsumi ta xona ta matimba ku herisa lavo biha. Nyimpi ya Xikwembu yi ta herisa ku xaniseka hinkwako.—Esaya 11:4; Nhlavutelo 19:11-16.

Ndlela leyi Xikwembu xi langutaka nyimpi ha yona a yi se cinca. Xa ha languta nyimpi tanihi leyi fanelekaka ku va xi yi tirhisa ku herisa ntshikilelo ni vubihi. Hilaha matimu ma kombisaka hakona, Xikwembu hi xona ntsena lexi vulaka leswaku nyimpi yi ta lwiwa rini naswona hi vamani. Hilaha hi swi xiyeke hakona, Xikwembu se xi vurile leswaku nyimpi leyi nga ta herisa  vubihi ni ku va xi rihiselela lava tshikileriwaka, i nyimpi ya le nkarhini lowu taka naswona yi ta lwiwa hi N’wana xona Yesu Kreste. Leswi vulaka leswaku tinyimpi leti lwiwaka namuntlha, Xikwembu a xi ti seketeli ku nga khathariseki xivangelo xa kona.

Hi xikombiso: Anakanya hi vamakwavo vambirhi lava sungulaka ku lwa loko tata wa vona a ha fambile. Va tshika ku lwa swa xinkarhana ivi va fonela tata wa vona. Un’wana u vula leswaku makwavo wakwe hi yena loyi a nga sungula a n’wi ba, kasi loyi un’wana u vula leswaku makwavo wakwe a nga n’wi khomanga kahle. Ha vumbirhi bya vona, va byela tata wa vona mhaka leyi va ri ni ntshembo wa leswaku u ta va seketela. Hambiswiritano, endzhaku ka loko va n’wi byerile, tata wa vona u va byela leswaku va nga lwi, wa vuya leswaku a ta tlhantlha xiphiqo xa vona. Kutani va n’wi rindza swa nkarhinyana. Kambe hi ku hatlisa va tlhela va sungula ku lwa. Loko tata wa vona a vuya, wa va ba hileswi va nga n’wi yingisangisiki.

Namuntlha, loko matiko ma ya enyimpini ma tala ku kombela Xikwembu leswaku xi ma seketela. Kambe a xi ti seketeli tinyimpi ta namuntlha. Ematshan’wini ya sweswo, eBibeleni xi ri: “Mi nga tlheriseli swo biha hi swo biha hambi eka mani” naswona, “Mi nga tirihiseli.” (Varhoma 12:17, 19) Nakambe xi vule leswaku vanhu va fanele ‘va xi rindza hi ku lehisa mbilu’ leswaku xi teka goza, ku nga leswi xi nga ta swi endla eArmagedoni. (Pisalema 37:7) Kambe loko matiko ma tsandzeka ku rindza Xikwembu leswaku xi teka goza hi nkarhi wa xona ivi wona ma nghenela tinyimpi, sweswo swa xi hlundzukisa. Xisweswo, Xikwembu xi ta kombisa ku hlundzuka ka xona eArmagedoni ni ku herisa ku lwa emisaveni hinkwayo hi ku “herisa tinyimpi ku ya fika emakumu ya misava.” (Pisalema 46:9; Esaya 34:2) Hakunene, Armagedoni ku ta va nyimpi yo herisa tinyimpi hinkwato.

Ku herisiwa ka tinyimpi i yin’wana ya mikateko leyi nga ta tisiwa hi Mfumo wa Xikwembu. Yesu u vulavule hi mfumo wolowo eka xikhongelo xa yena lexi dumeke: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Mfumo wa Xikwembu a wu nge herisi tinyimpi ntsena, wu ta tlhela wu herisa vuhomboloki, ku nga byona byi vangaka tinyimpi. * (Pisalema 37:9, 10, 14, 15) A swi hlamarisi leswi valandzeri va Yesu va yi languteleke hi mahlongati mikateko leyi nga ta tisiwa hi Mfumo wa Xikwembu.—2 Petro 3:13.

Xana hi fanele hi rindza nkarhi wo tanihi kwihi leswaku Mfumo wa Xikwembu wu herisa ku xaniseka, ntshikilelo ni vuhomboloki? Ku hetiseka ka vuprofeta bya Bibele swi kombisa leswaku hi hanya “emasikwini yo hetelela” ya mafambiselo lawa ya swilo. (2 Timotiya 3:1-5) * Ku nga ri khale, Mfumo wa Xikwembu wu ta herisa mafambiselo lawa ya swilo hi nyimpi ya Armagedoni.

Hilaha hi swi xiyeke hakona eku sunguleni, lava nga ta lovisiwa eka nyimpi leyi yo hetelela, hi lava va nga “ma yingisiki mahungu lamanene malunghana ni Hosi ya hina Yesu.” (2 Vatesalonika 1:8) Kambe, tsundzuka leswaku Xikwembu a xi ku tsakeli ku fa ka munhu un’wana ni un’wana, hambi ku ri lowo homboloka. (Ezekiyele 33:11) Leswi ‘xi nga naveliki leswaku ku lova ni un’we’ eka nyimpi leyi yo hetelela, xi endla leswaku mahungu lamanene malunghana ni Hosi ya hina Yesu ma “chumayeriwa emisaveni hinkwayo leyi akiweke leswaku byi va vumbhoni ematikweni hinkwawo” makumu ma nga si fika. (2 Petro 3:8, 9; Matewu 24:14; 1 Timotiya 2:3, 4) Ntirho wo chumayela wa Timbhoni ta Yehovha lowu endliwaka emisaveni hinkwayo, wu nyika vanhu nkarhi wa leswaku va dyondza hi Xikwembu ni ku yingisa mahungu lamanene malunghana na Yesu leswaku va ta pona eka nyimpi yo hetelela.

^ ndzim. 9 Mfumo wa Xikwembu wu ta tlhela wu herisa nala wa vanhu, ku nga rifu. Hilaha swi hlamuseriweke hakona eka nhlokomhaka leyi nge “Tinhlamulo Ta Swivutiso Swa Bibele” xa nkandziyiso lowu, Xikwembu xi ta pfuxa vanhu va tsandza va hlayi, ku katsa ni vo tala lava dlayiweke etinyimpini.

^ ndzim. 10 Leswaku u kuma rungula leri engetelekeke hi masiku ya makumu, hlaya ndzima 9 ya buku leyi nge, Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Sathana Hi Yena A Vangaka Nyimpi Ni Ku Xaniseka

Xana Bibele yi yi hlamusela njhani nyimpi ya le tilweni ni nyimpi ya misava ni maxangu ya laha misaveni?

Ha Yini Timbhoni Ta Yehovha Ti Nga Yi eNyimpini?

Emisaveni hinkwayo Timbhoni ta Yehovha ti tiviwa hi ku nga yi enyimpini. Dyondza hi leswaku ha yini hi nga yi.