Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NOVEMBER 2015

 NHLOKOMHAKA YA XIFUNENGETO

Xana Xikwembu Xi Ri Yini Hi Nyimpi?

Xana Xikwembu Xi Ri Yini Hi Nyimpi?

U nga xi hlamula njhani xivutiso lexi? Vanhu vo tala va ehleketa leswaku Xikwembu xa ti seketela tinyimpi. Va vula leswaku xi pfumelele malandza ya xona ya khale leswaku ma lwa tinyimpi; hilaha swi tsariweke hakona eBibeleni. Hambiswiritano, van’wana va swi tiva leswaku Yesu, N’wana wa Xikwembu u dyondzise valandzeri vakwe leswaku va rhandza valala va vona. (Matewu 5:43, 44) Hikwalaho va vula leswaku vonelo ra Xikwembu hi tinyimpi ri cincile naswona namuntlha xa ti venga.

U ehleketa yini? Xana Xikwembu xa ti seketela tinyimpi? Loko swi ri tano, i vamani lava xi va seketelaka namuntlha? Ku kuma tinhlamulo ta swivutiso leswi swi ta khumba ndlela leyi u tekaka tinyimpi ha yona. Hi xikombiso, loko a wu tiva leswaku Xikwembu xi seketela ntlawa wa masocha lowu u wu rhandzaka, a wu ta tsaka naswona a wu ta tiyiseka leswaku ntlawa wolowo wu ta hlula. Kambe, xana a wu ta endla yini loko u tiva leswaku Xikwembu xi seketela ntlawa lowun’wana? I ntiyiso leswaku a wu nga ha ta wu seketela ntlawa lowu u wu rhandzaka.

Ku ni nchumu wa nkoka swinene lowu u faneleke u wu kambisisa. Ku tiva ndlela leyi Xikwembu xi ti langutaka ha yona tinyimpi, swi nga khumba ndlela leyi u xi tekaka ha yona. Loko u ri un’wana wa vanhu va timiliyoni lava xanisiweke hi tinyimpi, a swi kanakanisi leswaku u lava ku tiva nhlamulo ya xivutiso lexi: Xana Xikwembu xi seketela ku xaniseka loku vanhu va langutanaka na kona hikwalaho ka tinyimpi, kumbe a xi khathali hi lava xanisiwaka, hilaha van’wana va vulaka ha kona?

Swi nga ha ku hlamarisa ku tiva leswaku nhlamulo ya Bibele yi hambanile ni mavonelo lama nga laha henhla. Ku tlula kwalaho, ndlela leyi Xikwembu xi ti langutaka ha yona tinyimpi a yi cincanga. A hi kambisiseni leswi Bibele yi swi vulaka hi ndlela leyi Xikwembu a a xi ti teka ha yona tinyimpi eminkarhini ya khale ni hi nkarhi lowu Yesu a ri laha misaveni. Sweswo swi ta hi pfuna ku twisisa ndlela leyi Xikwembu xi ti langutaka ha yona tinyimpi namuntlha ni ku tiva loko ti ta va kona enkarhini lowu taka.