Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  October 2015

 NHLOKOMHAKA YA XIFUNENGETO | XANA SWA PFUNA KU KHONGELA?

Ha Yini Xikwembu Xi Hi Rhamba Leswaku Hi Khongela Eka Xona?

Ha Yini Xikwembu Xi Hi Rhamba Leswaku Hi Khongela Eka Xona?

Xikwembu xi lava hi va ni vuxaka na xona.

Vanghana va tshama va ri karhi va vulavurisana leswaku va tiyisa vunghana bya vona. Hilaha ku fanaka, Xikwembu xa hi rhamba leswaku hi vulavula na xona hikuva sweswo swi ta endla hi va vanghana va xona. Xi ri: “Mi ta ndzi vitana, mi ta, mi tlhela mi ndzi khongela, kutani ndzi ta mi yingisa.” (Yeremiya 29:12) Loko u ri karhi u vulavula ni Xikwembu, u ta ‘tshinela eka xona, kutani xi ta tshinela eka wena.’ (Yakobo 4:8) Bibele yi ri: “Yehovha u le kusuhi ni hinkwavo lava n’wi vitanaka.” (Pisalema 145:18) Loko hi ya emahlweni hi khongela eka Xikwembu, vuxaka bya hina na xona byi ta tiya.

“Yehovha u le kusuhi ni hinkwavo lava n’wi vitanaka.”—Pisalema 145:18

Xikwembu xi lava ku ku pfuna.

Yesu u te: “Xana u kona munhu exikarhi ka n’wina loyi loko n’wana wakwe a kombela xinkwa—a nga n’wi nyikaka ribye? Kumbe, xana loko a kombela nhlampfi—a nge n’wi nyiki nyoka, a hi swona ke? Hikokwalaho, loko n’wina . . . mi tiva ku nyika vana va n’wina tinyiko letinene, hakunene Tata wa n’wina la nge matilweni u ta va nyika ku tlurisa lava kombelaka eka yena!” (Matewu 7:9-11) Xikwembu xa ku rhamba leswaku u khongela eka xona hikuva “xa ku khathalela” naswona xi lava ku ku pfuna. (1 Petro 5:7) Xi tlhela xi ku rhamba leswaku u xi byela swiphiqo swa wena. Bibele yi ri: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina.”—Vafilipiya 4:6.

Vanhu va navela ku va ni vuxaka ni Xikwembu.

Vativi va mahanyelo ya vanhu va xiye leswaku vanhu vo tala va navela ku khongela, hambi ku ri lava nga pfumeriki leswaku Xikwembu xi kona. * Sweswo swi kombisa leswaku vanhu va tumbuluxiwe va ri ni ku navela ko va ni vuxaka ni Xikwembu. Yesu u te: “Va tsaka lava khathalaka hi xilaveko xa vona xa moya.” (Matewu 5:3) Ndlela yin’wana yo enerisa ku navela koloko i ku vulavula ni Xikwembu nkarhi ni nkarhi.

Hi nga pfuneka njhani loko hi amukela xirhambo xa Xikwembu xa leswaku hi khongela eka xona?

^ ndzim. 8 Nkambisiso wa 2012 wa Pew Research Center wu kombise leswaku 11 wa tiphesente ta vanhu lava nga pfumeriki leswaku Xikwembu xi kona eUnited States va khongela kan’we hi n’hweti.