Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2015

Xana A Wu Swi Tiva?

Xana A Wu Swi Tiva?

Hi swihi swiphiqo leswi Heroda a veke na swona loko a pfuxeta tempele eYerusalema?

Loko Solomoni a aka tempele ro sungula, a a yi ake ehenhla ka xintshabyana naswona u ake marhangu hi le vuxeni ni le vupeladyambu leswaku yi ta tshama kahle yi sirheleleka. Heroda a a lava ku aka tempele yo saseka yi tlhela yi kula ku tlula ya Solomoni, kutani u sungule ku yi mpfampfarhuta hi vuntshwa ni ku yi kurisa.

Vatirhi va Heroda va kurise ndhawu leyi a yi ri en’walungwini leswaku tempele yi ta va ni rivala lerikulu. Rivala ri kurisiwe hi timitara ta 32 ku ya edzongeni. Leswaku sweswo swi koteka, ku akiwe marhangu lamakulu hi ku tirhisa maribye ku va ma kota ku sekela masungulo ya tempele. Eka tindhawu tin’wana marhangu lawa a ma lehe timitara ta 50.

Heroda u ringete ku fambisana ni mindhavuko ni swiyilayila swa Vayuda kumbe ku nga kavanyeti mintirho ya le tempeleni ni ku nyikeriwa ka switlhavelo. N’wamatimu wa Muyuda Josephus u vula leswaku Heroda u letele ni vaprista leswaku va kota ku vatla maribye ni ku va vavatli leswaku ku nga ngheni vatirhi lava nga fanelekiki endhawini leyi kwetsimaka.

Heroda u fe a nga wu hetanga ntirho lowu. Hi lembe ra 30.C.E., se a ku hundze malembe ya 46 tempele leyi yi ri eku akiweni. (Yohane 2:20) Ntirho wu hetiwe hi ntukulu xinguwe wa Heroda ku nga Agripa wa Vumbirhi, exikarhi ka malembe ya va 100 C.E.

Ha yini vanhu va le Malta a va anakanya leswaku muapostola Pawulo a a ri mudlayi?

Xikwembukati xa vululami (eximatseni) xi ri karhi xi ba xikwembukati xa ku kala vululami

Swi nga endleka leswaku vanhu va le Melita a va rhandza vukhongeri bya Magriki. Xiya leswi endlekeke loko xikepe lexi Pawulo a a famba ha xona xi tshovekile le Melita, hilaha swi tsariweke hakona eka buku ya Mintirho. Loko Pawulo a hlanganyeta ndzilo lowu a wu tshiveriwe ku kufumeta lava poneke exikepeni, ku hume mhiri etihunyini yi titsondzela evokweni rakwe. Loko vanhu va le Melita va vona sweswo va te: “Hakunene loyi i mudlayi, hambileswi a fikeke laha ku hlayisekeke a huma elwandle, vululami byo rihisela a byi n’wi pfumelelanga ku ya emahlweni a hanya.”—Mintirho 28:4.

Rito ra Xigriki leri vulaka “Vululami” hi leri nge “di’ke.” Rito leri ri vula vululami lebyi nga sekeriwangiki eka mhaka leyi tiyisekisiweke. Eka mintsheketo ya Magriki Dike a ku ri vito ra xikwembukati xa vululami. A ku ehleketiwa leswaku xi languta timhaka ta vanhu kutani loko ku nga ri na vululami xi byela Zewusi leswaku loyi a dyoheke a ta xupuriwa. Rungula rin’wana ri vula leswaku kumbexana vanhu va le Melita a va ehleketa leswaku, “hambileswi Pawulo a poneke elwandle, xikwembukati Dike . . . xi n’wi vonile kutani xi rhumela mhiri.” Vanhu lava va cince mavonelo ya vona loko va swi xiya leswaku mhiri a yi n’wi endlanga nchumu Pawulo.