Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  October 2015

 VUTLHARI BYA KHALE LEBYI PFUNAKA NINAMUNTLHA

Rivalela Hi Ku Ntshunxeka

Rivalela Hi Ku Ntshunxeka

NAWU WA BIBELE: “Hambetani mi . . . rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana. Tanihi leswi Yehovha a mi rivaleleke hi ku ntshunxeka, na n’wina endlani sweswo.”—Vakolosa 3:13.

Xana leswi swi vula yini? EBibeleni xidyoho xi fanisiwa ni nandzu naswona ku rivalela swi fambisana ni ku sula nandzu wolowo. (Luka 11:4) Xihlamusela marito xin’wana xi vula leswaku eMatsalweni, rito ra Xigriki leri hundzuluxeriweke ri va ku “rivalela” ri vula “ku sula nandzu hi ku helela u nga ha londzi.” Kutani loko hi rivalela loyi a hi dyoheleke, a hi rindzeli leswaku a hi endlela swo karhi. Ku va hi rivalela a swi vuli leswaku hi tsakela ku dyoheriwa kumbe a hi nge ku twi ku vava. Kambe hi va hi tshika xikhomela hambileswi ku nga ni ‘xivangelo xa ku vilela.’

Xana swi nga pfuna ninamuntlha? Hinkwerhu ha dyoha hikuva a hi hetisekanga. (Varhoma 3:23) Hambiswiritano, hi nga swi kota ku rivalela van’wana hikuva na hina hi ta va dyohela. Loko hi rivalela van’wana swi ta hi pfuna. Njhani?

Loko hi tshama hi hlundzukile hi va ni xikhomela hi nga va rivaleli van’wana, hi ta tivavisa. Ku titwa hi ndlela leyi swi ta hi hetela ntsako ni ku tshama hi ri ni gome. Swi ta tlhela swi hi vangela mavabyi. Xiviko xin’wana xa Journal of the American College of Cardiology, xa Dokodela Yoichi Chida na Andrew Steptoe loyi a nga Profesa wa Ntivomiehleketo, xi ri: “Vulavisisi lebya ha ku kumiwaka byi kombisa ku yelana loku nga kona exikarhi ka ku hlundzuka ni vuvabyi bya mbilu lebyi vuriwaka CHD [coronary heart disease].”

Lexi tsakisaka hileswaku ku rivalela swa hi pfuna. Loko hi rivalela van’wana hi ku ntshunxeka, hi ta va ni vun’we ni ku rhula ni ku hlayisa vuxaka lebyinene ni vanhu van’wana. Xa nkoka swinene, hi va hi tekelela Xikwembu lexi va rivalelaka hi ku ntshunxeka vadyohi lava hundzukaka naswona xi lava leswaku na hina hi endla tano.—Marka 11:25; Vaefesa 4:32; 5:1.

DYONDZA SWO TALA

XALAMUKA!

Ndlela Yo Rivalela

Ha yini swi nga ha tikaka swinene ku rivalela? Vona ndlela leyi ndzayo ya Bibele yi nga pfunaka ha yona.