Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  October 2015

 NHLOKOMHAKA YA XIFUNENGETO | XANA SWA PFUNA KU KHONGELA?

Ha Yini Vanhu Va Khongela?

Ha Yini Vanhu Va Khongela?

“A ndzi rhandza ku gembula. A ndzi khongelela leswaku ndzi wina. Kambe a swi va nga tano.”—Samuel, * wa le Kenya.

“Exikolweni a hi khongela ntsena xikhongelo xo nhlokohatiwa lexi a hi dyondzisiwe xona.”—Teresa, wa le Philippines.

“Ndzi khongela ntsena loko ndzi ri ndzi ni swiphiqo. Ndzi khongela leswaku ndzi kombela ku rivaleriwa swidyoho ni leswaku ndzi va Mukreste wo antswa.”—Magdalene, wa le Ghana.

Leswi Samuel, Teresa na Magdalene va swi vulaka swi kombisa leswaku vanhu va khongela hikwalaho ka swivangelo swo hambanahambana, swin’wana i swa nkoka ku tlula swa van’wana. Swikhongelo swa van’wana swi huma embilwini kasi swa van’wana a swi tano. Van’wana va khongelela ku pasa exikolweni, ku kongomisiwa hi Xikwembu evuton’wini bya vona, ku va xipano lexi va xi rhandzaka xi hlula kumbe swin’wana. Vanhu vo tala va swi xiya leswaku xikhongelo i xa nkoka. Vukambisisi byin’wana byi kombisa leswaku vanhu van’wana va khongela minkarhi hinkwayo hambileswi va nga ngheniki kereke.

Xana wa khongela? Loko swi ri tano, i yini leswi u swi khongelelaka? Ku nga khathariseki leswaku wa khongela kumbe a wu khongeli, u nga ha tivutisa: ‘Xana i swa nkoka ku khongela? Xana ku ni loyi a yingiselaka?’ Mutsari un’wana loko a vula ndlela leyi a tekaka xikhongelo ha yona u vule leswaku “ko va ndlela yo horisa mbilu . . . swi fana ni ku vulavula ni xifuwo xa wena xa nhlampfi.” Valawuri van’wana va swa vutshunguri na vona va titwa hi ndlela leyi fanaka, va vula leswaku xikhongelo xi fana ni “murhi.” Xana vanhu lava khongelaka va khongelela swa hava kumbe va lava ku tiphofula leswaku va horisa mbilu?

Kambe Bibele yi vula leswaku xikhongelo a ko va ntsena ndlela yo horisa mbilu. Yi hi byela leswaku ku ni munhu loyi a yingiselaka swikhongelo leswi swi endliwaka hi ndlela leyinene, ni leswi swi endliwaka hi swivangelo leswi twalaka. Xana i ntiyiso? A hi kambisise vumbhoni bya kona.

^ ndzim. 3 Mavito man’wana ma cinciwile.