Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA AUGUST 2015

 NHLOKOMHAKA YA XIFUNENGETOT | XANA LOKO MUNHU A FILE U YA EMAHLWENI A HANYA KUN’WANA?

Hi Wihi Ntshembo Lowu Hi Nga Na Wona Hi Lava Feke?

Hi Wihi Ntshembo Lowu Hi Nga Na Wona Hi Lava Feke?

Xana lava feke va ta pfuxiwa?

NHLAMULO YA BIBELE: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [Yesu] kutani va huma.”Yohane 5:28, 29.

Yesu u profete hi vumundzuku lebyi nga ta va ehansi ka ku fuma kakwe laha Masirha ma nga ta pfuriwa. Fernando loyi ku vulavuriweke ha yena eka xihloko xo sungula, u ri: “Ndzi hlamarile loko ndzi hlaya Yohane 5:28, 29. Tsalwa leri, ri ndzi endle leswaku ndzi va ni ntshembo ndzi tlhela ndzi byi langutela hi mahlongati vumundzuku lebyi.”

Eminkarhini ya khale, wanuna wo tshembeka Yobo a a swi tiva leswaku loko a fa Xikwembu xi ta n’wi pfuxa. Yobo u vutisile a ku: “Xana loko munhu la tiyeke emirini a fa a nga tlhela a hanya?” U hlamule hi ku tiyiseka a ku: “Ndzi ta rindza emasikwini hinkwawo ya ntirho wa mina wo sindzisiwa [nkarhi lowu a nga ta va a ri eSirheni], kukondza ku fika ntshunxeko wa mina. U ta vitana, mina ndzi ta ku hlamula.”—Yobo 14:14, 15.

Ku pfuxiwa ka Lazaro ku hi nyika ntshembo wa nkarhi lowu taka

Marta sesi wa Lazaro a a swi tiva leswaku ku ta va ni ku pfuxiwa ka vafi. Endzhaku ka ku fa ka Lazaro, Yesu u byele Marta a ku: “Makwenu u ta pfuka.” Marta a ku eka yena: “Ndza swi tiva leswaku u ta pfuka eku pfuxiweni ka lava feke hi siku ro hetelela.” Yesu a ku eka yena: “Hi mina ku pfuka ni vutomi. Loyi a kombisaka ripfumelo eka mina, hambiloko a fa, u ta hanya.” (Yohane 11:23-25) Kutani Yesu a hatlisa a pfuxa Lazaro. Rungula leri, leri tsakisaka i xikombiso xa swilo leswinene leswi nga ta endleka enkarhini lowu taka. Anakanya hi ku pfuxiwa koloko ku ri karhi ku endleka emisaveni hinkwayo.

Xana va kona lava nga ta pfuxeriwa ku ya hanya etilweni?

NHLAMULO YA BIBELE: Rito ra Xikwembu ri kombisa leswaku ku pfuxiwa ka Yesu ku hambanile ni ka lava nhungu, lava ku vulavuriwaka ha vona eBibeleni. Lava va nhungu va pfuxiwile va tlhela va hanya kwala misaveni. Kambe emhakeni ya ku pfuxiwa ka Yesu hi hlaya marito lama nge: “Yesu Kreste . . . u le vokweni ra xinene ra Xikwembu, hikuva u khome ndlela a ya etilweni.” (1 Petro 3:21, 22) Xana ku pfuxeriwa ku ya etilweni swi hetelele hi Yesu ntsena? Yesu a a ha ku byela vaapostola va yena a ku: “Loko ndzi ya mi lunghisela ndhawu, ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona.”—Yohane 14:3.

Kreste u ye etilweni kutani a lunghiselela ku fika ka vadyondzisiwa vakwe van’wana. Lava pfuxeriwaka ku ya etilweni va ta va 144 000. (Nhlavutelo  14:1, 3) Xana valandzeri volavo va Yesu va ya endla yini etilweni?

Va ta va va khomekile swinene. Matsalwa ma ri: “Va tsaka naswona va kwetsima hinkwavo lava nga ni xiphemu eku pfukeni ko sungula ka vafi; rifu ra vumbirhi a ri na matimba eka vona, kambe va ta va vaprista va Xikwembu ni va Kreste, naswona va ta va tihosi swin’we na yena ku ringana malembe wolawo ya 1000.” (Nhlavutelo 20:6) Lava va pfuxeriwaka ku ya etilweni va ta fuma na Kreste tanihi tihosi ni vaprista ehenhla ka misava.

I vamani lava nga ta pfuxiwa endzhaku ka lava nga ta pfuxeriwa ku ya hanya etilweni?

NHLAMULO YA BIBELE: EMatsalweni lama huhuteriweke ku ni marito ya muapostola Pawulo lama nge: “Ndzi ni ntshembo eka Xikwembu, ku nga ntshembo lowu vanhu lava na vona va nga na wona, leswaku ku ta va ni ku pfuxiwa ka lava lulameke ni ka lava nga lulamangiki.”Mintirho 24:15.

Rito ra Xikwembu ri hi tiyisekisa leswaku tibiliyoni ta vanhu lava feke ti ta pfuxiwa

I vamani lava nga ta katseka eka ntlawa lowu Pawulo a vuleke leswaku hi “lava lulameke”? Xiya xikombiso lexi. Loko Daniyele wanuna wo tshembeka a ri ekusuhi ni ku fa u byeriwe marito lama nge: “U ta wisa, kambe u ta yima u kuma xiavelo xa wena eku heleni ka masiku.” (Daniyele 12:13) Xana Daniyele u ta pfuxeriwa ku ya hanya kwihi? “Lavo lulama va ta dya ndzhaka ya misava, va ta tshama eka yona hi masiku.” (Pisalema 37:29) Nakambe Yesu u profete a ku: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5) Daniyele ni van’wana vo tshembeka va ta pfuxiwa leswaku va tlhela va hanya emisaveni hi laha ku nga heriki.

I vamani lava nga ta katseka eka ntlawa lowu Pawulo a vulaka leswaku hi “lava nga lulamangiki”? I tibiliyoni ta vanhu lava tshameke va hanya va tlhela va fa, lava nga wu kumangiki nkarhi wo dyondza ni ku hanya hi milawu ya Bibele. Endzhaku ka loko va pfuxiwile, va ta dyondza hi Yehovha * na Yesu. (Yohane 17:3) Hinkwavo lava hlawulaka ku tirhela Xikwembu va ta va ni ntshembo wo hanya hilaha ku nga heriki.

Hinkwavo lava hlawulaka ku tirhela Xikwembu va ta va ni ntshembo wo hanya hilaha ku nga heriki va ri ni rihanyo lerinene naswona va tsakile

Xana vutomi byi ta va njhani emisaveni?

NHLAMULO YA BIBELE: Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Nhlavutelo 21:4.) “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona.”—Esaya 65:21.

Tivone u ri karhi u hanya eka swiyimo swo tano ni varhandziwa va wena lava pfuxiweke. Kambe u nga ha tivutisa leswaku u nga tiyiseka njhani leswaku ku pfuxiwa ka vafi ku ta va kona?

^ ndzim. 15 Yehovha i vito ra Xikwembu hilaha swi hlamuseriwaka hakona eBibeleni.

DYONDZA SWO TALA

Hi Xihi Xikongomelo Xa Xikwembu Hi Misava?

Bibele yi hlamusela xivangelo xo va Xikwembu xi tumbuluxe misava, nkarhi lowu ku xaniseka ku nga ta hela ni leswi vumundzuku byi yi khomeleke swona misava ni lava tshamaka eka yona.