Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA JULY 2015

 NHLOKOMHAKA YA XIFUNENGETO | U NGA KU HLULA NJHANI KU VILELA?

Vanhu Va Vilela eMisaveni Hinkwayo!

Vanhu Va Vilela eMisaveni Hinkwayo!

“Ndzi ye exitolo ndzi ya xava swakudya kambe loko ndzi fika ndzi kume ku ri ni makokisi ntsena lawa a ma durha swinene. Hi siku leri landzeleke a ku nga ha ri na swakudya eswitolo.”—Paul wa le Zimbabwe.

“Nuna wa mina u ndzi byele leswaku wa hi siya. Ndzi tivutisile leswaku ndzi ta langutana njhani ni xiyimo lexi? Ku ta endleka yini hi vana va mina?”—Janet wa le United States.

“Loko ku rila tialamu, ndzi tsutsumile ndzi ya lava ndhawu yo tumbela kutani ndzi badama ehansi tirhokete ti ri karhi ti buluka. Hambileswi a ku hundze tiawara, a ndza ha chuhile.”—Alona wa le Israel.

Hi hanya ‘eminkarhini ya mangava leyi swi nonon’hwaka ku langutana na yona.’ (2 Timotiya 3:1) Vanhu vo tala va dya mbitsi hikwalaho ka swiphiqo swa timali, swa mindyangu, tinyimpi, mavabyi lama nga tshungulekiki, timhangu ta ntumbuluko ni leti vangiwaka hi vanhu. Munhu u tlhela a karhatiwa hi swiphiqo swa yena n’wini, a nga ha tivutisa a ku: ‘Xana tshumba leri nga emirini wa mina swi nga endleka ku ri khensa?’ ‘Xana misava yi ta va yi ri njhani loko vatukulu va mina va ri karhi va kula?’

A hi ku vilela hinkwako ku nga ni khombo. Hi ntumbuluko ha karhateka loko hi nga si ya eku kamberiweni ko karhi kumbe ku ya lava ntirho. Ku chava khombo swa hi pfuna leswaku hi nga vaviseki. Kambe ku vilela ngopfu kumbe ku tshamela ku vilela swa dlaya. Vulavisisi bya sweswinyana lebyi a byi katsa vanhu lava tlulaka 68 000, byi kombise leswaku hambi ku ri ku vilela kutsongo ku endla leswaku munhu a hatla a fa. Hi swona leswi endleke leswaku Yesu a vutisa a ku: “I mani eka n’wina loyi a nga engetelaka xisungunu xin’we eka mpimo wakwe wa vutomi hikwalaho ka ku vilela?” Hakunene ku vilela a ku byi engeteli vutomi bya munhu. Hikwalaho Yesu u te: “Tshikani ku vilela.” (Matewu 6:25, 27) Kambe sweswo hi nga swi kota njhani?

Sweswo hi nga swi kota hi ku tirhisa vutlhari lebyi nga eBibeleni, ku tiyisa ripfumelo ra hina eka Xikwembu ni ku va ni ntshembo lowu tiyeke hi vumundzuku. Hambiloko sweswi hi nga langutani ni swiyimo swo tika kambe enkarhini lowu taka hi nga ha langutana na swona. A hi voneni leswaku Paul, Janet na Alona va pfuneke njhani hi ku tirhisa swiringanyeto leswi nga laha henhla leswaku va langutana ni ku vilela.