Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA APRIL 2015

Xana A Wu Swi Tiva?

Xana A Wu Swi Tiva?

A ku ri wihi ntirho wa ndhuna ya vuthu ra Varhoma?

Xifaniso lexi kovotliweke xa ndhuna ya masocha, Marcus Favonius FacilI

Matsalwa ya Vukreste ya Xigriki ma vulavula ko hlayanyana hi tindhuna ta mavuthu ya Varhoma. Ndhuna ya vuthu leyi voneke Yesu loko a dlayiwa, a yi ri ni xikhundlha xolexo ku fana na Korneliyo munhu wo sungula wa matiko loyi a veke Mukreste. Mutirhelamfumo loyi a a langutela ku xupuriwa ka muapostola Pawulo, na Yuliyo loyi a fambeke na yena eRhoma, a va ri tindhuna ta mavuthu.—Marka 15:39; Mintirho 10:1.

Hi ntolovelo ndhuna ya vuthu a yi rhangela masocha lama fambaka hi milenge lawa nhlayo ya wona yi nga exikarhi ka 50 na 100. Mintirho yakwe a yi katsa ku letela, ku laya vavanuna vakwe, ku kambela swiambalo ni matlhari ya vona ni ku va rhangela loko va rhurhela endhawini yin’wana.

Xikhundlha xa ku va ndhuna ya vuthu a ku ri xona xa le henhla lexi socha leri tolovelekeke a ri ta kota ku xi fikelela. Lava a va nghena eka xikhundlha lexi, a ku ri masocha lama tirhaka hi matimba lawa a ma fanele ma va varhangeri lavanene. Leswaku vuthu ri lawuleka ni ku va ni vuswikoti byo endla ntirho kahle, a ri titshege hi vona. Xiviko xin’wana xi vula leswaku tindhuna ta mavuthu, “hakanyingi a ti ri masocha lama nga ni ntokoto ni vutivi byo hlawuleka swinene evuthwini.”

Xana swivoni swa le minkarhini ya Bibele a swi hambane njhani ni swa namuntlha?

Xivoni xa khale xa le Egipta

Ku hambana ni swivoni swa namuntlha leswi endliweke hi nghilazi, swivoni swa le minkarhini ya Bibele a swi tala ku endliwa hi ntsompfu lowu hatimisiweke swinene—hakanyingi a ku va koporo, kumbexana silivhere ni nsuku. Loko ku vulavuriwa hi swivoni ro sungula eBibeleni, hi loko ku akiwa tabernakela ku nga ndhawu yo sungula ya vugandzeri ya Vaisrayele. Vavasati va nyikele hi swivoni leswaku ku endliwa xihlambelo xa koporo ni xiangamo xa xona. Swi nga ha endleka leswaku swivoni a swi fanele swi n’okisiwa leswaku swi ta tirhiseriwa xikongomelo xolexo.

Swivoni leswi kumiweke hi vayimburi eIsrayele ni le kusuhi, a swi tala ku kumiwa ni swin’wetsin’wetsi ni swilo swin’wana leswi vavasati va tisasekisaka hi swona. Hi ntolovelo, swivoni swoleswo a swi va ni xivumbeko xa xirhendzevutana ni pulanga leri khavisiweke, ntsompfu kumbe xikhomo xa rimhondzo ra ndlopfu, leswi a swi tala ku va ni xivumbeko xo fana ni xa wansati. Xiphemu xa xivoni lexi a xi nga hatimisiwanga hakanyingi a xi nga khavisiwi.

Swivoni swa khale a swi nga voni kahle loko swi pimanisiwa ni swa namuntlha leswi endliweke hi nghilazi. Swi nga edleka leswaku muapostola Pawulo a a vulavula hi swona loko a ku: “Sweswi a hi voni kahle hi xivoni xa ntsopfu.”—1 Vakorinto 13:12.