Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  April 2015

 BIBELE YI HUNDZULA VUTOMI BYA VANHU

Swivutiso Swinharhu Leswi Cinceke Vutomi Bya Mina

Swivutiso Swinharhu Leswi Cinceke Vutomi Bya Mina
  • LEMBE RO VELEKIWA: 1949

  • TIKO LERI A HUMAKA EKA RONA: UNITED STATES

  • MATIMU YAKWE: U LAVISISE XIKONGOMELO XA VUTOMI

VUTOMI BYA MINA BYA KHALE:

Ndzi kulele eAncram, ku nga doroba leritsongo leri nga en’walungu wa New York le U.S.A. Edorobeni leri, a ku tele mapurasi lama endlaka swakudya leswi endliweke hi ntswamba. Entiyisweni doroba leri a ri tele tihomu ku tlula vanhu.

Ndyangu wa ka hina a wu nghena kereke leyi a yi ri yoxe edorobeni rolero. Sonto yin’wana ni yin’wana nimixo, kokwa wa xinuna a a ndzi polichela tintangu ivi ndzi ya ekerekeni ndzi khome Bibele leyitsongo yo basa leyi ndzi nyikiweke hi kokwa wa xisati. Mina ni vamakwavo va mina, a hi dyondzisiwe ku tirha hi matimba, ku xixima, ku pfuna vaakelani va hina ni ku khensa mikateko leyi hi nga na yona.

Loko ndzi kula, ndzi sukile ekaya ivi ndzi ya va mudyondzisi. A ndzi ri ni swivutiso swo tala hi Xikwembu ni hi vutomi. Swichudeni swin’wana swa mina, a swi ri ni vuswikoti byo karhi. Swin’wana a swi nga ri na byona kambe a swi tikarhata. Swin’wana a swi lamarile kasi swin’wana a swi hanye kahle. A ndzi vona onge leswi a swi kombisi vululami. Minkarhi yin’wana vatswari va vana lava a va nga ri na vuswikoti ku fana ni van’wana, a va rhandza ku vula leswaku “leyi i ndlela leyi Xikwembu xi lavaka n’wana wa mina a va ha yona.” A ndzi tivutisa leswaku, ha yini Xikwembu xi pfumelela leswaku vana van’wana va velekiwa va lamarile? Phela n’wana u va a nga ri na nandzu.

Nakambe a ndzi tivutisa leswaku, ‘ndzi fanele ndzi endla yini lexinene hi vutomi bya mina?’ A ndzi vona onge vutomi bya mina byi famba hi ku hatlisa. Ndzi kulele endyangwini lowunene, ndzi nghena swikolo swa xiyimo xa le henhla naswona a ndzi endla ntirho lowu a ndzi wu tsakela. Kambe a ndzi titwa ndzi nga enerisekanga. Lexi a ndzi ehleketa ha xona, a ku ri ku va siku rin’wana ndzi tekiwa, ndzi va ni kaya lerinene, ndzi va ni vana, ndzi ya emahlweni ndzi tirha ivi ndzi huma penceni naswona ndzi hetelela ndzi ya tshama ekaya ra vadyuhari. A ndzi tivutisa loko ku ri ni swin’wana swo tlula sweswo evuton’wini.

NDLELA LEYI BIBELE YI HUNDZULEKE VUTOMI BYA MINA HA YONA:

Hi ximumu xin’wana, ndzi valange eYuropa ni vadyondzisikulorhi van’wana. Hi ye eWestminster Abbey, eNotre-Dame de Paris, eVatican ni le tikerekeni tin’wana to tala letitsongo. Kun’wana ni kun’wana laha a ndzi ya kona, a ndzi ri ni swivutiso. Loko ndzi tlhelele ekaya eSloatsburg le New York, ndzi endzele tikereke to hlayanyana. Kambe a ku na laha ndzi kumeke tinhlamulo leti ndzi eneriseke.

 Siku rin’wana xichudeni xa xinhwanyetana lexi a xi ri ni malembe ya 12 xi tile eka mina ivi xi ndzi vutisa swivutiso swinharhu. Xi sungule xi ndzi vutisa loko ndzi swi tiva leswaku xona i Mbhoni ya Yehovha. Ndzi te, ina. Xi tlhele xi ndzi vutisa loko ndzi ta swi tsakela ku tiva swo tala hi Timbhoni ta Yehovha. Ndzi tlhele ndzi ku, ina. Xi ndzi vutisile laha ndzi tshamaka kona naswona loko ndzi xi byela adirese, hi xiye leswaku a ndzi le kule ni laha xi tshamaka kona. A ndzi nga swi tivi leswaku swivutiso sweswo swinharhu swa xichudeni lexi, a swi ta cinca vutomi bya mina.

Ku nga ri khale, xi sungule ku ta ekaya ra mina hi xikanyakanya leswaku xi ta dyondza Bibele na mina. Ndzi xi vutise swivutiso leswi a ndzi tshamela ku vutisa vafundhisi vo tala. Kambe ku hambana ni vafundhisi volavo, xona xi ndzi kombe tinhlamulo leti twisisekaka ni leti enerisaka leti humaka eBibeleni—tinhlamulo leti a ndzi nga si tshama ndzi ti vona.

Leswi ndzi swi dyondzeke eBibeleni swi ndzi tsakisile ni ku ndzi enerisa. Ndzi hlamarile loko ndzi hlaya 1 Yohane 5:19 leyi nge: “Misava hinkwayo yi le hansi ka matimba ya lowo homboloka.” Swi ndzi tsakisile ku tiva leswaku Xikwembu a hi xona xi vangaka maxangu lama nga kona kambe i Sathana naswona xi ta ma herisa. (Nhlavutelo 21:3, 4) Ndzi xiye leswaku Bibele ya twisiseka loko yi hlamuseriwa kahle. Hambileswi Mbhoni leyi a ndzi dyondza na yona a yi ri ni malembe ya 12 ntsena, ndzi swi vonile leswaku ntiyiso i ntiyiso ku nga khathariseki leswaku wu vuriwa hi mani.

Hambiswiritano, a ndzi lava ku vona loko Timbhoni ti endla leswi ti swi dyondzisaka. Hi xikombiso, xinhwanyetana lexi a xi kandziyisa leswaku Vakreste va ntiyiso va kombisa timfanelo to tanihi ku lehisa mbilu ni musa. (Vagalatiya 5:22, 23) Ndzi lave ku vona leswaku hakunene xa tikombisa timfanelo toleto. Siku rin’wana ndzi endle hi vomu ndzi fika nkarhi wo dyondza se wu hundzile. A ndzi tivutisa ndzi ku: “Xana xi ta ndzi yimela? Loko swi ri tano, xana xi ta va xi hlundzukile hileswi ndzi nga hlayisangiki nkarhi? Loko ndzi fika hi movha, a xi ndzi yimerile ehandle ekaya ra mina. Xi tsutsumele emovheni ya mina ivi xi ku: “A se ndzi lava ku ya ekaya ndzi ya byela manana leswaku hi fanele hi fonela eswibedlhele ni maphorisa hikuva a wu si tshama u nga hlayisi nkarhi wo dyondza. A ndzi karhatekile hi wena!”

Siku rin’wana, ndzi xi vutise xivutiso lexi a ndzi anakanya leswaku n’wana loyi a nga ni malembe ya 12, xi ta n’wi tikela ku xi hlamula. A ndzi lava ku vona loko xi ta swi kota ku hlamula. Loko ndzi xi vutisa, xi ndzi langutile hi ku tiyiseka xi ku: “Xivutiso xolexo xa tika. Ndzi ta xi tsala ivi ndzi ya vutisa vatswari va mina.” Loko xi ta leswaku hi ta hlaya, xi ndzi tele ni Xihondzo xo Rindza lexi a xi ri ni nhlamulo ya xivutiso xa mina. Sweswo swi endle leswaku ndzi rhandza Timbhoni hikuva minkandziyiso ya tona yi ndzi nyike tinhlamulo leti sekeriweke eBibeleni ta swivutiso swa mina hinkwaswo. Ndzi ye mahlweni ndzi dyondza ni xinhwanyetana xexo naswona endzhaku ka lembe, ndzi khuvuriwile ndzi va Mbhoni ya Yehovha. *

NDLELA LEYI NDZI PFUNEKEKE HA YONA:

Loko ndzi hetelele ndzi kume tinhlamulo leti enerisaka ta swivutiso swa mina, a ndzi lava ku byela van’wana hi tona. (Matewu 12:35) Eku sunguleni, ekaya a va nga swi tsakeli leswi a ndzi pfumela eka swona. Kambe hi ku famba ka nkarhi, va sungule ku antswa. Loko mana wa mina a nga si fa, u sungule ku dyondza Bibele. Hambileswi a nga ha hanyangiki nkarhi wo leha leswaku a khuvuriwa, ndza tiyiseka leswaku a a tiendlele xiboho xa ku tirhela Yehovha.

Hi 1978, ndzi tekane ni Mbhoni, ku nga Elias Kazan. Hi 1981 mina na Elias hi rhambiwile leswaku hi ya va swirho swa ndyangu wa Bethele eUnited States. * Lexi twisaka ku vava hileswaku, endzhaku ka malembe ya mune hi ri kwalaho, Elias u file. Ndzi ye emahlweni ndzi tshama eBethele hambileswi a ndzi ri noni naswona sweswo swi endle leswaku ndzi tshama ndzi khomekile ndzi tlhela ndzi chaveleleka.

Hi 2006, ndzi tekane na Richard Eldred loyi na yena a tshamaka eBethele. Mina na Richard hi ya mahlweni hi tsakela ku tirha eBethele. Ku tiva ntiyiso hi Xikwembu swi ndzi endle ndzi vona leswaku a ndzi kumanga ntsena nhlamulo ya swivutiso leswi a ndzi ri na swona kambe ndzi kume ni xikongomelo xa xiviri xa vutomi —hinkwaswo leswi, swi endleke hikwalaho ka swivutiso swinharhu swa xinhwanyetana.

^ ndzim. 16 Xinhwanyatana lexi ni vasesi ni vabuti va xona, va pfune vadyondzisi va vona leswaku va dyondza Bibele va tlhela va sungula ku gandzela Yehovha.

^ ndzim. 18 Rito leri nge “Bethele” ri vula “yindlu ya Xikwembu” naswona i rito leri Timbhoni ta Yehovha ti ri tirhisaka ku vula marhavi ya tona emisaveni hinkwayo. (Genesa 28:17, 19) Lava tshamaka eBethele va endla mintirho yo hambanahambana leyi seketelaka ntirho wo dyondzisa wa Timbhoni ta Yehovha.

DYONDZA SWO TALA

SWIVUTISO LESWI HLAMURIWAKA HI BIBELE

Hi Xihi Xikongomelo Xa Vutomi?

Xana u tshame u tivutisa leswaku, ‘Hi xihi xikongomelo xa vutomi?’ Dyondza ndlela leyi Bibele yi hlamulaka xivutiso xexo.