Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA MARCH 2015

 NHLOKOMHAKA YA XIFUNENGETO | YESU U HI PONISA EKA YINI?

Lexi Endlaka Hi Lava Ku Ponisiwa

Lexi Endlaka Hi Lava Ku Ponisiwa

“Munhu la velekiweke hi wansati, u hanya nkarhi wo koma naswona u taleriwe hi ku karhateka. U huma kukota xiluva kutani a khatluriwa, naswona u baleka ku fana ni ndzhuti kutani a nga ha vi kona.”—Yobo 14:1, 2.

Ku sukela eminkarhini ya khale, vanhu a va tshamela ku anakanya hi ndlela leyi va nga ta tshama va ri vantshwa ha yona naswona va tshama va ri ni rihanyo lerinene. Kambe lexi twisaka ku vava hileswaku: Ha fa. Marito ya Yobo lama nga laha henhla lama vuriweke emalembeni lama tlulaka 3 000 lama hundzeke, ma ha ri ntiyiso ninamuntlha.

Ku navela ku hanya hilaha ku nga heriki ku tshama ku ri kona eka vanhu hinkwavo. Bibele yi hi byela leswaku Xikwembu xi veke ku navela ku hanya hilaha ku nga heriki etimbilwini ta hina. (Eklesiasta 3:11) Hikwalaho, xana swa twala eka wena ku va Xikwembu lexi nga ni rirhandzu xi veka ku navela loku nga ta ka ku nga fikeleleki? Loko nhlamulo ya wena yi ri e-e, u tiyisile. Rito ra Xikwembu ri vula leswaku rifu i nala naswona xi tshembisa leswaku ‘ri ta herisiwa.’—1 Vakorinto 15:26.

A swi kanakanisi leswaku rifu i nala. A ku na munhu loyi a hanyeke kahle loyi a nga ri rhandzaka. Loko ku humelela khombo, ha ri balekela hi tifihla kumbe hi tsutsuma. Loko hi vabya, hi lava tindlela ta ku va hi tshunguleka. Hi endla xin’wana ni xin’wana leswaku hi papalata swilo leswi nga ta hi dlaya.

Xana xi kona lexi nga hi endlaka hi tshemba leswaku nala loyi u ta herisiwa? Ina, Yehovha Xikwembu loyi a nga Muvumbi, a nga endlanga vanhu leswaku va hanya malembenyana ivi va fa. Ku fa ka vanhu a ku nga ri xikongomelo xa yena. A a lava leswaku vanhu va hanya hilaha ku nga heriki laha emisaveni naswona xikongomelo xolexo xi ta endleka.—Esaya 55:11.

Hikwalaho, xana rifu ri ta herisiwa njhani? Se i khale vanhu va ringeta hi matimba ku lwa ni rifu, kambe a va humeleli. Ninamuntlha ka ha endliwa matshalatshala. Van’wasayense va endle mirhi yo tlhavela ni mirhi leyi antswisaka mavabyi man’wana. Va kambisise mhaka ya xitekela eka swilo leswi hanyaka. Etindhawini to tala, vanhu hi xiringaniso va hanya malembe yo tala ku tlula malembe ya dzana lama hundzeke. Kambe ku fa a ku heli. Bibele yi vula leswaku “hinkwaswo swi tlhelela entshurini.”—Eklesiasta 3:20.

Lexi tsakisaka hileswaku a hi fanelanga hi tshemba vanhu leswaku va herisa xiphiqo lexi ku nga khale xi ri kona. Yehovha Xikwembu u endle lunghiselelo leswaku hi ponisiwa eku rifu naswona lunghiselelo ra kona i Yesu Kreste.