Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA DECEMBER 2014

 NHLOKO-MHAKA YA XIFUNENGETO | U NGA VA MUNGHANA WA XIKWEMBU

Xana Wa Ri Tiva U Tlhela U Ri Tirhisa Vito Ra Xikwembu?

Xana Wa Ri Tiva U Tlhela U Ri Tirhisa Vito Ra Xikwembu?

Xana u kona munghana wa wena loyi u nga ri tiviki vito rakwe? Doo! Irina wansati un’wana wa Mubulgaria, u vula leswaku “a swi koteki ku va ni vuxaka ni Xikwembu loko u nga tivi vito ra xona.” Lexi tsakisaka hileswaku Xikwembu xi lava leswaku u va ni vuxaka na xona hilaha swi kombisiweke hakona eka nhloko-mhaka leyi hundzeke. Xikwembu xi tirhisa Bibele leswaku xi titivisa eka wena xi ku: “Hi mina Yehovha. Rero i vito ra mina.”—Esaya 42:8.

Xikwembu xi tirhisa Bibele leswaku xi titivisa eka wena xi ku: “Hi mina Yehovha. Rero i vito ra mina.”—Esaya 42:8

Xana Yehovha u ni mhaka ni leswaku wa ri tiva ni ku tirhisa vito rakwe? Xiya leswi: Vito ra Xikwembu, leri tsariweke hi maletere ya mune ya Xiheveru ku nga Tetragrammaton, ri humelela minkarhi ya kwalomu ka 7 000 eMatsalweni ya Xiheveru. A ku na vito rin’wana leri humelelaka minkarhi yoleyo eBibeleni. Hakunene lebyi i vumbhoni bya leswaku Yehovha u lava hi tiva vito ra yena hi tlhela hi ri tirhisa. *

Hi ntolovelo vanhu vambirhi va sungula vunghana hi ku va va tivana mavito ya vona. Xana wa ri tiva vito ra Xikwembu?

Kambe, van’wana va ehleketa leswaku leswi Xikwembu xi kwetsimaka xi tlhela xi va ni matimba hinkwawo, ku ta va ku nga ri ku komba xichavo ku xi vita hi vito. I ntiyiso leswaku a hi fanelanga hi tirhisa vito ra Xikwembu hi ndlela leyi nga riki yinene hilaha na wena u nga ta ka u nga ri tirhisi hi ndlela leyi nga riki yinene vito ra munghana wa wena. Hambiswiritano, Yehovha u lava leswaku lava n’wi rhandzaka va xixima vito rakwe hi ku va va ri tivisa van’wana. (Pisalema 69:30, 31; 96:2, 8) Tsundzuka leswaku Yesu u dyondzise valandzeri vakwe ku khongela va ku: “Tata wa hina la nge matilweni, vito ra wena a ri kwetsimisiwe.” Na hina hi ni lunghelo ro kwetsimisa vito ra Xikwembu hi ku ri tivisa van’wana. Loko hi endla tano, hi ta va ni vuxaka na xona.—Matewu 6:9.

Bibele yi kombisa leswaku Xikwembu xa khathala hi vanhu ‘lava va anakanyaka kumbe lava ri tekaka ri ri ra nkoka vito ra xona.’ (Malakiya 3:16) Loko Yehovha a vulavula hi vanhu vo tano u ri: ‘Ndzi ta va sirhelela hikuva va tiva vito ra mina. Va ta ndzi vitana, ndzi ta va hlamula. Ndzi ta va na vona emaxangwini.’ (Pisalema 91:14, 15) I swa nkoka ku tiva ni ku tirhisa vito ra Yehovha loko hi lava ku va ni vuxaka na yena.

^ ndzim. 4 Lexi twisaka ku vava hileswaku eka vuhundzuluxeri byo tala vito ra Xikwembu a ri kona hambileswi ri humelelaka minkarhi yo tala eMatsalweni ya Xiheveru ku nga Testamente ya Khale. Ematshan’weni ya sweswo va ri sive hi swithopo swo tanini “Hosi” kumbe “Xikwembu.” Leswaku u kuma rungula leri engetelekeke hi mhaka leyi, hlaya eka matluka 195-197 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.