Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  December 2014

 NHLOKO-MHAKA YA XIFUNENGETO | U NGA VA MUNGHANA WA XIKWEMBU

Xana Wa Swi Endla Leswi Xikwembu Xi Swi Lavaka?

Xana Wa Swi Endla Leswi Xikwembu Xi Swi Lavaka?

“Xin’wana ni xin’wana lexi u xi lavaka, ndzi byele ndzi ta ku endlela xona.” Marito lawa a wu nge ma vuli eka munhu loyi u nga n’wi tiviki kumbe loyi mi ngo lo tolovelana ntsena a nga riki munghana wa wena. Kambe a wu nge kanakani ku ma vula marito lawa eka munghana wa wena. Vanghana lavakulu va swi tsakela ku va va pfunana.

Bibele yi vula leswaku Yehovha u endlela vagandzeri vakwe swilo leswi a tivaka leswaku swi ta va tsakisa. Hi xikombiso, Hosi Davhida loyi a tsakeleke ku va ni vunghana ni Xikwembu u te: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina. . . . Yi tele swinene lerova a ndzi nge yi runguli.” (Pisalema 40:5) Ku tlula kwalaho, Yehovha u endla ni swilo leswinene hambi ku ri eka vanhu lava nga n’wi tiviki, ‘u tata timbilu ta vona hi ku helela hi swakudya ni ku khana lokukulu.’—Mintirho 14:17.

Vanhu lava hi va rhandzaka ni ku va xixima, hi tsakela ku va endlela swo karhi

Leswi Yehovha a tsakelaka ku endla leswinene eka van’wana, swa twisiseka leswaku lava lavaka ku va vanghana va Xikwembu na vona va ta endla leswi nga ta “tsakisa mbilu” ya xona. (Swivuriso 27:11) U nga endla yini leswaku u tsakisa Xikwembu? Bibele yi hlamula yi ku: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” (Vaheveru 13:16) Xana leswi swi vula leswaku ku endlela van’wana leswinene hi swona ntsena swi nga swa nkoka eka Yehovha?

Bibele yi ri: “Handle ka ripfumelo a swi koteki ku xi tsakisa kahle [Xikwembu].” (Vaheveru 11:6) Lexi endleke leswaku Abrahama “a vuriwa nakulobye wa Yehovha,” hileswi ‘a veke ni ripfumelo eka yena.’ (Yakobo 2:23) Yesu Kreste na yena u kandziyise nkoka wa ku “kombisa ripfumelo eka Xikwembu” loko hi lava ku kuma mikateko ya xona. (Yohane 14:1) U nga ri kuma njhani ripfumelo leri Xikwembu xi ri lavaka eka lava xi va kokelaka eka xona? U nga sungula hi ku va minkarhi hinkwayo u dyondza Rito ra Xikwembu ku nga Bibele. Loko u endla tano, u ta kuma “vutivi lebyi kongomeke bya ku rhandza ka xona,” u tlhela u dyondza ndlela ya ku va u ‘xi tsakisa hi ku helela.’ Loko u ri karhi u kuma vutivi lebyi kongomeke hi Yehovha u tlhela u tirhisa leswi u swi hlayeke hi milawu ya yena, ripfumelo ra wena ri ta kula naswona u ta tshinela eka wena.—Vakolosa 1:9, 10.