Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NOVEMBER 2014

 BULO NI MUAKELANI

Mfumo Wa Xikwembu Wu Sungule Rini Ku Fuma? (Xiyenge 2)

Mfumo Wa Xikwembu Wu Sungule Rini Ku Fuma? (Xiyenge 2)

Bulo leri landzelaka ri kombisa ndlela leyi Mbhoni ya Yehovha yi nga bulaka ha yona ni muakelani. A hi anakanyeni hi Mbhoni leyi vuriwaka Cameron leyi tlheleleke eka wanuna la vuriwaka Jon.

NORHO WA NEBUKADNETSARA—MPFUXETO WA KONA

Cameron: Ndzi tsakela ku tlhela ndzi ku vona, Jon. Ndza tsaka loko hi hlangana vhiki ni vhiki leswaku hi dyondza Bibele. * U sele njhani?

Jon: Ndzi sale kahle swinene.

Cameron: Ndza tsaka ku twa sweswo. Nkarhi lowu hundzeke loko ndzi ri laha hi bule hi leswaku ha yini Timbhoni ta Yehovha ti vula leswaku Mfumo wa Xikwembu wu sungule ku fuma hi 1914. * Tanihi laha hi buleke hakona, hi kume vumbhoni bya nkoka hi vuprofeta lebyi nga eka Daniyele ndzima 4 eBibeleni. Xana wa ha tsundzuka leswi tsariweke eka yona?

Jon: A ku ri norho wa Nebukadnetsara wa murhi lowukulu.

Cameron: Ina, wa vurisa. Enorhweni wakwe, Nebukadnetsara u vone murhi lowukulu ngopfu lowu fikaka etilweni. U twe murhumiwa wa Xikwembu a lerisa leswaku murhi wu tsemiwa, kambe xikundzu xa wona ni timitsu swi tshikiwa emisaveni. Endzhaku ka “minkarhi ya nkombo,” murhi a wu ta tlhela wu kula. * Hi tlhele hi bula hi leswaku ha yini vuprofeta lebyi byi hetiseka hi tindlela timbirhi. Xana wa tsundzuka leswaku byi hetiseke ro sungula hi ndlela yihi?

Jon: Swi humelele Nebukadnetsara hi xiviri, a hi swona? U khomiwe hi vuvabyi bya miehleketo ku ringana malembe ya nkombo.

Cameron: U tiyisile. Ku ringana nkarhinyana, Nebukadnetsara u khomiwe hi vuvabyi bya miehleketo, hikwalaho ka sweswo mfumo wakwe wu kavanyetekile. Kambe eku hetisekeni lokukulu ka vuprofeta, vulawuri bya Xikwembu a byi ta kavanyetiwa hi ndlela yo karhi ku ringana minkarhi ya nkombo. Hi swi vonile leswaku minkarhi ya nkombo yi sungule loko Yerusalema wu lovisiwa hi 607 B.C.E. Ku sukela enkarhini wolowo, a ku nga ha ri na tihosi emisaveni leti a ti fuma vanhu va Xikwembu leti a ti yimela mfumo wa xona. Hambiswiritano, loko minkarhi ya nkombo yi hela, Xikwembu xi ta veka Mufumi lontshwa wa le tilweni loyi a nga ta fuma vanhu va xona. Hi marito man’wana ku hela ka minkarhi ya nkombo ku ta fungha ku sungula ka ku fuma ka Mfumo wa Xikwembu wa le tilweni. Se hi burile hi leswaku minkarhi ya nkombo yi sungule rini. Hikwalaho loko ho kuma leswaku a yi ta leha ku fika kwihi, hi kona hi nga ta tiva leswaku Mfumo wa Xikwembu wu sungule ku fuma rini. Ndza tshemba leswaku wa swi twisisa ku ta fika sweswi.

Jon: Ina, mpfuxeto lowu wu ndzi pfunile leswaku ndzi tsundzuka.

Cameron: Swa tsakisa. A hi kambisise hi vuenti leswaku hi kota ku vona leswaku minkarhi ya nkombo a yi lehe nkarhi wo tanihi kwihi. Ndzi hlaye hi mhaka leyi leswaku ndzi titsundzuxa tinhla ta nkoka. Ndzi ta ringeta hilaha ndzi nga ta kota hakona ku ku hlamusela yona.

Jon: Swi lulamile.

 MINKARHI YA NKOMBO YI HELA—KU SUNGULA MASIKU YA MAKUMU

Cameron: Eku hetisekeni ko sungula ka vuprofeta, loku a ku katsa Nebukadnetsara, minkarhi ya nkombo a ku ri malembe ya xiviri ya nkombo. Kambe eku hetisekeni ka byona hi ndlela leyikulu, loku katsaka Mfumo wa Xikwembu, minkarhi ya nkombo yi fanele yi lehe ku tlula malembe ya nkombo ya xiviri.

Jon: Ha yini u vula tano?

Cameron: Tsundzuka leswaku minkarhi ya nkombo yi sungule loko ku lovisiwa Yerusalema hi 607 B.C.E. Loko hi hlayela ku sukela elembeni rero, malembe ya nkombo ya xiviri ma ta hi fikisa eka lembe ra 600 B.C.E. Kambe a ku na nchumu wo hlawuleka lowu endlekeke hi lembe rero, lowu fambisanaka ni ku fuma ka Xikwembu. Handle ka sweswo, tanihi loko hi swi xiyile, endzhaku ka madzana ya malembe loko Yesu a ri laha misaveni, u kombise leswaku minkarhi ya nkombo a yi nga si hela.

Jon: U tiyisile. Se ndza swi tsundzuka sweswo.

Cameron: Hikwalaho, ematshan’wini yo va malembe ya xiviri, minkarhi ya nkombo yi katsa nkarhi wo leha.

Jon: Wu lehe ku fikela kwihi?

Cameron: Buku ya Bibele ya Nhlavutelo, leyi fambisanaka ni ya Daniyele, yi hi pfuna ku twisisa leswaku minkarhi ya nkombo a yi lehe ku fikela kwihi. Yi hlamusela leswaku minkarhi yinharhu ni hafu yi ringana ni masiku ya 1 260. * Xisweswo minkarhi yinharhu ni hafu loko yi phindhiwa ka mbirhi yi ta va minkarhi ya nkombo leyi ringanaka ni masiku ya 2 520. Xana wa swi twisisa?

Jon: Ina, ndza swi twisisa. Kambe a ku na laha yi kombisaka leswaku Mfumo wa Xikwembu wu sungule ku fuma hi 1914.

Cameron: Swi lulamile, a hi vone leswaku swi hlangana njhani. Minkarhi yin’wana eka vuprofeta bya Bibele, siku ri yimela lembe. * Loko hi tirhisa nawu wa leswaku siku ri ringana ni lembe, minkarhi ya nkombo yi ta ringana ni malembe ya 2 520. Loko u hlayela ku suka eka 607 B.C.E., u ya emahlweni, malembe ya 2 520 ma hi fikisa eka lembe ra 1914. * Hi kuma lembe ra 1914 hi ndlela yoleyo, tanihi lembe leri minkarhi ya nkombo yi heleke ha rona, ku nga lembe leri Yesu a sunguleke ku fuma tanihi hosi ya Mfumo wa Xikwembu. Mhaka ya nkoka hileswaku, ku sukela hi 1914, ku endleke swiendlakalo leswikulu leswi Bibele yi swi profeteke malunghana ni masiku ya makumu.

Jon: I swiendlakalo swihi?

Cameron: Xiya leswi Yesu a swi vuleke hilaha swi tsariweke hakona eka Matewu 24:7. Malunghana ni nkarhi lowu a a ta sungula ku fuma ha wona etilweni, Yesu u te: “Tiko ri ta pfukela tiko rin’wana ni mfumo wu ta pfukela mfumo wun’wana, kutani ku ta va ni ku kayivela ka swakudya ni ku tsekatseka ka misava ku suka endhawini yin’wana ku ya eka yin’wanyana.” Xiya leswaku Yesu u profete hi ku kayivela ka swakudya ni ku tsekatseka ka misava hi nkarhi wolowo. Vanhu va vone makhombo yo tano eka malembe ya dzana lama hundzeke, a swi tano ke?

Jon: Swi tano.

Cameron: Eka ndzimana leyi, Yesu u tlhele a profeta leswaku ku ta va ni tinyimpi enkarhini wa vukona bya yena tanihi Hosi ya Mfumo wa Xikwembu. Nakambe buku ya Bibele ya Nhlavutelo a yi profetanga leswaku ku ta va ni tinyimpi ta xin’wana manana ntsena, kambe ni tinyimpi leti a ti ta khumba misava hinkwayo enkarhini wa makumu. * Xana wa tsundzuka leswaku nyimpi yo sungula ya misava yi tlhekeke rini?

Jon: A ku ri lembe ra 1914, leri u vulaka leswaku  Yesu u sungule ku fuma ha rona. A ndzi nga si swi xiya leswaku swa fambisana.

Cameron: Loko hi hlanganisa vuprofeta lebyi—lebyi vulavulaka hi minkarhi ya nkombo ni byin’wana lebyi nga eBibeleni lebyi vulavulaka hi nkarhi wa makumu, bya fambisana. Timbhoni ta Yehovha ta pfumela leswaku Yesu u sungule ku fuma tanihi hosi ya Mfumo wa Xikwembu hi 1914, ni leswaku masiku ya makumu ma sungule hi lembe rolero. *

Jon: Ndzi le ku ringeteni ku twisisa mhaka leyi.

Cameron: Ndza swi twisisa. Tanihi leswi se ndzi boxeke eku sunguleni, na mina ndzi hete nkarhi wo leha ndzi nga si yi twisisa kahle mhaka leyi. Ndza tshemba leswaku switsongonyana leswi hi buleke ha swona swi ku pfunile ku twisisa leswaku hambiloko lembe ra 1914 ri nga ri kona eBibeleni, Timbhoni ta Yehovha ti seketela leswi ti swi pfumelaka malunghana ni lembe rero hi Matsalwa.

Jon: Ina, hi leswi ndzi tsakisaka hi wena, xin’wana ni xin’wana lexi u xi vulaka u xi seketela hi tsalwa. A swi humi eka wena. Ndza tivutisa leswaku ha yini mhaka leyi yi rharhanganile. Ha yini Xikwembu xi nga hi byelanga hi ku kongoma eBibeleni leswaku lembe ra 1914 ri ta va lembe leri Yesu a nga ta sungula ku fuma ha rona etilweni?

Cameron: Xolexo i xivutiso xa kahle swinene, Jon. Kahle-kahle ku ni swilo swo tala leswi nga vuriwangiki hi ku kongoma eMatsalweni. Ha yini Xikwembu xi endle leswaku Bibele yi tsariwa hi ndlela leyi nga ta endla leswaku vanhu va tikarhata leswaku va yi twisisa? Hi ta bula hi mhaka yoleyo loko ndzi tlhela ndzi vuya.

Jon: Ndzi ta swi tsakela sweswo.

Xana ku ni mhaka yo karhi ya le Bibeleni leyi u nga yi twisisiki? Xana u nga tsakela ku tiva leswi Timbhoni ta Yehovha ti pfumelaka eka swona? Loko swi ri tano, u nga kanakani ku vutisa un’wana wa Timbhoni ta Yehovha. U ta swi tsakela ku bula na wena hi mhaka yoleyo.

^ ndzim. 5 Hikwalaho ka nongonoko wa tona wa dyondzo ya Bibele ya mahala, Timbhoni ta Yehovha ti tshama ti ri karhi ti burisana ni vaakelani va tona hi Bibele.

^ ndzim. 7 Hlaya xihloko lexi nge: “Bulo Ni Muakelani—Xana Mfumo Wa Xikwembu Wu Sungule Rini Ku Fuma?—Xiyenge 1” eka Xihondzo xo Rindza xa October 1, 2014.

^ ndzim. 24 Hlaya chati leyi nge: “Norho Wa Nebukadnetsara Wa Murhi.”

^ ndzim. 30 Hlaya ndzima 9 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

 

DYONDZA SWO TALA

I Yini Leswi Nxaxamelo Wa Minkarhi Ya Bibele Wu Swi Kombisaka Hi Lembe Ra 1914?

Vuprofeta bya “minkarhi ya nkombo” eka Daniyele ndzima 4 byi kombetela eka nkarhi wo tika wa vuhosi bya vanhu.

Xana Hi Hanya “eMasikwini Yo Hetelela”?

Anakanyisisa hi ndlela leyi swiendlo ni malangutelo ya vanhu lava hi rhendzeleke swi kombisaka ha yona leswaku sweswi hi hanya “emasikwini yo hetelela” lawa Bibele yi profeteke ha wona.