Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA NOVEMBER 2014

 NHLOKO-MHAKA YA XIFUNENGETO | XANA SATHANA U KONA?

Xana Hi Fanele Hi N’wi Chava Sathana?

Xana Hi Fanele Hi N’wi Chava Sathana?

Khaboni-monokisayidi a yi vonaki naswona yi ni khombo—ku fana na Sathana

A swi olovi ku lemuka gasi leyi vuriwaka khaboni-monokisayidi. Leswi yi nga riki na muhlovo ni nun’hwelo, yi nga dlaya swilo swo tala handle ko xiyiwa. Kumbexana ku tlula hafu ya mafu lama vangiweke hi chefu ma vangiwe hi chefu leyi, leyi nga ni khombo ku nga: khaboni-monokisayidi. Kambe, u nga chavi. Ku ni tindlela to lemuka gasi leyi ni ndlela leyi u nga tisirhelelaka ha yona. Vanhu vo tala hi vutlhari va vekela tialamu kutani loko ti rila va hatla va teka goza.

Ku fana ni khaboni-monokisayidi, Sathana a nga vonaki, swa va tikela vanhu ku n’wi xiya naswona u ni khombo swinene. Kambe Xikwembu xa hi pfuna leswaku hi kota ku n’wi xiya. A ku na xivangelo xo va u chava Sathana loko u tirhisa tinyiko leti landzelaka leti Xikwembu xi hi nyikeke tona.

Matimba yo tihlawulela. Yakobo 4:7 yi ri: “Mi kaneta Diyavulosi, kutani u ta mi balekela.” Hambileswi Sathana a nga ni matimba, a nge ku sindzisi ku endla swilo leswi u nga swi laviki. Wena u ni lunghelo ro tihlawulela. Petro wo Sungula 5:9 yi ri: “Lwanani na [Diyavulosi], mi tiya eripfumelweni.” Tsundzuka, Sathana u fambile loko Yesu a nga pfumelanga ku hluriwa hi miringo yinharhu leyi a n’wi ringeke ha yona. (Matewu 4:11) Hilaha ku fanaka, na wena u nga tihlawulela ku ala loko Sathana a ku ringa.

Ku endla xinghana ni Xikwembu. Yakobo 4:8 yi hi khutaza leswaku hi “[tshinela] eka Xikwembu.” Yehovha wa ku rhamba leswaku u va munghana wakwe. U nga swi endlisa ku yini sweswo? Ndlela leyinene yo endla tano i ku sungula ku dyondza swo tala malunghana na yena eBibeleni. (Yohane 17:3) Leswi u swi dyondzaka hi Yehovha swi ta ku endla u n’wi rhandza kutani hi ku famba ka nkarhi u ta susumeteleka ku endla ku rhandza ka yena. (1 Yohane 5:3) Loko u ri karhi u tshinela ekusuhi ni Tata wa wena wa le tilweni, xana yena u ta endla yini? Yakobo u ye emahlweni a vula leswaku ‘Xikwembu xi ta tshinela eka n’wina.’

Yehovha u endle malunghiselelo ya moya lama nga ku sirhelelaka

Xi tshembisa leswaku xi ta ku sirhelela. Swivuriso 18:10 yi ri: “Vito ra Yehovha i xihondzo xo tiya. Lowo lulama u tsutsumela eka xona naswona u kuma nsirhelelo.” Sweswo a swi vuli swona leswaku vito ra Xikwembu i xitshungulo. Ematshan’weni ya sweswo, swi vula leswaku vanhu lava xiximaka vito ra Xikwembu va nga xi kombela minkarhi hinkwayo leswaku xi va sirhelela.

Xikombiso lexi u nga xi tekelelaka. Mintirho 19:19 yi hi dyondzisa swo karhi hi Vakreste lava a va ha ku hundzuka va le Efesa yi ri: “Vo hlaya swinene lava a va hanya hi masalamusi va hlengeleta tibuku ta vona kutani va ti hisa emahlweni ka vanhu hinkwavo. Kutani va hlayela nxavo wa tona, va kuma ti ringana swiphemu swa silivhere  swa 50 000.” * Vakreste volavo va cukumete swilo hinkwaswo leswi a swi fambisana ni vungoma ku nga khathariseki leswaku a swi durha ku fikela kwihi. Hi nga dyondza swo tala namuntlha eka xikombiso xa vona. Masalamusi ni vungoma swi tinyike matimba swinene emisaveni hinkwayo namuntlha. Hambi ku ri swilo swo karhi leswi fambisanaka ni vungoma ni mikhuva leyi vonakaka yi nga bihanga, swi nga ha endla leswaku u hlaseriwa hi madimona. I swa nkoka swinene ku cukumeta swilo swo tano hinkwaswo.—Deteronoma 18:10-12.

Rogelio, loyi ku vulavuriweke hi yena eka xihloko xo sungula xa swihloko leswi swa nxaxamelo, u hete malembe ya 50 a nga tshembi leswaku Diyavulosi u kona. Kambe u cince langutelo rakwe. Ha yini? U ri: “A ndzi sungula ku va ndzi kuma Bibele evuton’wini bya mina. Vutivi lebyi ndzi byi kumeke hikwalaho ko dyondza Matsalwa byi ndzi khorwisile leswaku Diyavulosi u kona hakunene. Vutivi byebyo sweswi bya ndzi sirhelela leswaku ndzi nga kanganyisiwi hi marhengu yakwe.”

“Vutivi lebyi ndzi byi kumeke hikwalaho ko dyondza Matsalwa byi ndzi khorwisile leswaku Diyavulosi u kona hakunene. Vutivi byebyo sweswi bya ndzi sirhelela leswaku ndzi nga kanganyisiwi hi marhengu yakwe”

Xana u nga swi tsakela ku vona nkarhi lowu Sathana a nga ta va a nga ha ri kona? U nga wu vona. Matsalwa ma vula leswaku enkarhini lowu taka Diyavulosi, loyi a hambukisaka vanhu vo tala u ta “lahleriwa etiveni ra ndzilo ni xivavula.” (Nhlavutelo 20:10) I ntiyiso leswaku, ndzilo wa xiviri ni xivavula a swi nge swi koti ku hisa xivumbiwa xa moya lexi nga vonakiki. Xisweswo, tiva ra ndzilo ri fanele ri fanekisela ku loviseriwa makumu. Sathana u ta heriseriwa makumu. Mayana ntsako lowukulu lowu vanhu lava rhandzaka Xikwembu va nga ta va na wona hi nkarhi wolowo!

Loko nkarhi wolowo wu nga si fika, hambeta u dyondza hinkwaswo leswi u nga swi kotaka hi Yehovha ni tindlela takwe. * Hi mahlo ya mianakanyo tivone u ri karhi u hanya hi nkarhi wolowo, lowu eku heteleleni ku nga ta vuriwa leswaku, “Sathana a nga kona!”

^ ndzim. 8 Loko ku ri leswaku swiphemu swa silivhere leswi ku vulavuriwaka hi swona laha a ku ri tidenari ta le Rhoma, swi vula leswaku mali yoleyo a yi ringana ni muholo wa siku wa vatirhi va kwalomu ka 50 000, ku nga mali yo tala swinene.

^ ndzim. 11 Leswaku u kuma rungula leri engetelekeke malunghana na Sathana ni vungoma, hlaya ndzima 10 ya buku leyi nge, Xana Bibele Yi Dyondzisa Yini Hakunene? Kombela buku leyi eka Mbhoni ya Yehovha.

DYONDZA SWO TALA

MAHUNGU LAMANENE LAMA HUMAKA EKA XIKWEMBU!

Hi Xihi Xikongomelo Xa Xikwembu Hi Misava?

Bibele yi hlamusela xivangelo xo va Xikwembu xi tumbuluxe misava, nkarhi lowu ku xaniseka ku nga ta hela ni leswi vumundzuku byi yi khomeleke swona misava ni lava tshamaka eka yona.

Xana Bibele Yi Dyondzisa Yini Hakunene?

Ndlela Leyi Swivumbiwa Swa Moya Swi Khumbaka Vutomi Bya Wena Ha Yona

Bibele yi vulavula hi tintsumi ni madimona. Xana swivumbiwa leswi swa moya i swa xiviri? Xana swi nga byi khumba vutomi bya wena?