Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2014

 NHLOKO-MHAKA YA XIFUNENGETO | MFUMO WA XIKWEMBU—I YINI LEXI NGA ENDLAKA WU VA WA NKOKA EKA WENA?

Mfumo Wa Xikwembu—Lexi Endlaka Wu Va Wa Nkoka Eka Yesu

Mfumo Wa Xikwembu—Lexi Endlaka Wu Va Wa Nkoka Eka Yesu

Hi nkarhi wa vutirheli byakwe bya laha misaveni, Yesu u vulavule hi timhaka to tala. Hi xikombiso, u dyondzise valandzeri vakwe ndlela yo khongela, ndlela yo tsakisa Xikwembu ni ndlela yo kuma ntsako wa xiviri. (Matewu 6:5-13; Marka 12:17; Luka 11:28) Kambe mhaka leyi Yesu a vulavuleke ha yona swinene ku tlula letin’wana hinkwato, ku nga mhaka leyi a yi rhandza swinene, a ku ri Mfumo wa Xikwembu.—Luka 6:45.

Hilaha hi swi xiyeke hakona eka xihloko lexi nga hundza, Yesu a a tinyiketele ku “chumayela ni ku vula mahungu lamanene ya Mfumo.” (Luka 8:1) U tirhe hi matimba, a famba tikhilomitara ta madzana etikweni hinkwaro ra Israyele leswaku a dyondzisa vanhu hi Mfumo wa Xikwembu. Vutirheli bya Yesu byi tsariwe eka Tievhangeli ta mune, leti nga ni swikombo swo tlula 100 leswi vulavulaka hi Mfumo. Swo tala swa swikombo sweswo swi kumeka emaritweni ya Yesu naswona swi fanele swi ri ni rungula ritsongo eka marungula hinkwawo lawa a ma vuleke malunghana ni Mfumo wa Xikwembu!—Yohane 21:25.

Ha yini Mfumo a wu ri wa nkoka swinene eka Yesu loko a ha ri laha misaveni? Yesu a a swi tiva leswaku Xikwembu xi n’wi hlawule leswaku a va Mufumi wa wona. (Esaya 9:6; Luka 22:28-30) Kambe Yesu a a nga tiyimiselanga ku vangamisiwa. (Matewu 11:29; Marka 10:17, 18) A nga seketelanga Mfumo leswaku a ta vuyeriwa. Yesu u rhandza Mfumo wa Xikwembu * hikwalaho ka leswi wu nga ta va endlela swona lava a va rhandzaka—Tata wakwe wa le tilweni ni valandzeri vakwe vo tshembeka.

LESWI MFUMO WU NGA TA SWI ENDLA EKA TATA WA YESU

Yesu u n’wi rhandza swinene Tata wakwe wa le tilweni. (Swivuriso 8:30; Yohane 14:31) U xixima timfanelo leti rhandzekaka ta Tata wakwe, to tanihi rirhandzu Rakwe, ntwela-vusiwana Wakwe ni vululami Byakwe. (Deteronoma 32:4; Esaya 49:15; 1 Yohane 4:8) Swi le rivaleni leswaku Yesu a ma venga mavunwa lawa a ma hangalasiwa malunghana ni Tata wakwe—mavunwa yo tanihi leswaku Xikwembu a xi na mhaka loko vanhu va xaniseka ni leswaku Xikwembu xi lava leswaku hi xaniseka. Lexi i xivangelo xin’wana lexi endleke Yesu a hisekela ku vula “mahungu lamanene ya Mfumo”—a a swi tiva leswaku hi ku famba ka nkarhi Mfumo a wu ta basisa vito ra Tata wakwe leri thyakisiweke. (Matewu 4:23; 6:9, 10) Xana a wu ta swi endla njhani sweswo?

Hi ku tirhisa Mfumo, Yehovha u ta lwela vanhu vakwe. U “ta sula mihloti hinkwayo” ematihlweni ya vanhu vo tshembeka. Yehovha u ta susa swilo leswi vangaka mihloti yoleyo, a tiyisekisa leswaku “rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Nhlavutelo 21:3, 4) Hi ku tirhisa Mfumo, Xikwembu xi ta herisa ku xaniseka hinkwako loku vanhu va langutanaka na kona. *

A swi hlamarisi leswi Yesu a a hisekela ku byela vanhu hi Mfumo! A a swi tiva leswaku a wu ta paluxa  ndlela leyi Tata wakwe a nga ni matimba ni ntwela-vusiwana ha yona. (Yakobo 5:11) Nakambe Yesu a a swi tiva leswaku Mfumo a wu ta vuyerisa van’wana lava a va rhandzaka—vanhu vo tshembeka.

LESWI MFUMO WU NGA TA SWI ENDLA EKA VANHU VO TSHEMBEKA

Loko ka ha sale malembe leswaku a ta laha misaveni, Yesu a hanya etilweni ni Tata wakwe. Tatana u tirhise N’wana ku vumba swilo hinkwaswo—ku sukela eka matilo, tinyeleti ni swirimele swa ntsandza-vahlayi leswi hlamarisaka ku ya eka pulanete ya hina yo saseka ni swiharhi leswi tshamaka eka yona. (Vakolosa 1:15, 16) Kambe eka swilo hinkwaswo, Yesu u ‘rhandze’ vanhu.—Swivuriso 8:31.

Vutirheli bya Yesu byi kombise leswaku u rhandza vanhu. Ku sukela eku sunguleni, u swi veke erivaleni leswaku u te laha misaveni leswaku a ta “vula mahungu lamanene” eka lava pfumalaka. (Luka 4:18) Kambe Yesu u endle swo tala ku tlula ku vulavula hi ku pfuna vanhu. Nkarhi na nkarhi, u endle swilo leswi kombiseke leswaku u rhandza vanhu. Hi xikombiso, loko ntshungu lowukulu wu hlengeletanile leswaku wu n’wi yingisela loko a ri karhi a vulavula, Yesu u ‘wu twele vusiwana, a hanyisa vavabyi exikarhi ka wona.’ (Matewu 14:14) Loko wanuna loyi a nga ni vuvabyi lebyi dlayaka a ve ni ripfumelo ra leswaku Yesu a nga n’wi horisa loko hakunene a swi lava, Yesu u susumetiwe hi rirhandzu. U horise wanuna yoloye, hi ntwela-vusiwana a ku eka yena: “Ndza swi lava! Basisiwa.” (Luka 5:12, 13) Loko Yesu a vona munghana wakwe Mariya a ri karhi a rila hikwalaho ka rifu ra makwavo wakwe Lazaro, Yesu u ‘konye emoyeni,’ “a karhateka” kutani a “rila.” (Yohane 11:32-36) U endle nchumu wun’wana wo hlamarisa—Yesu u pfuxe Lazaro eku feni hambileswi a a ri ni masiku ya mune a file!—Yohane 11:38-44.

I ntiyiso leswaku Yesu a a swi tiva leswaku mpfuno lowu a wu nyikela a wu ri wa xinkarhana. A a swi xiya leswaku hi ku famba ka nkarhi hinkwavo lava a va hanyiseke a va ta tlhela va vabya naswona hinkwavo lava a va pfuxeke eku feni a va ta tlhela va fa. Nakambe Yesu a a swi tiva leswaku Mfumo wa Xikwembu a wu ta swi herisa hi ku helela swiphiqo swo tano. Hi yona mhaka Yesu a nga endlangiki masingita ntsena; u tlhele a hisekela ku vula “mahungu lamanene ya Mfumo.” (Matewu 9:35) Masingita yakwe ma swi kombise hi mpimo wutsongo leswi Mfumo wa Xikwembu wu nga ta swi endla ku nga ri khale laha misaveni. Kambisisa leswi Bibele yi swi tshembisaka malunghana ni nkarhi wolowo.

  •  A ku nge he vi ni swiphiqo swa rihanyo.

    “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” Ku engetela kwalaho, “ku hava munhu la tshamaka kona la nga ta ku: ‘Ndza vabya.’”—Esaya 33:24; 35:5, 6.

  • A ku nge he vi ni rifu.

    “Lavo lulama va ta dya ndzhaka ya misava, va ta tshama eka yona hi masiku.”Pisalema 37:29.

    “U ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.”—Esaya 25:8.

  • Lava feke va ta pfuxiwa.

    “Hinkwavo lava nga eka masirha-bako ya xitsundzuxo va . . . ta twa rito ra yena kutani va huma.”—Yohane 5:28, 29.

    ‘Ku ta va ni ku pfuxiwa ka lava feke.’—Mintirho 24:15.

  • A ku nge he vi ni lava nga ta pfumala makaya kumbe mintirho.

    “Va ta aka tindlu va tshama eka tona, kunene va ta rima masimu ya vhinya va dya mihandzu ya wona. A va nge aki kutani ku tshama un’wana, a va nge rimi kutani ku dya un’wana. . . . Ntirho wa mavoko ya vona, vahlawuriwa va mina va ta wu tirhisa hi xitalo.”—Esaya 65:21, 22.

  •  A ku nge he vi ni nyimpi.

    “U herisa tinyimpi ku ya fika emakumu ya misava.”—Pisalema 46:9.

    “Tiko a ri nge tlakuseli tiko rin’wana banga, naswona a va nge he dyondzi nyimpi.”—Esaya 2:4.

  • A ku nge he vi ni ku pfumaleka ka swakudya.

    “Misava yi ta humesa swimila swa yona; Xikwembu, Xikwembu xa hina xi ta hi katekisa.”—Pisalema 67:6.

    “Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

  • A ku nge he vi ni vusweti.

    “Xisiwana a xi nge rivariwi nkarhi hinkwawo.”—Pisalema 9:18.

    “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana.”—Pisalema 72:12, 13.

Loko u kambisisa switshembiso sweswo swa malunghana ni Mfumo wa Xikwembu, xana wa swi vona leswaku ha yini Mfumo wu ri wa nkoka swinene eka Yesu? Loko a ha ri laha misaveni, a a hisekela ku vulavula hi Mfumo wa Xikwembu eka un’wana ni un’wana loyi a a n’wi yingisela, hikuva a a swi tiva leswaku Mfumo a wu ta herisa swiphiqo hinkwaswo leswi tshikilelaka leswi hi swi vonaka namuntlha.

Xana switshembiso leswi nga eBibeleni swa malunghana ni Mfumo swa ku tsakisa? Loko swi ri tano, xana u nga dyondza njhani leswi engetelekeke malunghana ni Mfumo wolowo? Xana u nga endla yini ku tiyisekisa leswaku u ta vuyeriwa eka mikateko ya wona? Xihloko xo hetelela eka swihloko leswi swa ntlhandlamano xi ta hlamula swivutiso sweswo.

^ ndzim. 5 Xihloko lexi xi kombetela eka ndlela leyi Yesu a titwaka ha yona sweswi hikuva wa hanya etilweni naswona ku sukela loko a tlhelele etilweni, swi le rivaleni leswaku Mfumo wu tshame wu ri wa nkoka eka yena.—Luka 24:51.

^ ndzim. 8 Leswaku u kuma rungula leri engetelekeke malunghana ni leswaku ha yini Xikwembu xi pfumelela ku xaniseka ka vanhu swa xinkarhana, vona ndzima 11 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Ha Yini Xikwembu Xi Pfumelela Vubihi Ni Ku Xaniseka?

Vubihi byi sungule njhani naswona ha yini Xikwembu xi byi pfumelele byi ya emahlweni? Xana ku xaniseka ku ta kala ku hela?