Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2014

 BIBELE YI HUNDZULA VUTOMI BYA VANHU

A Ndzi Nga Khathali Hi Vanhu Van’wana

A Ndzi Nga Khathali Hi Vanhu Van’wana
  • LEMBE RO VELEKIWA: 1951

  • TIKO LERI A HUMAKA EKA RONA: JARIMANI

  • MATIMU YAKWE: A A TIKUKUMUXA A TLHELA A TILAWULA

VUTOMI BYA MINA BYA KHALE:

Loko ndza ha ri ntsongo, ndyangu wa ka hina a wu tshama ekusuhi ni le Leipzig, eJarimani Vuxa, laha ku nga riki kule ngopfu ni le ndzilakaneni wa le Czech ni le Poland. Loko ndzi ri ni malembe ya tsevu, ndyangu wa ka hina wu rhurhele etikweni rin’wana hikwalaho ka ntirho wa tatana—ro sungula wu ye eBrazil kutani wu ya aEcuador.

Loko ndzi ri ni malembe ya 14 ndzi yisiwe ehositele ya le xikolweni eJarimani. Leswi vatswari va mina a va ri ekule eAmerika Dzonga, a ndzi fanele ndzi tikhathalela. Ndzi sungule ku tiyimela. A ndzi nga ri na mhaka ni ndlela leyi swiendlo swa mina a swi ta va khumba ha yona vanhu van’wana.

Loko ndzi ri ni malembe ya 17, vatswari va mina va tlhelele eJarimani. Eku sunguleni, a ndzi tshama ekaya ra vona. Kambe ku tilawula ka mina ku endle swi nga koteki leswaku ndzi hanyisana ni vatswari va mina. Loko ndzi ri ni malembe ya 18, ndzi suke ekaya.

Ndzi sungule ku ka ndzi nga ha eneriseki kutani ndzi sungula ku lava xikongomelo xa vutomi. Endzhaku ko xiya ndlela leyi vanhu va hanyaka ha yona ni tinhlengeletano, ndzi sungule ku tibyela leswaku nchumu wa nkoka lowu ndzi nga wu endlaka hi vutomi bya mina i ku famba ndzi valanga pulanete leyi yo saseka emahlweni ko va vanhu va yi onha.

Ndzi suke eJarimani, ndzi xava xithuthuthu kutani ndzi ya eAfrika. Swi nga si ya kwihi, ndzi boheke ku tlhelela eYuropa leswaku ndzi ya lunghisa xithuthuthu xa mina. Siku rin’wana endzhaku ka sweswo, ndzi tikume ndzi ri eribuweni ra le Portugal. Ndzi endle xiboho xo tshika ku famba hi xithuthuthu kutani ndzi sungula ku famba hi xikepe.

Ndzi joyine ntlawa wa vantshwa lava a va tiyimisele ku tluta va tsemakanya Lwandle ra Atlantic. Exikarhi ka vona a ku ri na Laurie loyi a ta va nsati wa mina ku nga ri khale. Ro sungula, hi tlute hi ya eswihlaleni swa Kharibiya. Kutani endzhaku ka loko hi tshame swa xinkarhana ePuerto Rico, hi tlhelele eYuropa. A hi ri ni ntshembo wo kuma xikepe lexi a hi ta xi cinca leswaku hi tshama eka xona. Kambe endzhaku ko lavisisa loku tekeke tin’hweti tinharhu ntsena, hi xitshuketa tsima ra hina ro lava xikepe ri fike emakumu. Ndzi sindzisiwe ku joyina vuthu ra vusocha ra le Jarimani.

Ndzi hete tin’hweti ta 15 evuthwini ra le Jarimani ra le matini. Hi nkarhi wolowo, mina na Laurie hi tekanile kutani hi tiyimisela ku ya emahlweni ni vutomi bya hina byo famba-famba. Emahlweni  ko va ndzi endla ntirho wa mina wa vusocha, hi xave miri wa xikepe. Loko ndzi ri karhi ndzi tirha evusocheni, hakatsongo-tsongo hi cince miri wa xikepe wu va xikepe lexitsongo xo tluta hi xona. A hi hlele ku tshama eka xona kutani hi hambeta hi valanga pulanete leyi yo saseka. Hi nkarhi lowu—endzhaku ka loko ndzi tirhe evusocheni kambe ndzi nga si heta ku cinca miri wa xikepe wu va kaya ra hina—hi kona hi hlanganeke ni Timbhoni ta Yehovha kutani hi sungula ku dyondza Bibele.

NDLELA LEYI BIBELE YI HUNDZULEKE VUTOMI BYA MINA HA YONA:

Eku sunguleni, a ndzi nga xi voni xilaveko xo cinca vutomi bya mina. A ndzi tekane ni wansati loyi se a ndzi tshama na yena naswona se a ndzi tshikile ku dzaha. (Vaefesa 5:5) Leswi a hi tiyimisele ku valanga misava, a ndzi anakanya leswaku ku va hi nyiketela vutomi bya hina eku valangeni ka ntumbuluko wo hlamarisa wa Xikwembu hakunene a ku ri nchumu wa nkoka.

Hambiswiritano, entiyisweni a ndzi fanele ndzi endla ku cinca—ngopfu-ngopfu vumunhu bya mina. Leswi a ndzi tikukumuxa ni ku tlhela ndzi tilawula, a ndzi dzike hi ku helela eka vuswikoti ni ku humelela ka mina. A ndzi nga khathali hi vanhu van’wana.

Siku rin’wana, ndzi hlaye Dyondzo ya Yesu ya le Ntshaveni leyi dumeke. (Matewu, tindzima 5-7) Eku sunguleni, a ndzi nga swi twisisi leswi Yesu a swi vuleke malunghana ni ku tsaka. Hi xikombiso, u vule leswaku va tsaka lava nga ni ndlala ni torha. (Matewu 5:6) A ndzi tivutisa leswaku swi tisa ku yini leswaku munhu loyi a pfumalaka a va ni ntsako. Loko ndzi hambeta ndzi dyondza, ndzi swi xiyile leswaku hinkwerhu hi ni xilaveko xa moya, kambe hi fanele hi titsongahata hi pfumela leswaku hi ni xilaveko xo tano emahlweni ko va hi xi enerisa. Swi hilaha Yesu a vuleke hakona a ku: “Va tsaka lava khathalaka hi xilaveko xa vona xa moya.”—Matewu 5:3.

Endzhaku ka loko hi sungule dyondzo ya hina ya Bibele eJarimani, mina na Laurie hi rhurhele eFurwa, kutani endzhakunyana hi ya eItaly. Kun’wana ni kun’wana laha a hi ya kona, a hi kuma Timbhoni ta Yehovha. Ndzi tsakisiwe swinene hi rirhandzu leri a ti kombisana rona ni vun’we. Ndzi swi xiyile leswaku hakunene Timbhoni i vamakwerhu emisaveni hinkwayo. (Yohane 13:34, 35) Hi ku famba ka nkarhi, mina na Laurie hi khuvuriwile hi va Timbhoni ta Yehovha.

Endzhaku ka loko ndzi khuvuriwile, ndzi hambete ndzi cinca vumunhu bya mina. Mina na Laurie hi endle xiboho xo tlutela eribuweni ra Afrika kutani hi tsemakanya Lwandle ra Atlantic hi ya eUnited States. Loko hi ri endzeni ka lwandle hi ri vambirhi ntsena exikepeni hi rhendzeriwe hi mati yo tala hi kona laha ndzi xiyeke leswaku a ndzi nchumu loko ndzi ringanisiwa ni Muvumbi wa hina lonkulu. Leswi a ndzi ri ni nkarhi wo tala endzeni ka lwandle ndzi wu tirhisele ku hlaya Bibele. Ndzi tsakisiwe swinene hi timhaka ta vutomi bya Yesu bya laha misaveni. A ri wanuna loyi a hetisekeke loyi a nga ni vuswikoti byo tlula bya vanhu hinkwavo, kambe a a nga si tshama a titlakusa. A nga ri na vutianakanyi kambe a rhangisa ku rhandza ka Tata wakwe wa le tilweni.

Ndzi swi xiyile leswaku a ndzi fanele ndzi rhangisa Mfumo wa Xikwembu evuton’wini bya mina

Loko ndzi ri karhi ndzi anakanyisisa hi xikombiso xa Yesu, ndzi swi xiyile leswaku a ndzi fanele ndzi rhangisa Mfumo wa Xikwembu evuton’wini bya mina ematshan’weni yo rhangisa swilo leswi ndzi lavaka ku swi endla kutani wona wu ta endzhaku. (Matewu 6:33) Loko mina na Laurie hi hetelele hi fike eUnited States, hi endle xiboho xo tshika ku famba-famba ni misava kutani hi tshama kwalaho ivi hi dzika eka vugandzeri bya hina.

NDLELA LEYI NDZI VUYERIWEKE HA YONA:

Emahlweni ko va ndzi tiyimela, hakanyingi a ndzi nga tiyiseki hi swiboho leswi a ndzi swi endla. Hambiswiritano, sweswi ndzi kume xihlovo xa ntiyiso xa vutlhari lexi ndzi kongomisaka. (Esaya 48:17, 18) Nakambe vutomi bya mina byi ve ni xikongomelo lexi a ndzi nga si tshama ndzi va na xona—ku gandzela Xikwembu ni ku pfuna van’wana leswaku va dyondza ha xona.

Hi ku tirhisa milawu ya Bibele, mina na Laurie hi byi tiyise swinene vukati bya hina. Nakambe hi katekisiwe hi nhwanyana wo saseka, loyi sweswi a tivaka Yehovha ni ku tlhela a n’wi rhandza.

A hi minkarhi hinkwayo swilo a swi hi fambela kahle evuton’wini. Kambe hi ku pfuniwa hi Yehovha, hi tiyimisele ku ka hi nga tshiki ku n’wi tirhela kumbe ku n’wi tshemba.—Swivuriso 3:5, 6.

DYONDZA SWO TALA

Ndyangu Wa Wena Wu Nga Va Ni Ntsako Hi Ndlela Yihi?

Yehovha ku nga Xikwembu lexi tsakeke u lava leswaku mindyangu yi va ni ntsako. Kuma ndzayo ya Bibele leyi pfunaka leyi yaka eka vavanuna, vavasati, vatswari ni vana.