Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JULY 2014

 BIBELE YI HUNDZULA VUTOMI BYA VANHU

A Ndzi Tshama Ndzi Ri Ni Xibamu

A Ndzi Tshama Ndzi Ri Ni Xibamu
  • LEMBE RO VELEKIWA: 1958

  • TIKO LERI A HUMAKA EKA RONA: ITALY

  • MATIMU YAKWE: XIRHO XA NTLAWA WA TINSULA-VOYA

VUTOMI BYA MINA BYA KHALE:

Ndzi velekiwe ndzi tlhela ndzi kulela eswimitanini swa le Rome, endhawini leyi a ku tshama swisiwana leswi tirhaka mintirho ya xiyimo xa le hansi. Vutomi a byi tika. A ndzi kalanga ndzi n’wi tiva mana wa mina, naswona a hi nga twanani na tatana. Loko ndzi ri karhi ndzi kula, ndzi dyondze ndlela yo tihanyisa hambiloko xiyimo xi tika.

Loko ndzi ri ni malembe ya khume se a ndzi sungule ku yiva. Loko ndzi ri ni malembe ya 12 ndzi suke ekaya ro sungula. Tatana u ndzi landze ko tala exitichini xa maphorisa a ndzi tlherisela ekaya. A ndzi tshamela ku holova ni vanhu—a ndzi ri ni madzolonga naswona a ndzi hlundzukela vanhu hinkwavo. Loko ndzi ri ni malembe ya 14, ndzi rhurhe ekaya. Ndzi sungule ku tirhisa swidzidziharisi ni ku hanya exitarateni. Leswi a ndzi nga ri na ndhawu yo etlela, a ndzi faya movha wa vanhu ndzi etlela eka wona naswona a ndzi vindzuka ximhangela ivi ndzi famba ndzi hlotana ni xihlovo xa mati leswaku ndzi ta kota ku hlamba.

Ndzi hundzuke khamba lerikulu, a ndzi wutlela vanhu minkwama ndzi tlhela ndzi tshova tiyindlu ni vusiku. Ndzi sungule ku va ni ndhuma yo biha naswona swi nga si ya kwihi ndzi rhambiwile leswaku ndzi joyina ntlawa lowu dumeke wa tinsula-voya, lowu endleke leswaku ndzi sungula ku tshova tibangi. Hikwalaho ka vurhena bya mina, hi ku hatlisa ndzi ve xirho lexi xiximekaka xa ntlawa wolowo. Minkarhi hinkwayo a ndzi nga xi siyi xibamu xa mina, a ndzi xi veka ehansi ka xikhigelo loko ndzi etlela. Madzolonga, swidzidziharisi, ku yiva, nhlambha ni ku tikhoma loko biha swi hundzuke mukhuva evuton’wini bya mina. Maphorisa a ma tshama ma ri eku ndzi hloteni. Ndzi pfaleriwe minkarhi yo hlayanyana naswona ndzi hete malembe ndzi ri ekhotsweni.

NDLELA LEYI BIBELE YI HUNDZULEKE VUTOMI BYA MINA HA YONA:

Siku rin’wana loko ndzi humesiwe ekhotsweni, ndzi endle xiboho xo endzela ndzisana ya mana wa mina ya xisati. Lexi a ndzi nga xi tivi hileswaku yena ni vana vakwe vambirhi a va ri Timbhoni ta Yehovha. Va ndzi rhambile leswaku ndzi famba na vona eminhlanganweni ya vona. Hikwalaho ko navela ku tiva, ndzi fambe na vona. Loko hi fika eHolweni ya Mfumo, ndzi sindzise  ku tshama ekusuhi ni nyangwa leswaku ndzi ta kota ku va veka tihlo vanhu lava nghenaka ni lava humaka. A ndzi fambe ni xibamu xa mina.

Nhlangano wolowo wu hundzule vutomi bya mina. Ndzi titwe onge a ndzi ri eka pulanete yin’wana. Vanhu va kona a va ri ni rirhandzu ni xinghana naswona a va n’wayitela loko va ndzi xeweta. Ndza ha yi tsundzuka kahle ndlela leyi Timbhoni ti ndzi khomeke ha yona. Hakunene, a ndzi ri endhawini leyi hambaneke swinene ni leyi a ndzi yi toloverile.

Ndzi sungule ku dyondza Bibele ni Timbhoni ta Yehovha. Loko ndzi ya emahlweni ndzi dyondza, ndzi ye ndzi swi xiya leswaku ndzi fanele ndzi yi cinca hi ku helela ndlela leyi a ndzi hanya ha yona. Ndzi yingise xitsundzuxo lexi tsariweke eka Swivuriso 13:20 lexi nge: “Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.” Ndzi swi xiyile leswaku ndzi fanele ku tihambanisa ni ntlawa wa tinsula-voya. A swi nga olovi ku endla tano, kambe hi ku pfuniwa hi Yehovha ndzi swi kotile.

A ku ri ro sungula evuton’wini bya mina ndzi kota ku lawula swiendlo swa mina

Ndzi tlhele ndzi basisa miri wa mina. Endzhaku ko endla matshalatshala, ndzi tshike ku dzaha fole ni ku tirhisa swidzidziharisi. Ndzi hungute misisi ya mina, ndzi cukumeta swingwavila swa mina swa le tindleveni naswona ndzi tshike nhlambha. A ku ri ro sungula evuton’wini bya mina ndzi kota ku lawula swiendlo swa mina.

Leswi a ndzi nga si tshama ndzi hlaya ni ku dyondza, a swi ndzi tikela swinene ku rhiya ndleve loko ndzi ri karhi ndzi dyondza Bibele. Hambiswiritano, loko ndzi ri karhi ndzi endla matshalatshala, hakatsongo-ntsongo ndzi sungule ku rhandza Yehovha naswona swin’wana swi sungule ku cinca endzeni ka mina—ndzi sungule ku kingindziwa hi ripfalo. Hakanyingi, a ndzi va ni langutelo leri hoxeke hi mina, a ndzi kanakana leswaku Yehovha u ta kala a ndzi rivalela swilo hinkwaswo swo biha leswi ndzi swi endleke. Enkarhini wolowo, ndzi chaveleleke swinene loko ndzi hlaya hi mhaka ya loko Yehovha a rivalela Hosi Davhida endzhaku ko endla swidyoho leswikulu.—2 Samuwele 11:1–12:13.

Ntlhontlho wun’wana lowu ndzi langutaneke na wona, a ku ri ku nghena hi yindlu ni yindlu ndzi chumayela van’wana tidyondzo leti a ndzi pfumela eka tona. (Matewu 28:19, 20) A ndzi chava leswaku ndzi ta hlangana ni munhu loyi ndzi n’wi twiseke ku vava kumbe loyi ndzi n’wi khunguvanyiseke hi ndlela yo karhi enkarhini lowu hundzeke. Kambe hakatsongo-ntsongo ndzi kote ku hlula ku chava. Ndzi kume ku eneriseka ka xiviri loko ndzi ri karhi ndzi pfuna van’wana ku dyondza hi Tata wa hina wa le tilweni loyi a rivalelaka hi ku helela.

NDLELA LEYI NDZI VUYERIWEKE HA YONA:

Ku dyondza hi Yehovha swi ponise vutomi bya mina. Vanghana va mina vo tala va khale va file kumbe va le khotsweni, kambe mina ndzi hanya vutomi lebyi enerisaka hakunene naswona ku ni vumundzuku lebyi ndzi byi languteleke hi mahlo-ngati. Ndzi dyondze ku titsongahata ni ku yingisa naswona ndzi kota ku lawula vukarhi bya mina. Hikwalaho, ndzi ni vuxaka lebyinene ni vanhu van’wana. Ndzi tekane na Carmen nsati wa mina wo saseka naswona hi tsakile. Havumbirhi bya hina, hi kuma ntsako lowukulu loko hi ri karhi hi pfuna van’wana leswaku va dyondza Bibele.

Sweswi ndzi tirha hi ku tshembeka naswona minkarhi yin’wana ntirho lowu ndzi wu endlaka wu katsa ni ku basisa tibangi kambe a ndza ha ti tshovi ndzi yiva.

DYONDZA SWO TALA

I Yini Dyondzo Ya Bibele?

Kuma tinhlamulo ta swivutiso malunghana ni nongonoko wa hina wa dyondzo ya mahala ya Bibele.