Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JULY 2014

 NHLOKO-MHAKA YA XIFUNENGETO | HA YINI SWILO SWO BIHA SWI HUMELELA VANHU VO LULAMA?

Ku Andza Ka Vubihi

Ku Andza Ka Vubihi

Smita, * wansati wa le Dhaka, eBangladesh loyi a a ri ni malembe ya 35, a a tiviwa hi ku va ni rirhandzu a tlhela a khathala hi vanhu. Vanhu a va n’wi tiva tanihi wansati loyi a gingiritekaka naswona a tsakeke, loyi a a lava ku dyondzisa van’wana leswi a swi dyondzeke hi Xikwembu. Vandyangu wakwe ni vanghana, va tsemeke nhlana loko Smita a hlaseriwa hi vuvabyi lebyi n’wi dlayeke ku nga si hela ni vhiki.

James ni nsati wakwe ku nga mpatswa lowu nga emalembeni ya va-30, a va tiveka hi ku va ni vumunhu byo fana ni bya Smita. Siku rin’wana hi ximun’wana, va endzele vanghana va vona lava a va tshama eribuweni ra le vupela-dyambu bya United States. A va ha tlhelelanga ekaya ra vona le New York. Loko va ha ri kwale, va file eka mhangu leyi chavisaka ya movha, leswi endleke leswaku varhandziwa va vona swin’we ni vatirhi-kulobye va sala va tsemeke nhlana swinene.

A swi lavi u kala u ya ekule leswaku u kota ku vona ku andza ka vubihi ni ku xaniseka loku nga kona namuntlha. Tinyimpi ti dlaya vaaki swin’we ni masocha. Vugevenga ni madzolonga swi dyisa vanhu lava nga riki na nandzu mbitsi. Timhangu leti dlayaka ni mavabyi lama siyaka vanhu va lamarile, swi humelela vanhu hinkwavo ku nga khathariseki malembe ni xiyimo xa vona evuton’wini. Timhangu ta ntumbuluko a ti hlawuli ti dlaya vanhu hinkwavo. Xihlawuhlawu ni vuhomboloki swi kumeka emisaveni hinkwayo. Kumbexana na wena u tshame u langutana ni maxangu.

Swi tolovelekile ku vutisa swivutiso swo fana ni leswi:

  • Ha yini swilo swo biha swi humelela vanhu lavanene?

  • Xana hi fanele hi sola Xikwembu hi swilo swo tano?

  • Xana makhombo ma va kona hi xiwelo kumbe ma vangiwa hi vanhu?

  • Xana swi nga va swi vangiwa hi Karma, ku nga ku xaniseka hikwalaho ka swiendlo leswi munhu a swi endleke enkarhini lowu hundzeke?

  • Loko ku ri leswaku ku ni Xikwembu xa matimba hinkwawo, ha yini xi nga sirheleli vanhu vo lulama leswaku va nga weriwi hi makhombo?

  • Xana vubihi ni ku xaniseka swi ta kala swi hela?

Leswaku hi kota ku hlamula swivutiso leswi, hi fanele hi sungula hi kuma tinhlamulo ta swivutiso swimbirhi swa nkoka leswi nge: Ha yini swilo swo biha swi humelela vanhu hinkwavo? I yini leswi Xikwembu xi nga ta swi endla?

^ ndzim. 3 Mavito ma cinciwile.