Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  July 2014

Tinhlamulo Ta Swivutiso Swa Bibele

Tinhlamulo Ta Swivutiso Swa Bibele

Ha yini hi fanele hi khongela?

Yehovha Xikwembu u lava leswaku hi titwa hi ntshunxekile ku vulavula na yena hi swilo leswi hi karhataka. (Luka 18:1-7) Wa hi yingisela hikuva wa hi rhandza. Leswi Tata wa hina wa le tilweni a hi rhambaka hi musa leswaku hi khongela eka yena, ha yini hi nga xi amukeli xirhambo xa yena?—Hlaya Vafilipiya 4:6.

Xikhongelo a ko va ntsena ndlela yo kombela mpfuno. Kambe xikhongelo xi hi pfuna leswaku hi tshinela eka Xikwembu. (Pisalema 8:3, 4) Loko hi tshamela ku tiphofula eka Xikwembu, hi ta va ni vuxaka lebyikulu na xona.—Hlaya Yakobo 4:8.

Hi fanele hi khongela njhani?

Loko hi khongela, Xikwembu a xi lavi leswaku hi tirhisa marito yo lava ku voniwa kumbe hi nhlokohata swikhongelo swa hina. Nakambe a hi fanelanga hi khongela hi ndlela yo karhi yo hlawuleka. Yehovha u hi rhamba leswaku hi khongela swi huma embilwini. (Matewu 6:7) Hi xikombiso, eIsrayele wa khale Hana u khongele hi xiyimo xa ndyangu lexi a xi nga n’wi dyisi byi rhelela. Hi ku famba ka nkarhi, loko ku rila ka yena ku hundzuke ntsako, u nkhense Xikwembu swi huma embilwini.—Hlaya 1 Samuwele 1:10, 12, 13, 26, 27; 2:1.

Hakunene hi ni lunghelo ro tsakisa swonghasi! Hi nga tivisa Muvumbi swilo leswi hi karhataka. Nakambe hi nga n’wi dzunisa ni ku n’wi nkhensa hikwalaho ka leswi a hi endlelaka swona. A hi fanelanga hi ri tekela hansi lunghelo leri ro hlawuleka.—Hlaya Pisalema 145:14-16.