Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  June 2014

Hi Wihi Ntshembo Lowu Nga Kona Hi Maxaka Ya Mina Lama Feke?

Hi Wihi Ntshembo Lowu Nga Kona Hi Maxaka Ya Mina Lama Feke?

EMALEMBENI lama hundzeke ku ve ni nhloko-mhaka leyi tsakisaka eka phepha-hungu ra The Chosun Ilbo ra le Korea. A yi ku: “‘Shim Cheong Wo Lulama,’ Loyi A A Nga Tivi Nchumu Hi Yesu—Xana U Ye eTiheleni?”

Nhloko-mhaka leyi a yi koka rinoko hikuva Shim Cheong a ku ri nhwanyana wa le Korea loyi a a rhandzeka naswona a dumile, loyi hi ku tirhandzela a khathaleleke tata wakwe loyi a a ri bofu. Loko malembe ma ri karhi ma famba, a ku vulavuriwa kahle ha yena. Entiyisweni, eKorea a a tekiwa tanihi xikombiso lexinene lexi faneriwaka hi ku tekeleriwa.

Mhaka ya leswaku u fe a nga ri Mukreste la khuvuriweke naswona u ta hisiwa etiheleni, a yi karhata vanhu vo tala yi tlhela yi nga va dyisi byi rhelela. Va vula leswaku mhaka leyi a yi fanele yi endleke khale, rungula ra Kreste ri nga si chumayeriwa endhawini ya ka vona.

Eka nhloko-mhaka yoleyo, ku vulavurisaniwe ni mufundhisi, a vutisiwa leswaku xana lava feke va nga kumanga nkarhi wo dyondza hi Yesu va ya etiheleni? U hlamule a ku: “A hi swi tivi. Hi anakanya leswaku ku fanele ku ri ni ndlela yo karhi leyi Xikwembu xi nga va tsetselelaka ha yona [vanhu vo tano].”

XILAVEKO XA KU PONISIWA

The New Catholic Encyclopedia yi ri: “Ku khuvuriwa i ka nkoka leswaku munhu a ponisiwa. Hilaha Kreste a vuleke hakona, loko munhu a nga velekiwanga ra vumbirhi hi mati ni Moya Lowo Kwetsima, a nge ngheni eMfun’weni wa Xikwembu (Jn 3.5).” Leswi swi endle van’wana va tshemba leswaku lava feke va nga khuvuriwanga, va ta ya etiheleni kumbe va xaniseka hi ndlela yo karhi.

Hambiswiritano, ku ni van’wana vo tala lava vonaka dyondzo yoleyo yi nga ri ntiyiso. Ku ni vanhu va timiliyoni lava feke va nga ri na mhaka ni Bibele. Xana va fanele va xanisiwa hilaha ku nga heriki? Xana Bibele yi ri yini hi mhaka leyi?

NTSHEMBO LOWU NGA EBIBELENI

Bibele yi swi veka erivaleni leswaku Xikwembu a xi va honisi vanhu lava hanyeke va nga tivi milawu ya Bibele. Mintirho 17:30 yi hi tiyisekisa yi ku: “Xikwembu xi yi honisile minkarhi yo tano yo pfumala vutivi.” Loko swi ri tano, hi wihi ntshembo lowu nga kona eBibeleni hi lava feke va nga kumanga nkarhi wo dyondza hi Xikwembu?

Xi vula yini xitshembiso xa Yesu lexi nge, “U ta va na mina eParadeyisini”?

Nhlamulo yi nga kumeka eka leswi Yesu a swi byeleke wanuna wa xigevenga loyi a feleke etlhelo ka yena. Wanuna loyi u te eka Yesu: “U ndzi tsundzuka loko u nghena eMfun’weni wa wena.” Xana Yesu u hlamule a ku yini? U te: “Ndzi tiyisile namuntlha ndzi ri eka wena, u ta va na mina eParadeyisini.”—Luka 23:39-43.

Xana Yesu a a tshembisa wanuna loyi leswaku u ta nghena etilweni? Doo! Wanuna loyi a a nga “velekiwanga ra vumbirhi” hi mati ni moya ku nga swilo leswi endlaka leswaku munhu a nghena eMfun’weni wa matilo. (Yohane 3:3-6) Kambe Yesu a a tshembisa xigevenga lexi leswaku xi ta tlhela xi hanya, eParadeyisini. Leswi wanuna loyi a a ri Muyuda, swi nga endleka leswaku a a yi tiva mhaka ya Paradeyisi ya laha misaveni ku nga ntanga wa Edeni lowu hlamuseriweke ebukwini yo sungula ya Bibele. (Genesa 2:8) Xitshembiso xa Yesu malunghana ni ku pfuxiwa ka vafi eParadeyisini emisaveni, xi n’wi khutazile.

Entiyisweni, Bibele yi tshembisa leswaku “ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) “Lava nga lulamangiki” hi lava a va nga hanyi hi milawu ya Xikwembu hikuva a va nga yi tivi milawu ya xona. Yesu u ta pfuxa xigevenga lexi nga lulamangiki lexi vulavuleke na yena swin’we ni vanhu va ntsandza vahlayi lava feke va nga hanyi hi milawu ya Xikwembu. Endzhaku ka sweswo emisaveni leyi nga Paradeyisi, va ta dyondzisiwa milawu ya Xikwembu va tlhela va kuma nkarhi wo tikombisa leswaku va xi rhandza hi ku va va yingisa milawu ya xona.

 LOKO LAVA NGA LULAMANGIKI VA PFUXIWA

Loko lava nga lulamangiki va pfuxiwa, xana va ta avanyisiwa hi ku ya hi swiendlo swa vona swa nkarhi lowu hundzeke? Doo! Varhoma 6:7 yi ri: “Loyi a feke, xidyoho xa yena xi hlanguriwile.” Lava nga lulamangiki va ta va va hakele swidyoho swa vona hi ku fa. Va ta avanyisiwa hi ku ya hi leswi va nga ta swi endla endzhaku ka loko va pfuxiwile, ku nga ri leswi va swi endleke va nga si fa. Xana va ta vuyeriwa njhani?

Endzhaku ko pfuxiwa ka vafi, lava nga lulamangiki va ta kuma nkarhi wo dyondza milawu ya Xikwembu leyi nga ta tiviwa loko ku pfuriwa tibuku-nsongwa to fanekisela. Endzhaku ka sweswo va ta avanyisiwa “hi ku ya hi swiendlo swa vona” swi ya hileswaku va yingisa milawu ya Xikwembu kumbe a va yi yingisi. (Nhlavutelo 20:12, 13) Eka vo tala lava nga lulamangiki, ku ta va ku ri ro sungula va kuma nkarhi wa ku dyondza ni ku endla ku rhandza ka Xikwembu leswaku va kuma vutomi lebyi nga heriki emisaveni.

Dyondzo leyi ya Bibele yi pfune vanhu vo tala leswaku va tlhela va va ni ripfumelo eka Xikwembu. Yeong Sug i un’wana wa vona. U kule a ri Mukhatoliki loyi a hisekaka. Swirho swin’wana swa ndyangu wa ka vona a swi ri vafundhisi. Leswi a a lava ku va nani, u ye endlwini ya tinani. Hi ku famba ka nkarhi u sukile kwalaho hikuva u hetiwe matimba hi leswi a swi voneke swi endleka. Ku tlula kwalaho, a a nga ha pfumeli eka dyondzo ya tihele hikuva a vona mhaka ya ku xanisa vanhu etiheleni yi nga kombisi rirhandzu.

Mbhoni yin’wana ya Yehovha yi n’wi kombe marito lawa eBibeleni: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo, naswona a va ha ri na hakelo.” (Eklesiasta 9:5) Mbhoni yoleyo yi n’wi pfunile a xiya leswaku maxaka ya yena lama feke a ma le ku xanisiweni etiheleni. Kambe ma etlele eku feni naswona ma rindzele ku pfuxiwa.

Leswi a a tiva leswaku vanhu vo tala a va si tshama va twa ntiyiso lowu wa le Bibeleni, Yeong Sug u ma teke ma ri ya nkoka marito ya Yesu lama nga eka Matewu 24:14 lama nge: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” Sweswi i muchumayeri wa mahungu lamanene naswona u burisana ni van’wana hi ntshembo lowu tsakisaka lowu kumekaka eBibeleni.

“XIKWEMBU A XI YI HI NGHOHE”

Bibele yi vula leswaku “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Lebyi i vululami lebyi hi nga byi langutelaka eka Xikwembu lexi ‘rhandzaka ku tshembeka ni vululami.’—Pisalema 33:5.