Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  May 2014

Xana A Wu Swi Tiva?

Xana A Wu Swi Tiva?

Ha yini ku dlayiwa ka swigevenga a swi katsa ni ku va swi tshoviwa milenge?

Malunghana ni ku dlayiwa ka Yesu swin’we ni swigevenga swimbirhi etimhandzini ta nxaniso, rungula leri kumekaka eka Evhangheli ri ri: ‘Vayuda va kombele Pilato leswaku ku tshoviwa milenge ya vona kutani mintsumbu yi susiwa.’—Yohane 19:31.

Nawu wa Xiyuda a wu vula leswaku ntsumbu wa xigevenga, lowu a wu ta hayekiwa emhandzini endzhaku ka loko xi dlayiwile ‘wu nga tshuki wu tshama vusiku hinkwabyo emhandzini.’ (Deteronoma 21:22, 23) Vayuda a va tirhisa nawu lowu Varhoma a va wu tirhisa eka vanhu lava va va dlayeke hi ku va hayeka emhandzini. Ku tshova milenge ya vavanuna lava a swi ta endla leswaku va hatla va fa, kutani va lahliwa Savata yi nga si sungula nimadyambu.

Eka swiendlakalo swo tala swa ku dlayiwa ka vanhu, munhu loyi a voniweke nandzu a a beleriwa mavoko ni milenge emhandzini hi swipikiri. Loko mhandzi yi yimisiwile, a a ta siyiwa a hayekiwile a ri karhi a twa ku vava swinene, miri wakwe wu ri karhi wu tikela swipikiri leswi a beleriweke ha swona. Leswaku munhu yoloye a kota ku hefemula a a fanele a sima hi swipikiri leswi a beleriweke ha swona. Loko marhambu ya milenge yakwe ma tshoveka, a a nga ha ta swi kota ku endla tano. Leswi a a tsandzeka ku hefemula a swi endla leswaku a hatla a fa.

Swipelupelu a swi tirhisiwa njhani enyimpini khale?

Xipelupelu i tlhari leri Davhida a ri tirhiseke ku dlaya Goliyadi lowa xihontlovila. Swi nga endleka leswaku Davhida u dyondze ku tirhisa tlhari leri a ha ri mufana loko a ri karhi a risa.—1 Samuwele 17:40-50.

Xifaniso lexi kovotliweke xa Vaasiriya lava khomeke swipelupelu va hlasela muti lowu tiyisiweke wa Vayuda

Xifaniso xa xipelupelu xi kumeka eka swifaniso swa vutshila swa le Egipta ni swa le Asiriya swa le minkarhini ya ku tsariwa ka Bibele. Tlhari leri a ri ri ni xikhwama xa dzovo kumbe lapi leri rhungeleriweke eka tintambhu timbirhi. Mutirhisi wa xipelupelu a a ta hoxa ribye ra xirhendzevutana leri anameke ku sukela eka 5 ku ya eka 7,5 wa tisentimitara exikhwameni xexo naswona ri tika kwalomu ka 250 wa tigiramu. A a ta ndzulukisa xipelupelu ehenhla ka nhloko yakwe kutani a tshika ntambhu yin’we leswaku ribye ri ta kota ku tsutsuma hi rivilo lerikulu naswona ri kongome laha a lavaka ri ya kona.

Vayimburi va le Vuxa-xikarhi va kume maribye yo tala lawa a ma tirhisiwa eka xipelupelu etinyimpini ta khale. Swi nga ha endleka leswaku masocha lawa a ma ri ni vutshila a ma ndzulukisa maribye hi rivilo leri endlaka 160 ku ya eka 240 wa tikhilomitara hi awara. Swidyondzi a swi pfumelelani na yona mhaka ya leswaku xipelupelu a xi aname ku ringana ni vurha kambe xipelupelu a ku ri tlhari leri nga ni khombo.—Vaavanyisi 20:16.