Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA MAY 2014

 BULO NI MUAKELANI

Xana Timbhoni Ta Yehovha Ta Pfumela Eka Yesu?

Xana Timbhoni Ta Yehovha Ta Pfumela Eka Yesu?

Bulo leri landzelaka i bulo leri tolovelekeke leri Mbhoni ya Yehovha yi nga ha vaka na rona ni muakelani. A hi anakanyeni hi Mbhoni leyi vuriwaka Anthony leyi endzeleke wanuna la vuriwaka Tim.

I SWA NKOKA KU VA NI RIPFUMELO EKA YESU

Anthony: Xewani Tim, ndzi tsakela ku ku vona nakambe.

Tim: Na mina ndzi tsakela ku ku vona.

Anthony: Ndzi ku tisele Xihondzo xo Rindza ni Xalamuka! swa sweswinyana. Ndza tshemba leswaku u ta swi tsakela swihloko leswi nga eka timagazini leti.

Tim: Ndza nkhensa. Entiyisweni, ndzi tsakile hi leswi u teke namuntlha hikuva ku ni xivutiso lexi ndzi lavaka ku ku vutisa xona.

Anthony: Hi swona u nga ndzi vutisa.

Tim: Siku rin’wana, a ndzi ri karhi ndzi vulavula ni mutirhi-kulorhi. Ndzi n’wi byele hi minkandziyiso leyi u ndzi nyikeke yona ni ndlela leyi yi tsakisaka ha yona. U vule leswaku a ndzi fanelanga ndzi yi hlaya hikuva Timbhoni ta Yehovha a ti pfumeli eka Yesu. Xana sweswo i ntiyiso? Ndzi n’wi byele leswaku ndzi ta ku vutisa loko u tlhela u ndzi endzela.

Anthony: Ndza tsaka leswi u vutiseke mina ndzi nga Mbhoni ya Yehovha ematshan’weni yo vutisa munhu un’wana. I swinene ku vutisa n’wini wa mhaka.

Tim: Na mina ndzi vone swi antswa ku endla tano.

Anthony: Ntiyiso wa mhaka hileswaku Timbhoni ta Yehovha ta pfumela eka Yesu. Ku kombisa ripfumelo eka Yesu swi ta endla leswaku hi ponisiwa.

Tim: Na mina a ndzi anakanya tano kambe endzhaku ka loko mutirhi-kulorhi a ndzi byele leswaku a mi pfumeli eka Yesu, swi endle ndzi lava ku tiva. A hi si tshama hi bula hi mhaka leyi.

Anthony: Ndzi kombela ku ku komba tindzimana tin’wana ta Bibele leti kombisaka leswaku i swa nkoka ku kombisa ripfumelo eka Yesu. Leti i tindzimana leti Timbhoni ta Yehovha ti ti tirhisaka loko ti chumayela.

Tim: U nga ndzi komba.

Anthony: A hi sungule hi hlaya marito lawa Yesu a ma vuleke eka Yohane 14:6. Laha Yesu a a burisana ni un’wana wa vaapostola vakwe. Ha hlaya: “Yesu a ku eka yena: ‘Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.’” Hi ku ya hi ndzimana leyi, hi yihi ndlela yin’we ntsena yo tshinela eka Tatana?

Tim: Hi nga tshinela hi vito ra Yesu.

Anthony: U be kona, Timbhoni ta Yehovha ti pfumela sweswo. I nge ndzi ku vutisa: Xana wena u tiva leswaku loko munhu a khongela eka Xikwembu u fanele a tirhisa vito ra mani?

Tim: Ra Yesu.

Anthony: Ndzi pfumelelana na wena. Hi yona mhaka leyi minkarhi hinkwayo loko ndzi khongela ndzi gimetaka hi ku vula leswaku hi vito ra Yesu. Swi tano ni hi swikhongelo hinkwaswo swa Timbhoni ta Yehovha.

Tim: Ndzi tsakela ku tiva mhaka leyi.

Anthony: Tsalwa rin’wana leri hi nga ri hlayaka i Yohane 3:16. Ndzimana yoleyo yi katsakanya hinkwaswo leswi nga tsariwa malunghana ni vutomi bya Yesu ni ntirho wakwe wo chumayela loko a ha ri laha misaveni. U nga tsakela ku yi hlaya?

Tim: Ina. Yi ri: “Hikuva Xikwembu xi rhandze misava swinene xi kala xi nyikela hi N’wana wa  xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”

Anthony: Inkomu. Xana u yi toloverile ndzimana leyi?

Tim: Ina, ndzi yi twe ko tala naswona ndzi tala ku yi vona yi tsariwile etindhawini tin’wana.

Anthony: Ndzimana leyi yi tiviwa ngopfu. Xiya leswi Yesu a swi vuleke. U vule leswaku rirhandzu leri Xikwembu xi nga na rona ri endla leswaku vanhu va va ni ntshembo wo kuma vutomi lebyi nga heriki, kambe hi fanele hi endla yini leswaku hi byi kuma?

Tim: Hi fanele hi kombisa ripfumelo.

Anthony: Hi swona, hi ri kombisa eka N’wana loyi a tswariweke a ri yexe, ku nga Yesu Kreste. Mhaka ya leswaku ku kombisa ripfumelo eka Yesu yi endla vanhu va va ni ntshembo wa vutomi lebyi nga heriki, yi kumeka eka tluka ra vumbirhi ra magazini lowu wa Xihondzo xo Rindza lowu ndzi ku teleke na wona. Xin’wana xa swikongomelo swa magazini lowu, i ku “endla hi va ni ripfumelo eka Yesu Kreste, loyi a hi feleke leswaku hi ta kuma vutomi lebyi nga heriki naswona sweswi i Hosi eMfun’weni wa Xikwembu.”

Tim: Hakunene! A ndzi nga swi tivi leswaku swi tsariwile ni le ka magazini wa n’wina leswaku Timbhoni ta Yehovha ta pfumela eka Yesu.

Anthony: I ntiyiso.

Tim: Ha yini vanhu va vula leswaku a mi pfumeli eka Yesu?

Anthony: Ku ni swivangelo swo tala leswi endlaka va vula tano. Minkarhi yin’wana va vula tano hileswi va tweke vanhu van’wana. Kumbe swi nga ha endleka va dyondzisiwe sweswo hi vafundhisi va vona.

Tim: Ndzi ehleketa leswaku swi nga ha endleka leswaku vanhu van’wana va vula leswaku a mi pfumeli eka Yesu hileswi mi tivulaka Timbhoni ta Yehovha ku nga ri Timbhoni ta Yesu.

Anthony: Kumbe hi swona leswi endlaka va vula tano.

Tim: Ha yini mi vulavula ngopfu hi Yehovha?

“NDZI VA TIVISE VITO RA WENA”

Anthony: Hi pfumela leswaku i swa nkoka ku tirhisa vito ra Xikwembu leri nge Yehovha, hilaha n’wana wa xona Yesu a endleke hakona. Twana leswi Yesu a swi vuleke loko a khongela eka Tata wakwe. Marito ya kona ma kumeka eka Yohane 17:26. Ndzi kombela u yi hlaya.

Tim: Yi ri: “Ndzi va tivise vito ra wena naswona ndzi ta ri tivisa, leswaku rirhandzu leri u ndzi rhandzeke ha rona ri va eka vona kutani mina ndzi va ni vun’we na vona.”

Anthony: Inkomu. Xiya leswaku Yesu u vule leswaku u va tivise vito ra Xikwembu. U ehleketa leswaku u swi endle njhani sweswo?

Tim: A ndzi swi tivi.

Ku kombisa ripfumelo eka Yesu swi ta endla leswaku hi ponisiwa

Anthony: Kumbexana hi nga hlaya tsalwa rin’wana leri nga hi pfunaka ku twisisa mhaka leyi. Tsalwa ra kona i Mintirho 2:21. Yi hlayeka hi ndlela leyi: “Un’wana ni un’wana la vitanaka vito ra Yehovha u ta ponisiwa.” Ndza tshemba wa pfumela leswaku loko ku ri leswaku ku vitana vito ra Yehovha hi swona leswi nga ta endla leswaku hi ponisiwa, a swi kanakanisi leswaku Yesu a a yi tiva mhaka leyi.

Tim: I ntiyiso wolowo.

Anthony: Ku ponisiwa i xivangelo lexi a xi endla swi va swa nkoka eka Yesu ku va valandzeri vakwe va tiva ni ku tirhisa vito ra Xikwembu. Naswona lexi i xin’wana xa swivangelo leswikulu leswi endlaka hi vulavula ngopfu hi Yehovha. Hi swi teka swi ri swa nkoka ku endla leswaku vito ra Xikwembu ri tiviwa ni ku pfuna va’wana leswaku va ri tirhisa.

Tim: Kambe hambileswi vanhu va nga ri tiviki vito ra Xikwembu kumbe ku ri tirhisa hi ku kongoma, loko va vulavula hi Xikwembu va swi tiva leswaku va vulavula hi mani.

Anthony: Sweswo swi nga va ntiyiso. Kambe, loko Xikwembu xi hi byela vito ra xona, xi endle leswaku swi hi olovela ku tshinela eka xona.

 Tim: Hi ndlela yihi?

Anthony: Hi xikombiso, a swi nga bohi leswaku hi tiva vito ra Muxe. A hi ta n’wi tiva tanihi wanuna loyi a hambaniseke Lwandle ro Tshwuka kumbe wanuna loyi a a nyikiwe Milawu ya Khume. Swi tano ni hi Nowa—ha yini hi tiva vito rakwe? A a ta tiviwa tanihi wanuna loyi a akeke ngalava leswaku a ponisa ndyangu wakwe ni swiharhi. Hambi ku ri Yesu Kreste a a ta tiviwa tanihi wanuna loyi a teke hi le tilweni naswona a feleke swidyoho swa hina, a swi tano ke?

Tim: Swi tano.

Anthony: Hikwalaho, Xikwembu xi endle leswaku hi tiva un’wana ni un’wana wa vona hi vito. Ku va hi tiva mavito ya vona swi hi byela swo tala hi leswi va swi endleke. Hambileswi hi nga si tshamaka hi hlangana na Muxe, Nowa kumbe Yesu, ku tiva mavito ya vavanuna lava swi endla leswaku hi va teka va ri va xiviri.

Tim: A ndzi si tshama ndzi anakanya hi ndlela yoleyo kambe se ndza swi twisisa.

Anthony: Xexo hi xona xivangelo lexi endlaka Timbhoni ta Yehovha ti ri tirhisa ngopfu vito ra Xikwembu. Hi lava ku pfuna vanhu va va ni ripfumelo eka Yehovha Xikwembu, va n’wi teka tanihi Munhu wa xiviri naswona va va ni vuxaka na yena. Nakambe, hi va hlamusela hi swilo leswi Yesu a swi endleke leswaku hi ponisiwa. Kumbexana hi nga hlaya tsalwa rin’wana leri seketelaka mhaka leyi.

Tim: Hi nga ri hlaya.

Anthony: Hi hlaye Yohane 14:6. Tsundzuka, Yesu u vule leswaku hi yena “ndlela ni ntiyiso ni vutomi.” Sweswi hi ta hlaya Yohane 14:1. Ndzi kombela u hlaya xiphemu xo hetelela xa ndzimana leyi, hi twa marito lawa Yesu a ma vuleke.

Tim: Yi ri: “Kombisani ripfumelo eka Xikwembu, mi kombisa ripfumelo ni le ka mina.”

Anthony: U hlaye kahle. Xana ku va ni ripfumelo swi vula leswaku hi nga hlawula ku pfumela eka Yehovha kumbe Yesu?

Tim: E-e. Yesu u te hi fanele hi pfumela eka yena ni le ka Yehovha.

Anthony: U hlamule kahle. Ndza tshemba na wena u ta pfumelelana na mina leswaku a swi enelanga ku vula ntsena leswaku hi ni ripfumelo eka Xikwembu na Yesu. Entiyisweni hi fanele hi swi kombisa hi mintirho leswaku hi ni ripfumelo.

Tim: U tiyisile.

Anthony: Kambe munhu a nga swi kombisa njhani leswaku u ni ripfumelo eka Xikwembu ni le ka Yesu? Enkarhini lowu taka hi ta bula hi xivutiso xexo. *

Tim: Ndzi nga swi tsakela.

Xana ku ni mhaka yo karhi ya le Bibeleni leyi u nga yi twisisiki? Xana u nga tsakela ku tiva leswi Timbhoni ta Yehovha ti pfumelaka eka swona? Loko swi ri tano, u nga kanakani ku vutisa un’wana wa Timbhoni ta Yehovha. U ta swi tsakela ku bula na wena hi mhaka yoleyo.

^ ndzim. 60 Leswaku u kuma rungula leri engetelekeke, hlaya ndzima 12 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Xana Bibele Yi Dyondzisa Yini Hakunene?

Ku Hanya Hi Ndlela Leyi Tsakisaka Xikwembu

Swa koteka ku hanya hi ndlela leyi tsakisaka Yehovha. Entiyisweni, u nga va munghana wakwe.