Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA APRIL 2014

U Nga Swi Kota Ku Hlula Ndzingo!

U Nga Swi Kota Ku Hlula Ndzingo!

“A ndzi nga tiyimiselanga ku vona swilo swa timhaka ta masangu kambe ndzi nghene eka Internet ivi hi xitshuketa ku humelela xinavetiso. Ndzi lo tikuma ndzi xi pfurile.”—CODY. *

“Ntombhi yo xonga leyi a ndzi tirha na yona yi sungule ku ndzi tsakela. Siku rin’wana yi vule leswaku hi famba swin’we ehotela hi ya ‘hungasana.’ A ndzi swi tiva kahle leswaku yi vula yini.”—DYLAN.

“VAN’WANA va vula leswaku ndzingo i nchumu lowu tsakisaka. Kasi van’wana va wu teka wu ri nala loyi va nga endlaka xin’wana ni xin’wana leswaku va n’wi hlula. Wena u ri yini? Loko u langutane ni ndzingo, xana u fanele u wu pfumelela wu ku hlula kumbe u fanele u lwela ku wu hlula?

I ntiyiso leswaku a hi miringo hinkwayo leyi nga ku nghenisaka ekhombyeni. Nchumu wutsongo wo fana ni ku yiva makokisi a wu nge ku onheli vumundzuku bya wena. Kambe ku hluriwa hi miringo yin’wana ngopfu-ngopfu leyi nga endlaka leswaku u tikhoma hi ndlela yo biha hi swa masangu, swi nga va ni vuyelo byo biha swinene. Bibele yi ri: ‘Un’wana ni un’wana la endlaka vuoswi . . . u ni mbilu yo hunguka; loyi a swi endlaka u lovisa moya-xiviri wakwe.’—Swivuriso 6:32, 33.

Loko u ringeka ku endla swilo swo biha, xana u ta endla yini? Bibele yi ri: “Xikwembu xi rhandza leswaku mi kwetsimisiwa, mi papalata vumbhisa; leswaku un’wana ni un’wana wa n’wina a tiva ndlela yo lawula xibya xakwe hi ku kwetsima ni ku xiximeka.” (1 Vatesalonika 4:3, 4) U nga swi kota njhani ku hlula ndzingo? Xiya magoza lamanharhu lama nga ku pfunaka.

Goza 1: Lawula Mahlo Ya Wena

Loko hi hlalela swifaniso leswi pfuxaka ku navela ku endla swa masangu, hi ta navela ku swi endla. Loko Yesu a vulavula hi ndlela leyi ku vona ni ku navela swi fambisanaka ha yona, u te: “Un’wana ni un’wana la tshamelaka ku languta wansati lerova a n’wi navela, ana se u endle vuoswi na yena embilwini yakwe.” Loko a thathela u te: “Loko tihlo rero ra wena ra xinene ri ku khunguvanyisa, ri xokole u ri cukumeta ekule na wena.” (Matewu 5:28, 29) Xana Yesu a a vula yini? Leswaku hi kota ku hlula ndzingo, hi fanele hi tiyimisela ku papalata hi ku helela ku hlalela swilo leswi pfuxaka ku navela ku endla timhaka ta masangu.

Loko u vona swilo swa timhaka ta masangu, swi papalate hi ku hatlisa

Hi xikombiso: A hi nge u tikume u langute ndzilo lowu dlayaka mahlo wa muchini wo hiselela tinsimbi. Xana a wu ta ya emahlweni u wu honolela? Nikatsongo.  A wu ta languta etlhelo kumbe u tipfala mahlo. Hilaha ku fanaka, loko wo tshuka u vona swilo swa timhaka ta masangu, ku nga ha va etibukwini, eka switirhisiwa swa elektroniki kumbe u swi vona hi ku kongoma—swi papalate hi ku hatlisa. Sirhelela mianakanyo ya wena. Juan, loyi khale a a godzomberiwe hi ku hlalela swilo swa timhaka ta masangu u ri: “Minkarhi yo tala loko ndzi vona wansati wo saseka, ndza ringeka leswaku ndzi n’wi languta kambirhi kanharhu. Kutani ndzi tibyela leswaku a ndzi lavi ku n’wi languta naswona ndzi namba ndzi khongela eka Yehovha. Loko ndzi heta ku khongela, ndzingo wolowo wu namba wu hela.”—Matewu 6:9, 13; 1 Vakorinto 10:13.

Xiya xikombiso xa wanuna wo tshembeka ku nga Yobo, loyi a nga te: “Ndzi endle ntwanano ni mahlo ya mina. Xana ndzi nga n’wi langutisisa ku yini nhwana?” (Yobo 31:1) Ha yini na wena u nga endli xiboho lexi fanaka?

Ringeta leswi: Loko u tikuma u langute swifaniso swa timhaka ta masangu u nga swi xiyanga, hi ku hatlisa languta etlhelo. Tekelela mutsari wa Bibele loyi a khongeleke a ku: “Endla leswaku mahlo ya mina ma hundza ma nga swi voni swilo leswi nga pfuniki nchumu.”—Pisalema 119:37.

Goza 2: Lawula Mianakanyo Ya Wena

Tanihi leswi hinkwerhu hi nga hetisekangiki, minkarhi yin’wana hi lwisana ni ku navela ko biha. Bibele yi ri: “Un’wana ni un’wana u ringiwa hi ku kokiwa ni ku wongiwa hi ku navela ka yena n’wini. Kutani ku navela, loko ku xurhe, ku veleka xidyoho.” (Yakobo 1:14, 15) U nga wu papalata njhani ndzingo lowu swi tikaka ku langutana na wona?

Loko u teriwa hi ku navela ko biha, namba u khongela

Tsundzuka leswaku loko u va ni ku navela ko biha, swi titshege hi wena leswaku u ta langutana njhani na kona. Lwisana ni ku navela koloko naswona u ku susa hi ku helela emianakanyweni ya wena. Wanuna loyi a vuriwaka Troy loyi a a godzomberiwe hi swilo leswi kombisaka timhaka ta masangu eka Internet u ri: “Ndzi lwisane ni ku tshika ku anakanya hi swilo swo biha hi ku va ndzi tshama ndzi ri karhi ndzi ehleketa hi swilo leswinene. A swi nga olovi hikuva a ndzi tlhela ndzi wela endzingweni lowu fanaka. Kambe eku heteleleni ndzi swi kotile ku lawula mianakanyo ya mina.” Wansati loyi a vuriwaka Elsa loyi loko a ha ri muntshwa a lwisaneke ni ndzingo wa ku tikhoma hi ndlela yo biha hi  swa masangu u ri: “Hi ku tshama ndzi khomekile ni ku khongela eka Yehovha, ndzi swi kotile ku lwisana ni ku navela ko biha.”

Ringeta leswi: Loko u teriwa hi ku navela ko biha, namba u khongela. Lwisana ni ku navela ko biha hi ku tshama u ri karhi u ehleketa hi “swilo swin’wana ni swin’wana swa ntiyiso, swilo swin’wana ni swin’wana swa ntikelo lowukulu, swilo swin’wana ni swin’wana swo lulama, swilo swin’wana ni swin’wana swo tenga, swilo swin’wana ni swin’wana leswi rhandzekaka, swilo swin’wana ni swin’wana leswi ku vulavuriwaka kahle ha swona, hinkwaswo leswi nga kona swa vunene ni hinkwaswo leswi nga kona leswi dzunekaka.”—Vafilipiya 4:8.

Goza 3: Lawula Swiendlo Swa Wena

Swi nga olova leswaku u wela ekhombyeni loko ku va ni ku navela, ndzingo ni ku pfulekeriwa hi nkarhi wo swi endla. (Swivuriso 7:6-23) U nga swi papalata njhani ku wela ekhombyeni?

“Ndzi nghena eka Internet ntsena loko ndzi ri ni vanhu van’wana”

Bibele yi nyikela xitsundzuxo xa vutlhari yi ku: “U tlharihile la voneke khombo kutani a tumbela, kambe la nga riki na ntokoto u ye emahlweni kutani u fanele a xupuriwa.” (Swivuriso 22:3) Kutani lawula swiendlo swa wena hi ku papalata swiyimo leswi vangaka leswaku u wela endzingweni. (Swivuriso 7:25) Wanuna loyi a vuriwaka Filipe loyi a hluleke ku godzomberiwa hi swilo leswi kombisaka timhaka ta masangu u ri: “Ndzi veka khompyuta ya ka hina erivaleni kutani ndzi hoxa ni progreme leyi lawulaka matirhiselo ya Internet. Ndzi nghena eka Internet ntsena loko ndzi ri ni vanhu van’wana.” Hilaha ku fanaka, Troy loyi ku vulavuriweke ha yena eku sunguleni u ri: “Ndzi papalata ku hlalela tifilimi leti kombisaka swilo swa timhaka ta masangu ni ku tshama ni vanhu lava vulavulaka hi swa masangu. A ndzi lavi ku tinghenisa ekhombyeni.”

Ringeta leswi: Kambisisa kahle swiyimo leswi endlaka u wela endzingweni kutani u tiva leswaku u nga swi papalata njhani.—Matewu 6:13.

U NGA HELI MATIMBA!

Xana u fanele u endla yini loko wo wela endzingweni hambiloko u tikarhate hi matimba leswaku u wu papalata? U nga heli matimba naswona u nga tshiki ku lwisana na wona. Bibele yi ri: “Lowo lulama a nga ha wa ka nkombo, kunene u ta pfuka.” (Swivuriso 24:16) Tata wa hina wa le tilweni u hi khutaza leswaku hi “pfuka.” Xana u ta swi amukela loko a ku pfuna hileswi a nga ni rirhandzu? Kutani hambeta u khongela eka yena. Tiyisa ripfumelo ra wena hi ku dyondza Rito rakwe ni hi ku va kona eminhlanganweni ya Vukreste. Tshemba xitshembiso xa Xikwembu lexi nge: “Ndzi ta ku nyika matimba. Kunene ndzi ta ku pfuna.”—Esaya 41:10.

Cody loyi ku vulavuriweke ha yena eku sunguleni ka xihloko u ri: “Ndzi tikarhate hi matimba leswaku ndzi lwisana ni ku godzomberiwa hi swifaniso swa timhaka ta masangu. Ndzi rhete ko hlayanyana kambe hi ku pfuniwa hi Xikwembu ndzi swi kotile ku hlula mukhuva lowu.” Dylan loyi na yena ku vulavuriweke ha yena eku sunguleni u ri: “A swi ta va swi ndzi oloverile ku endla timhaka ta masangu ni ntombhi leyi a ndzi tirha na yona. Kambe ndzi yime ndzi tiya ndzi yi byela leswaku a swi nge koteki. Swa tsakisa ku va ni ripfalo leri baseke. Kambe lexi nga xa nkoka hi leswaku Yehovha wa tinyungubyisa hi mina.”

Loko u yima u tiyile u hlula ndzingo, u nga tiyiseka leswaku Xikwembu xi ta tinyungubyisa ha wena!—Swivuriso 27:11.

^ ndzim. 2 Mavito ma cinciwile exihlokweni lexi.

DYONDZA SWO TALA

MAHUNGU LAMANENE LAMA HUMAKA EKA XIKWEMBU!

Milawu Ya Xikwembu Yi Hi Pfuna Njhani?

Yesu u hlamusele leswaku ha yini hi lava nkongomiso ni leswaku hi yihi milawu ya Bibele leyi nga ya nkoka.