Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA FEBRUARY 2014

 BIBELE YI HUNDZULA VUTOMI BYA VANHU

“Xitshembiso Xa Misava Leyi Nga Paradeyisi Xi Hundzule Vutomi Bya Mina”

“Xitshembiso Xa Misava Leyi Nga Paradeyisi Xi Hundzule Vutomi Bya Mina”
  • LEMBE RO VELEKIWA: 1974

  • TIKO: LATVIA

  • MATIMU YAKWE: A A NGHENELE MPHIKIZANO WA SWITHUTHUTHU LOWU NGA NI KHOMBO

VUTOMI BYA MINA:

Ndzi velekiwe eRiga, laha ku nga ntsindza wa Latvia. Mina na sesi wa mina hi kurisiwe hi mana wa hina. Hambileswi Manana a a ri Mukhatoliki, a hi ya ekerekeni ntsena hi tiholideyi leti fambisanaka ni vukhongeri. Minkarhi hinkwayo a ndzi kholwa leswaku ku ni Xikwembu, kambe leswi a ndza ha ri muntshwa, ku ve ni swilo swo tala leswi ndzi kavanyeteke lerova ndzi nga vi na mhaka na xona.

Loko ndzi ri karhi ndzi kula, mana wa mina u xiye leswaku a ndzi ri ni vuswikoti byo tlhantlhelela swilo ndzi tlhela ndzi swi hlanganisa. Leswi endlwini a ku ri ni swilo swo tala leswi a ndzi ta swi tlhantlhelela, minkarhi hinkwayo Manana a a karhateka loko a fanele a ndzi siya ekaya ndzi ri ndzexe. Kutani u ndzi nyike tinsimbhi leti a ndzi rhandza ku ti hlanganisa ndzi endla nchumu wo karhi ivi ndzi tlhela ndzi wu tlhantlhelela. Sweswo swi endle leswaku ndzi rhandza xithuthuthu. Manana u ndzi nghenise eka mphikizano wa swithuthuthu lowu vitaniwaka Zelta Mopēds (The Golden Moped). Ndzi sungule ku phikizana ni van’wana hi ku tirhisa swithuthuthu leswitsongo leswi talaka ku tirhisiwa hi vavasati ivi hi ku famba ka nkarhi ndzi sungula ku tirhisa swithuthuthu leswikulu.

Leswi a ndzi tlharihile, a swi tekanga nkarhi leswaku ndzi kota ntlangu wo fambisa swithuthuthu hi rivilo lerikulu lowu a wu ri ni khombo. Ndzi hlule eka mphikizano wa swithuthuthu wa le Latvia ku ringana kanharhu ivi ndzi tlhela ndzi hlula eka Mphikizano wa Swithuthuthu leswikulu eMatikweni ya Baltic ku ringana kambirhi.

NDLELA LEYI BIBELE YI HUNDZULEKE VUTOMI BYA MINA HA YONA:

Loko ndza ha khomekile hi mimphikizano yoleyo, Evija loyi a a ri ntombhi ya mina (loyi endzhakunyana a veke nsati wa mina) u hlangane ni Timbhoni ta Yehovha. Ti n’wi nyike yin’wana ya minkandziyiso ya tona leyi a yi ri ni xiphephana xo kombela dyondzo ya Bibele. U tate xiphephana xolexo kutani a xi rhumela. Hi ku hatlisa, u endzeriwe hi Timbhoni timbirhi naswona u sungule ku dyondza Bibele na tona. A ndzi nga ri na xiphiqo hileswi a dyondza na tona, kambe hi nkarhi wolowo, mina a ndzi nga byi tsakeli vukhongeri.

Endzhakunyana, Timbhoni ti ndzi rhambile leswaku ndzi ta ndzi ta yingisela loko ti ri karhi ti dyondza Bibele na Evija. Ndzi  pfumerile naswona leswi ndzi swi tweke swi ndzi tsakisile. Lexi ndzi khumbeke swinene i xitshembiso lexi nga eBibeleni xa misava leyi nga paradeyisi. Hi xikombiso, ti ndzi kombe ndzimana leyi nga eka Pisalema 37:10, 11 leyi nge: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” Xitshembiso xexo xi ndzi tsakisile hakunene.

Ndzi ye ndzi swi tsakela swinene swilo leswi a ndzi swi dyondza eBibeleni. Ndzi sungule ku xiya leswaku ku ni tikereke to tala ta mavunwa. Tidyondzo ta Bibele ti ndzi tsakisile hikwalaho ka leswi a ti twisiseka naswona a ti ri erivaleni.

Loko ndzi ri karhi ndzi ya emahlweni ndzi dyondza Bibele, ndzi dyondze ndlela leyi vutomi byi nga bya nkoka ha yona eka Yehovha. (Pisalema 36:9) Sweswo swi khumbe mphikizano wa mina—a ndzi nga ha swi lavi ku veka vutomi bya mina ekhombyeni. Ematshan’weni ya sweswo, vutomi bya mina a ndzi lava ku byi tirhisela ku va ndzi vangamisa Yehovha. Hikwalaho ka sweswo, a ndzi nga ha swi teki swi ri swa nkoka ku va ni ndhuma ni ku ndhundhuzeriwa hikwalaho ka mphikizano wa swithuthuthu.

Ndzi sungule ku xiya leswaku ku ni vutihlamuleri lebyi Munyiki wa vutomi a ndzi nyikeke byona

Hi 1996, ndzi ye entsombanweni wa matiko yo hambana-hambana wa Timbhoni ta Yehovha eTallinn, le Estonia, laha ku nga riki kule ni xitediyamu xa swithuthuthu lexi a ndzi tala ku ya eka xona leswaku ndzi ya nghenela mphikizano kona. Loko ndzi ri entsombanweni, ndzi vone vanhu vo huma ematikweni yo tala yo hambana-hambana va hlangane swin’we hi vun’we. Hi xikombiso, loko Mbhoni yin’wana yi lahlekele hi xipachi xa yona, a ndzi ehleketa leswaku a yi nge he xi kumi. Kambe, swi nga siya kwihi, Mbhoni yin’wana yi thumbe xipachi xexo kutani yi xi tlherisela eka n’wini wa xona naswona a ku ri hava lexi kayivelaka. Sweswo swi ndzi hlamarisile swinene! Ndzi nambe ndzi swi twisisa leswaku hakunene Timbhoni ti hanya hi milawu ya Bibele. Mina na Evija hi ye emahlweni hi endla nhluvuko eka dyondzo ya hina ya Bibele kutani hi 1997 hi khuvuriwile hi va Timbhoni ta Yehovha.

NDLELA LEYI NDZI VUYERIWEKE HA YONA:

Van’wana va vanghana va mina va file hikwalaho ka mphikizano wa swithuthuthu. Hikwalaho ko dyondza Bibele, ndzi sungule ku twisisa leswaku ndzi ni vutihlamuleri lebyi a ndzi fanele ndzi byi hetisisa eka Munyiki wa vutomi, ku nga Yehovha. Sweswo swi ponise vutomi bya mina.

Ku ringana malembe ya mune, mina na Evija hi ve ni lunghelo ro nghenela ntirho wa nkarhi hinkwawo erhavini ra Timbhoni ta Yehovha eRiga. Sweswi hi tiphina hi ku kurisa xinhwanyetana xa hina, ku nga Alise, ni ku xi pfuna leswaku xi kula xi ri karhi xi rhandza Yehovha. Nakambe ndzi ni lunghelo ro heta siku rin’we kan’we hi vhiki ehofisini ya vuhundzuluxeri ndzi ri karhi ndzi lunghisa timovha ni swilo swin’wana leswi onhakeke. Hakunene swa ndzi tsakisa ku tirhisa vuswikoti lebyi ndzi byi dyondzeke loko ndza ha n’wana! Ninamuntlha ndza ha tlhantlhelela swilo ndzi tlhela ndzi swi hlanganisa.

Ndzi ri teka ri ri ra nkoka lunghelo ro va mina ni ndyangu wa mina hi chumayela hi Xikwembu xi ri xin’we xa ntiyiso naswona ndza swi tlangela leswi ndzi swi dyondzeke eBibeleni. Hakunene xitshembiso xa misava leyi nga paradeyisi xi hundzule vutomi bya mina!