Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA FEBRUARY 2014

Tinhlamulo Ta Swivutiso Swa Bibele

Tinhlamulo Ta Swivutiso Swa Bibele

Xana hakunene Bibele i Rito ra Xikwembu?

Bibele i Rito ra Xikwembu ro hlawuleka tanihi leswi na wena u ehleketaka tano. Ku kandziyisiwe tikopi ta tibiliyoni hi tindzimi ta madzana. Vutlhari lebyi nga eBibeleni byi ni matimba yo hundzula vanhu leswaku va hanya vutomi lebyinene.—Hlaya 1 Vatesalonika 2:13; 2 Timotiya 3:16.

Ha swi tiva leswaku Bibele yi huma eka Xikwembu hikuva yi hi byela hi vumundzuku hi ndlela leyi pakanisaka. Ku hava munhu loyi a nga endlaka sweswo. Hi xikombiso, xiya leswi tsariweke ebukwini ya Esaya. Kopi ya yona leyi endliweke emalembeni ya 100 emahlweni ko va Yesu a velekiwa yi kumiwe ebakweni leri nga ekusuhi ni Lwandle Leri Feke. Yi vula leswaku muti wa Babilona a wu ta hundzuka rhumbi. Marito wolowo ma hetisekile endzhaku ka loko ku hundze malembe yo tala Yesu a endle vutirheli byakwe bya laha misaveni.—Hlaya Esaya 13:19, 20; 2 Petro 1:20, 21.

Xana Bibele yi tsariwe njhani?

Bibele yi tsariwe eka malembe yo tlula kwalomu ka 1 600 lama hundzuke. Vatsari va Bibele va kwalomu ka 40 va tsale hi nhloko-mhaka yin’we handle ko kanetana. Xana sweswo swi kotekise ku yini? Xikwembu xi va kongomisile loko va ri karhi va tsala.—Hlaya 2 Samuwele 23:2.

Minkarhi yin’wana Xikwembu xi vulavule ni vatsari va Bibele hi ku tirhisa tintsumi, swivono kumbe milorho. Entiyisweni, Xikwembu xi nghenise rungula ra xona emianakanyweni ya mutsari kutani xi n’wi pfumelela leswaku a hlawula marito lawa a ta ma tirhisa leswaku a tsala rungula ra xona.—Hlaya Nhlavutelo 1:1; 21:3-5.

DYONDZA SWO TALA

Bibele I Buku Leyi Humaka Eka Xikwembu

Xana Bibele yi nga ku pfuna njhani leswaku u langutana ni swiphiqo swa wena? Ha yini u tshemba vuprofeta bya yona?