Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JANUARY 2014

 BIBELE YI HUNDZULA VUTOMI BYA VANHU

“Yehovha A Nga Ndzi Rivalanga”

“Yehovha A Nga Ndzi Rivalanga”
  • LEMBE RO VELEKIWA: 1922

  • TIKO: SPAIN

  • MATIMU YAKWE: MUFUNDHISI

VUTOMI BYA MINA:

Ndzi velekiwe endhawini leyi vanhu va kona a va nga fuwanga ngopfu eBilbao, le n’walungwini wa Spain. A ndzi ri n’wana wa vumbirhi eka vana va mune. Ndyangu wa ka hina a ku ri Makhatoliki lama tinyiketeleke naswona siku ni siku a ndzi ya eka Masa. Loko ndzi ri ni malembe ya 23, ndzi ve mudyondzisi—ku nga ntirho lowu a ndzi wu rhandza naswona ndzi heteke malembe ya 40 ndzi ri karhi ndzi tirha wona. Eka tidyondzo tin’wana, a ndzi tibuma hi ku dyondzisa vukhongeri bya Khatoliki naswona nimadyambu a ndzi va mufundhisi—laha a ndzi letela vanhwanyana ku dya xilalelo ro sungula.

Endzhaku ka malembe ya 12 ndzi ri karhi ndzi tiphina evukatini, ndzi ve noni kutani ndzi sala ni vana va mune va vanhwana lava a ndzi fanele ndzi va khathalela. A ndzi ri ni malembe ya 33 ntsena! Ndzi ringete ku kuma nchavelelo ekerekeni ya mina ya Khatoliki, kambe a ndzi ri ni swivutiso swo tala leswi a ndzi tshamela ku tivutisa swona. A ndzi tivutisa leswi: ‘Ha yini vanhu va hambeta va fa loko ku ri hileswaku Kreste u hi ponisile? Ha yini hi khongelela Mfumo wa Xikwembu leswaku wu ta loko ku ri hileswaku vanhu vo lulama va ya etilweni?’ Nakambe a ndzi tivutisa leswi: ‘Loko ku ri hileswaku loko hi fa Xikwembu xa hi avanyisa, ha yini enkarhini lowu taka hi ta suka etilweni, hi ya epagatori kumbe etiheleni leswaku hi ya avanyisiwa ro hetelela?’

Swivutiso sweswo ndzi swi vutise vaprista van’wana lava ndzi hlanganeke na vona. Un’wana wa vona u ndzi hlamule a ku: “A ndzi swi tivi. Vutisa bixopo. Ha yini u fanele u karhateka? U pfumela eka Xikwembu, a hi swona ke? Swi tshike swi hundza!” Kambe ndzi hambete ndzi lavisisa tinhlamulo ta swona. Eku heteleleni, ndzi ye eka tidyondzo leti a ti dyondzisiwa hi Majesuit, Mapentekosta ni Magnostic. Kambe ku hava ni un’we loyi a a ri ni tinhlamulo leti enerisaka ta swivutiso swa mina.

NDLELA LEYI BIBELE YI HUNDZULEKE VUTOMI BYA MINA HA YONA:

Loko ndzi ri ni malembe ya va-60, xinhwanyetana lexi nga ni malembe ya nkombo xi ndzi rhambile leswaku ndzi ya eminhlanganweni ya Timbhoni ta Yehovha. Leswi ndzi swi voneke ni ku swi twa swi ndzi tsakisile, kambe hikwalaho ka leswi a ndzi tshama ndzi khomekile, hi nkarhi wolowo a ndza ha yanga emahlweni ndzi ti hlanganisa ni Timbhoni. Endzhaku ka malembe mambirhi, mpatswa lowu nga Timbhoni lowu vuriwaka Juan na Maite wu fike ekaya ka mina. Ku ringana tin’hweti tinharhu, hi ve ni bulo  ra swivutiso ni tinhlamulo, leri eku heteleleni ri endleke leswaku hi va ni dyondzo ya Bibele.

A ndzi yi langutela hi mahlo-ngati dyondzo yin’wana ni yin’wana ya Bibele! Ndzi kambisise swilo hinkwaswo leswi a ndzi swi dyondza hi vurhon’wana, ndzi tirhisa vuhundzuluxeri byinharhu bya Bibele ku tiyisekisa leswaku Timbhoni ta Yehovha a ti dyondzisa ntiyiso. Ndzi hatle ndzi swi xiya leswaku a ndzi ri eka vukhongeri lebyi pfilunganyaka ku ringana makume ya malembe. Ndzi vone ku hambana lokukulu exikarhi ka vukhongeri bya mina byo sungula ni leswi a ndzi ri karhi ndzi swi dyondza eBibeleni. Ndzi titwe ndzi tshikilelekile onge hiloko vukhongeri bya mina a byi fana ni murhi lowu simuriweke.

A ndzi swi tiva leswaku ndzi kume ntiyiso

Kutani, nuna wa mina wa vumbirhi u sungule ku vabya swinene ivi a fa. Hi nkarhi wolowo, ndzi tshike ntirho wa mina kutani ndzi rhurha eBilbao swa xinkarhana. Juan na Maite na vona va rhurhile. Khombo ra kona, ndzi tshike ku dyondza Bibele. Hambiswiritano, a ndzi swi tiva leswaku ndzi kume ntiyiso. A ndzi wu rivalanga ni siku ni rin’we.

Endzhaku ka malembe ya kwalomu ka 20, loko ndzi ri ni malembe ya 82, Juan na Maite va vuyile eBilbao kutani va ndzi endzela. A ndzi tsake swinene loko ndzi va vona! Ndzi swi xiyile leswaku Yehovha a nga ndzi rivalanga naswona ndzi tlhele ndzi sungula ku dyondza. Juan na Maite a va ndzi lehisela mbilu swinene, tanihi leswi a ndzi tshamela ku vutisa swivutiso leswi fanaka hi ku phindha-phindha. Nkarhi na nkarhi a ndzi lava ku twa switsundzuxo swa Bibele leswaku ndzi ta rivala hi vukhongeri bya mina bya khale. Nakambe a ndzi lava ku hlomiseriwa hi ku helela leswaku ndzi ta kota ku hlamusela vanghana ni ndyangu wa mina ntiyiso wa Bibele.

Siku leri ndzi heteleleke ndzi khuvuriwe ha rona—ndzi ri ni malembe ya 87—a ku ri siku ro tsakisa swinene evuton’wini bya mina. Ku ve ni nkhuvulo eka nhlengeletano leyi a yi khomiwe hi Timbhoni ta Yehovha. Nkulu la nga Mukreste u nyikele nkulumo leyi sekeriweke eBibeleni leyi a yi kongomisiwe ngopfu eka hina lava yaka eku khuvuriweni. Nkulumo yoleyo yi ndzi khumbe lerova ndzi rila. Ndzi yi yingisile, onge hiloko Yehovha a a vulavula na mina hi ku kongoma. Endzhaku ka loko ndzi khuvuriwile, Timbhoni ta madzana ti te eka mina kutani ti fika ti ndzi hoyozela—hambileswi to tala ta tona a ti nga si tshama ti ndzi vona!

NDLELA LEYI NDZI VUYERIWEKE HA YONA:

Minkarhi hinkwayo a ndzi swi tiva leswaku Yesu Kreste i “ndlela.” (Yohane 14:6) Kambe dyondzo ya mina ya Bibele yi endle leswaku ndzi tiva Yehovha, loyi a hi kongomisaka hi ku tirhisa Yesu. Sweswi ndzi kota ku khongela eka Xikwembu tanihi Tata wa mina la rhandzekaka tlhelo Munghana. Ku hlaya buku leyi nge Tshinela Eka Yehovha * swi cince vutomi bya mina. Eku sunguleni ndzi yi hlaye ndzi yi heta hi vusiku byin’we! Swi ndzi tsakisile ku dyondza ndlela leyi Yehovha a nga ni tintswalo ha yona.

Loko ndzi anakanya ndlela leyi ndzi heteke nkarhi wo leha ha yona ndzi ri karhi ndzi lavisisa vukhongeri bya ntiyiso, ndzi ehleketa marito ya Yesu lama nge: “Hambetani mi kombela, kutani mi ta nyikiwa; hambetani mi lava, kutani mi ta swi kuma; hambetani mi gongondza, kutani mi ta pfuleriwa.” (Matewu 7:7) Leswi sweswi ndzi kumeke tinhlamulo ta leswi a ku ri khale ndzi swi lava, swi ndzi tisela ntsako lowukulu ku ti avela van’wana.

Hambileswi ndzi nga ni malembe ya 90, ka ha ri ni swilo swo tala leswi ndzi faneleke ndzi swi dyondza hi Yehovha. Nhlangano wun’wana ni wun’wana lowu ndzi yaka eka wona eHolweni ya Mfumo swi fana niloko ndzi ya eka xiendlakalo xo hlawuleka—hikwalaho ka vutivi bya risima lebyi ndzi byi kumaka ni xinghana xa vamakwerhu va mina lava rhandzekaka. Ndzi swi langutele hi mahlo-ngati ku tlhela ndzi va mudyondzisi eParadeyisini leyi tshembisiweke ya laha misaveni. (Nhlavutelo 21:3, 4) Kasi lexi ndzi xi languteleke swinene i ku vona varhandziwa va mina va tlhela va hanya kutani va kuma nkarhi wo dyondzisiwa ntiyiso wa Bibele. (Mintirho 24:15) Ndzi swi langutele hi mahlo-ngati ku va byela hi nyiko ya risima leyi Yehovha a ndzi nyikeke yona eka malembe ya mina ya vudyuhari!

^ ndzim. 15 Yi kandziyisiwe hi Timbhoni ta Yehovha.