Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JANUARY 2014

 BULO NI MUAKELANI

Ha Yini Xikwembu Xi Pfumelela Ku Xaniseka?

Ha Yini Xikwembu Xi Pfumelela Ku Xaniseka?

Bulo leri landzelaka ri kombisa ndlela leyi Mbhoni ya Yehovha yi nga bulaka ha yona ni muakelani. A hi nge Mbhoni ya Yehovha leyi vuriwaka Rirhandzu yi endzele wansati loyi a vuriwaka Vutomi ekaya kakwe.

XANA XIKWEMBU XI TITWA NJHANI LOKO HI XANISEKA?

Rirhandzu: Xewani Vutomi. Ndza tsaka ku ku kuma u ri ekaya.

Vutomi: Na mina ndza tsaka.

Rirhandzu: Enkarhini lowu nga hundza loko ndzi ri laha, hi bule hi ndlela leyi Xikwembu xi titwaka ha yona hi ku xaniseka ka hina. * U vule leswaku leyi i mhaka leyi ku nga khale yi ri karhi yi ku karhata, ngopfu-ngopfu endzhaku ka loko mana wa wena a vaviseke eka mhangu ya movha. Ndzi nga si rivala, u pfuke njhani mhani wa wena?

Vutomi: Masiku man’wana a nga tipfuxi kahle. Kambe namuntlha u pfukile.

Rirhandzu: Ndza tsaka ku twa sweswo. Ndza tshemba leswaku swa tika hakunene ku langutana ni xiyimo xexo.

Vutomi: Ina, swa tika. A ndzi tivi leswaku u ta xaniseka ku fikela rini.

Rirhandzu: Vanhu vo tala va titwa hi ndlela yoleyo. Kumbexana wa ha tsundzuka leswaku loko hi ku endzerile enkarhini lowu nga hundza, ndzi ku vutisile leswaku ha yini Xikwembu xi pfumelela leswaku vanhu va ya emahlweni va xaniseka loko ku ri hileswaku xi ni matimba ya ku ku herisa.

Vutomi: Ina, ndza tsundzuka.

Rirhandzu: Loko ndzi nga si ku hlamula hi ku tirhisa Bibele, a hi pfuxete tinhla ti nga ri tingani leti hi buleke ha tona.

Vutomi: Swi lulamile.

Rirhandzu: Xo sungula, hi dyondze hi ta wanuna wo tshembeka wa le minkarhini ya ku tsariwa ka Bibele loyi na yena a a lava ku tiva leswaku ha yini Xikwembu xi pfumelela ku xaniseka. Kambe Xikwembu a xi n’wi solanga hikwalaho ka sweswo kumbe xi n’wi byela leswaku a a fanele a va ni ripfumelo leri tiyeke.

Vutomi: A ndzi nga si tshama ndzi yi twa mhaka yoleyo.

Rirhandzu: Hi tlhele hi dyondza leswaku Yehovha Xikwembu a nga tsaki loko hi xaniseka. Hi xikombiso, Bibele yi vula leswaku loko vanhu vakwe va ri emaxangwini, “na yena a a ri emaxangwini.” * Xana a swi ku chaveleli ku tiva leswaku Xikwembu xa ku tiva swinene ku xaniseka ka hina?

Vutomi: Swa ndzi chavelela.

Rirhandzu: Xo hetelela, hi pfumelelane hileswaku tanihi leswi Muvumbi wa hina a nga ni matimba lamakulu, nkarhi wun’wana ni wun’wana a nga swi kota ku nghenelela a herisa ku xaniseka ka hina.

Vutomi: Sweswo hi swona leswi ndzi nga swi twisisiki. Ha yini Xikwembu xi pfumelela swilo leswi hinkwaswo swo biha swi humelela loko ku ri hileswaku xi ni matimba yo swi herisa?

I MANI LOYI A A VULAVULA NTIYISO?

Rirhandzu: Leswaku hi kuma nhlamulo ya xivutiso xa wena, a hi pfule buku yo sungula ya Bibele, ku nga Genesa. Xana u yi toloverile mhaka leyi vulavulaka hi Adamu na Evha ni hi ta mbhandzu lowu yirisiweke?

Vutomi: Ina, ndzi yi dyondze exikolweni xa Sonto. Xikwembu xi va byele leswaku va nga dyi eka murhi wo karhi, kambe a va yingisanga.

 Rirhandzu: U vurisile. Kutani a hi bule hileswi endleke leswaku Adamu na Evha va dyoha. Sweswo hi swona leswi endlaka leswaku hi xaniseka. Ndzi kombela u hlaya Genesa ndzima 3, ndzimana 1 ku ya eka 5?

Vutomi: Swi lulamile. “Nyoka a yi ri ni vuxiyaxiya ngopfu ku tlula swivandzana hinkwaswo swa nhova leswi Yehovha Xikwembu a swi endleke. Kutani yi ku eka wansati: ‘Xana hakunene i ntiyiso leswaku Xikwembu xi vule leswaku mi nga tshuki mi dya eka murhi wun’wana ni wun’wana wa ntanga?’ Hiloko wansati a ku eka nyoka: ‘Mbhandzu wa mirhi ya ntanga hi nga dya. Kambe loko ku ri ku dya mbhandzu wa murhi lowu nga exikarhi ka ntanga, Xikwembu xi te: “Mi nga tshuki mi dya eka wona, e-e, mi nga tshuki mi wu khumba leswaku mi nga fi.”’ Hiloko nyoka yi ku eka wansati: ‘Entiyisweni mi nga ka mi nga fi. Hikuva Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.’”

Rirhandzu: U hlaye kahle. A hi bulenyana hi tindzimana leti. Xo sungula, xiya leswaku nyoka yi vulavule ni wansati, ku nga Evha. Ndzimana yin’wana ya Bibele yi kombisa leswaku Sathana Diyavulosi hi yena loyi a vulavuleke na Evha hi ku tirhisa nyoka. * Sathana u vutise Evha malunghana ni murhi lowu Xikwembu xi va leriseke leswaku va nga dyi eka wona. Xana u swi xiyile leswaku Xikwembu xi vule leswaku a ku ta endleka yini eka Adamu na Evha loko vo dya eka murhi wolowo?

Vutomi: Xi vule leswaku va ta fa.

Rirhandzu: U be kona. Endzhaku ka sweswo, Sathana u sungule ku hehla Xikwembu. Xiya leswi a swi vuleke, u te: “Entiyisweni mi nga ka mi nga fi.” Sathana a a vula leswaku Xikwembu i muhembi!

Vutomi: Ndza sungula ku twa mhaka yoleyo.

Rirhandzu: Kutani loko Sathana a vula leswaku Xikwembu i muhembi, u pfuxe mhaka leyikulu leyi a swi ta lava nkarhi leswaku yi lulamisiwa. Wa swi twisisa ke?

Vutomi: A ndzi swi twisisi kahle.

Rirhandzu: Inge ndzi swi veka hi ndlela leyi. A hi nge siku rin’wana ndzi ta eka wena kutani ndzi ku byela leswaku ndzi ni matimba ku ku tlula. Xana u nga swi kombisa njhani leswaku a swi tano?

Vutomi: Kumbexana u nga ha endla swo karhi ku kombisa leswaku u ni matimba ku ndzi tlula.

Rirhandzu: U tiyisile. Kumbexana hi nga ha hlawula nchumu wo tika kutani hi vona leswaku i mani exikarhi ka hina loyi a nga kotaka ku wu tlakula. Sweswo swi ta kombisa leswaku i mani loyi a nga ni matimba ku tlula un’wana.

Vutomi: Ndza swi twisisa.

Rirhandzu: Kambe a hi nge ematshan’weni yo ku byela leswaku ndzi ni matimba ku ku tlula, ndzi ku byela leswaku ndzi tshembeke ku ku tlula? Leswaku mhaka yoleyo yi lulamisiwa swi ta tika, a hi swona ke?

Vutomi: U vurisile.

Rirhandzu: Phela ku tshembeka a hi nchumu lowu nga kombisiwaka hi matimba.

Vutomi: U be kona.

Rirhandzu: Ndlela yin’we ntsena yo lulamisa xiphiqo xolexo a ku ta va ku pfumelela nkarhi lowu ringaneke wu hundza, ku endlela leswaku vanhu van’wana va hi languta havumbirhi bya hina kutani va vona leswaku i mani loyi a nga tshembeka ku tlula un’wana.

Vutomi: Sweswo swa twisiseka.

Rirhandzu: Sweswi a hi tlhele hi kambisisa rungula leri nga eka Genesa. Xana Sathana u vule leswaku u ni matimba ku tlula Xikwembu?

Vutomi: Doo!

Rirhandzu: Loko a lo vula sweswo Xikwembu a xi ta va xi nambe xi n’wi kombisa leswaku u hoxile. Ematshan’weni ya sweswo, Sathana u vule leswaku u tshembeke ku tlula Xikwembu. Entiyisweni, u byele Evha a ku: ‘Xikwembu xa mi xisa, kambe mina ndzi mi byela ntiyiso.’

Vutomi: Mhaka leyi ya tsakisa.

Rirhandzu: Xikwembu a xi swi tiva leswaku ndlela leyinene yo lulamisa xiphiqo xexo a ku ri ku pfumelela nkarhi wo karhi wu hundza. Eku heteleleni, a swi ta va erivaleni leswaku i mani loyi a vulavulaka ntiyiso ni loyi a vulavulaka mavunwa.

MHAKA YA NKOKA

Vutomi: Loko Evha a fa, xana sweswo a ku vanga vumbhoni bya leswaku Xikwembu a xi vulavula ntiyiso?

 Rirhandzu: Ina, ku ve byona. Kambe xihehlo xa Sathana a xi katsa timhaka to tala. A hi tlhele hi languta ndzimana 5. Hi swihi swin’wana leswi Sathana a swi byeleke Evha?

Vutomi: U vule leswaku loko a dya mbhandzu, mahlo yakwe a ma ta pfuleka.

Rirhandzu: I ntiyiso, u tlhele a vula leswaku a a ta ‘fana ni Xikwembu, a tiva leswinene ni leswo biha.’ Kutani Sathana u vule leswaku Xikwembu a xi nga swi lavi leswaku vanhu va tiphina.

Vutomi: Wa vurisa.

Rirhandzu: Kutani marito wolawo na wona a ku ri xihehlo lexikulu.

Vutomi: Ha yini u vula tano?

Rirhandzu: Hi ku vula sweswo, Sathana a a vula leswaku Evha swin’we ni vanhu hinkwavo a va ta tiphina handle ko fumiwa hi Xikwembu. Eka xihehlo lexi, Yehovha a a swi tiva leswaku ndlela leyinene yo xi lulamisa a ku ri ku tshika Sathana a tiendlela ku rhandza. Kutani Xikwembu xi pfumelele Sathana leswaku a fuma misava leyi ku ringana nkarhi wo karhi. Hi swona leswi endlaka hi vona ku xaniseka konghasi laha misaveni—hikuva Sathana hi yena mufumi wa misava leyi. * Kambe hi lawa mahungu yo tsakisa.

Vutomi: Hi wahi mahungu ya kona?

Rirhandzu: Bibele yi dyondzisa tidyondzo leti timbirhi leti tsakisaka malunghana ni Xikwembu. Yo sungula yi kombisa leswaku Yehovha wa karhateka loko hi xaniseka. Hi xikombiso, a hi bule hi marito ya Hosi Davhida lama nga eka Pisalema 31:7. Davhida u xaniseke swinene evuton’wini byakwe, kambe xiya leswaku a a swi kota ku khongela eka Xikwembu. Ndzi kombela u hlaya ndzimana yoleyo.

Vutomi: Swi lulamile. Yi ri: “Ndzi ta tsaka ndzi tsakisisa hi musa wa wena wa rirhandzu, hileswi u voneke ku xaniseka ka mina; wa ma tiva maxangu ya moya-xiviri wa mina.”

Rirhandzu: Kutani hambileswi Davhida a a xaniseka, u chavelelekile hi ku tiva leswaku Yehovha u swi vone hinkwaswo leswi a swi n’wi humelela. Xana a swi ku chaveleli ku tiva leswaku Yehovha u swi vone hinkwaswo leswi a va langutane na swona, hambi ku ri swiphiqo swa hina leswi vanhu van’wana va nga ha vaka va nga swi twisisi hi ku helela?

Vutomi: Swa ndzi chavelela.

Rirhandzu: Dyondzo ya vumbirhi leyi tsakisaka i ya leswaku Xikwembu a xi nge swi pfumeleli leswaku hi xaniseka hilaha ku nga heriki. Bibele yi dyondzisa leswaku ku nga ri khale xi ta herisa vulawuri byo homboloka bya Sathana. Xi ta swi herisa hi ku helela swilo hinkwaswo swo biha leswi humeleleke, ku katsa ni maxangu lawa wena ni mhani wa wena mi langutaneke na wona. Xana ndzi nga tlhela ndzi vuya vhiki leri taka ndzi ta bula na wena hileswaku ha yini hi nga tiyisekaka leswaku ku nga ri khale Xikwembu xi ta herisa ku xaniseka hinkwako? *

Vutomi: U nga tlhela u vuya.

Xana ku ni mhaka yo karhi eBibeleni leyi u tshameke u tivutisa yona? Xana ku ni leswi u lavaka ku swi tiva hi tidyondzo to karhi ni leswi Timbhoni ta Yehovha ti swi pfumelaka? Loko swi ri tano, u nga kanakani ku ti vutisa loko u hlangana na tona. Ti ta swi tsakela ku ku pfuna.

^ ndzim. 7 Hlaya xihloko lexi nge “Bulo Ni Muakelani—Xana Xikwembu Xa Khathala Loko Hi Xaniseka?” lexi nga eka nkandziyiso wa magazini lowu wa July 1, 2013.

^ ndzim. 61 Leswaku u kuma rungula leri engetelekeke, hlaya ndzima 9 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Xana Hi Hanya “eMasikwini Yo Hetelela”?

Anakanyisisa hi ndlela leyi swiendlo ni malangutelo ya vanhu lava hi rhendzeleke swi kombisaka ha yona leswaku sweswi hi hanya “emasikwini yo hetelela” lawa Bibele yi profeteke ha wona.