Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JANUARY 2014

 NHLOKO-MHAKA YA XIFUNENGETO | XANA RIFU I MAKUMU YA SWILO HINKWASWO?

Rifu A Hi Makumu Ya Swilo Hinkwaswo!

Rifu A Hi Makumu Ya Swilo Hinkwaswo!

Betaniya a ku ri ximutana lexi nga eka tikhilomitara tinharhu ku suka eYerusalema. (Yohane 11:18) Kwalaho ku humelele mhangu eka mavhiki ma nga ri mangani emahlweni ko va Yesu a fa. Lazaro, un’wana wa vanghana lavakulu va Yesu, u sungule ku vabya swinene kutani a fa swi nga languteriwanga.

Loko Yesu a swi twa, u byele vadyondzisiwa vakwe leswaku Lazaro u etlele naswona u tiyimisele ku ya n’wi pfuxa. (Yohane 11:11) Kambe vadyondzisiwa va Yesu a va nga swi twisisi leswi a a swi vula, kutani hi ku kongoma Yesu u va byele a ku: “Lazaro u file.”—Yohane 11:14.

Loko ku hundze masiku ya mune a lahliwile, Yesu u fike eBetaniya a chavelela Marta sesi wa mufi. Marta u te: “Loko a wu ri kona laha, makwerhu ingi a nga fanga.” (Yohane 11:17, 21) Yesu u n’wi byele leswi: “Hi mina ku pfuka ni vutomi. Loyi a kombisaka ripfumelo eka mina, hambiloko a fa, u ta hanya.”—Yohane 11:25.

“Lazaro, huma!”

Ku kombisa leswaku marito wolawo a ku ri ntiyiso, Yesu u ye eka sirha-bako kutani a huwelela hi rito lerikulu a ku: “Lazaro, huma!” (Yohane 11:43) Kutani vanhu lava a va hlalerile va hlamarile loko va vona wanuna la feke a huma.

Enkarhini lowu hundzeke Yesu a a pfuxe vanhu vambirhi eku feni. Siku rin’wana u pfuxe xinhwanyetana xa Yayiro. Emahlweni ko va Yesu a xi pfuxa, na xona u xi hlamusele tanihi lexi etleleke.—Luka 8:52.

Xiya leswaku malunghana ni rifu ra Lazaro na xinhwanyetana xa Yayiro, Yesu u fanise rifu ni ku etlela. Xexo a ku ri xifananiso lexi fanelaka kahle. Ha yini? Loko munhu a etlele a nga tivi nchumu naswona u va a wisile eka xitlhavi ni ku xaniseka. (Eklesiasta 9:5; vona bokisi leri fambisanaka ni xihloko lexi leri nge,  “Rifu Ri Fana Ni Vurhongo Lebyikulu.”) Vadyondzisiwa vo sungula va Yesu a va xi twisisa kahle xiyimo xa vafi. Encyclopedia of Religion and Ethics yi ri: “Eka valandzeri va Yesu rifu a ri fana ni ku etlela naswona  sirha a ku ri ndhawu yo wisela eka yona . . . eka lava feke va ri ni ripfumelo.” *

Swa hi chavelela ku tiva leswaku vafi va etlele emasirheni naswona a va le ku xanisekeni. Xisweswo, ha swi tiva leswaku ku humelela yini loko hi fa naswona a hi fanelanga hi chava.

‘XANA LOKO MUNHU A FA A NGA TLHELA A HANYA?’

Hambileswi hi swi tsakelaka ku etlela vurhongo nivusiku, a nga kona loyi a lavaka ku etlela hilaha ku nga heriki. Xana hi wihi ntshembo lowu hi nga na wona wa leswaku vafi lava etleleke emasirheni va ta tlhela va hanya—hilaha swi veke hakona eka Lazaro ni xinhwanyatana xa Yayiro?

Yobo u vutise xivutiso lexi fanaka loko a vona onge u ta fa ku nga ri khale. U vutise a ku: ‘Xana loko munhu a fa a nga tlhela a hanya?’—Yobo 14:14.

Loko a vulavula ni Xikwembu xa Matimba Hinkwawo, Yobo u hlamule xivutiso xakwe hi ku vula a ku: “U ta vitana, mina ndzi ta ku hlamula. U ta navela ntirho wa mavoko ya wena.” (Yobo 14:15) Yobo a a tiyiseka leswaku Yehovha a a rindzele siku leri ha rona A nga ta pfuxa nandza Wakwe wo tshembeka. Xana Yobo a rindzele nchumu lowu a swi nga ta koteka leswaku wu endleka? Nikatsongo.

Ku pfuxiwa ka vanhu lava feke loku endliweke hi Yesu ku nyikela vumbhoni lebyi nga erivaleni bya leswaku Xikwembu xi nyike Yesu matimba yo herisa rifu. Entiyisweni, Bibele yi vula leswaku sweswi Yesu u ni “swilotlelo swa rifu.” (Nhlavutelo 1:18) Kutani Yesu u ta pfula tinyangwa ta sirha, hilaha a leriseke hakona leswaku ku susiwa ribye leri a ri ri eka sirha-bako ra Lazaro.

Bibele yi xi vula hi ku phindha-phindha xitshembiso lexi xa ku pfuxiwa ka vafi. Ntsumi yi tiyisekise muprofeta Daniyele yi ku: “U ta wisa, kambe u ta yima u kuma xiavelo xa wena eku heleni ka masiku.” (Daniyele 12:13) Yesu u byele Vasaduki, ku nga varhangeri va Vayuda lava a va nga pfumeli eka xitshembiso xa ku pfuxiwa ka vafi a ku: “Mi hoxisile, hikuva a mi ma tivi Matsalwa hambi ku ri matimba ya Xikwembu.” (Matewu 22:23, 29) Muapostola Pawulo u te: “Ndzi ni ntshembo eka Xikwembu . . . leswaku ku ta va ni ku pfuxiwa ka lava lulameke ni ka lava nga lulamangiki.”—Mintirho 24:15.

XANA VAFI VA TA PFUXIWA RINI?

Xana ku pfuxiwa loku ka lava lulameke ni ka lava nga lulamangiki ku ta endleka rini? Ntsumi yi byele Daniyele wo lulama leswaku u ta pfuxiwa “eku heleni ka masiku.” Hilaha ku fanaka, Marta a a kholwa leswaku makwavo wakwe, ku nga Lazaro, u ta “pfuka eku pfuxiweni ka lava feke hi siku ro hetelela.”—Yohane 11:24.

Bibele yi hlanganisa “siku [leri] ro hetelela” ni ku fuma ka Mfumo wa Kreste. Pawulo u tsale a ku: “Hikuva [Kreste] u fanele a va hosi ku fikela loko Xikwembu xi veke valala hinkwavo ehansi ka milenge ya yena. Rifu i nala wo hetelela la nga ta herisiwa.” (1 Vakorinto 15:25, 26) Lexi i xivangelo lexikulu lexi hi endlaka hi khongelela Mfumo wa Xikwembu leswaku wu ta ni leswaku ku rhandza ka Xikwembu ku endleka emisaveni. *

Yobo a a swi tiva kahle leswaku ku rhandza ka Xikwembu i ku pfuxa vanhu lava feke. Loko siku rero ri fika, rifu ri ta herisiwa hakunene. Vanhu a va nge he pfuki va vutise va ku, ‘Xana rifu i makumu ya swilo hinkwaswo?’

^ ndzim. 8 Rito ra Xitsonga leri nge “masirha” ri huma eka rito ra Xigriki leri vulaka “ndhawu yo etlela eka yona.”

^ ndzim. 18 Leswaku u kuma rungula leri engetelekeke malunghana ni Mfumo wa Xikwembu, hlaya ndzima 8 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.