Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JANUARY 2014

Ntshembo Wa Ku Pfuxiwa Ka Lava Feke

Ntshembo Wa Ku Pfuxiwa Ka Lava Feke

Xana wa xi tshemba xitshembiso lexi nga eBibeleni xa ku pfuxiwa ka lava feke? * Ntshembo lowu hi nga na wona wa ku tlhela hi hlangana ni varhandziwa va hina lava feke wa tsakisa hakunene. Kambe, xana xitshembiso xexo xi ta hetiseka hakunene? Leswaku hi kuma nhlamulo ya xivutiso xexo, i swinene ku kambisisa xikombiso xa vaapostola va Yesu Kreste.

Vaapostola a va yi tshemba hi ku helela mhaka ya ku pfuxiwa ka lava feke. Ha yini? A ku ri hikwalaho ka swivangelo swimbirhi. Xo sungula, ntshembo wa vona a wu sekeriwe ngopfu emhakeni leyi: Yesu u pfuxiwe eku feni. Vaapostola—swin’we ni “vamakwerhu vo tlula 500 hi nkarhi wun’we”—va n’wi vonile Yesu loko se a pfuxiwile. (1 Vakorinto 15:6) Ku engetelela kwalaho, ku pfuxiwa ka Yesu swi tiyisekisiwile ni ku tlhela swi amukeriwa hi vanhu vo tala hilaha Tievhangeli ta mune ti kombisaka hakona.Matewu 27:62–28:20; Marka 16:1-8; Luka 24:1-53; Yohane 20:1–21:25.

Xa vumbirhi, vaapostola va ma vonile masingita manharhu ya loko Yesu a pfuxa vanhu lava feke—singita ro sungula u ri endle eNayini, kasi ra vumbirhi u ri endle eKapernawume kutani ro hetelela a ri endla eBetaniya. (Luka 7:11-17; 8:49-56; Yohane 11:1-44) Singita ro hetelela ra ku pfuxiwa ka lava feke, leri ku vulavuriweke ha rona eku sunguleni ka nkandziyiso lowu, a ri katsa ndyangu lowu a wu tolovelane swinene na Yesu. A hi swi kambisiseni hi vuenti leswi endlekeke.

“HI MINA KU PFUKA”

“Makwenu u ta pfuka.” Yesu u byele Marta marito wolawo, loyi makwavo wakwe, Lazaro, se a a ri ni masiku ya mune a file. Eku sunguleni Marta a a nga swi twisisi leswi Yesu a a swi vula. U vule leswaku “Ndza swi tiva leswaku u ta pfuka,” kambe a a ehleketa leswaku sweswo a swi ta endleka enkarhini lowu taka. Anakanya ndlela leyi a hlamaleke ha yona endzhaku ko twa Yesu a vula marito ya leswaku “Hi mina ku pfuka ni vutomi,” u vone Yesu a pfuxa makwavo wakwe eku feni!Yohane 11:23-25.

Xana Lazaro a ri kwihi eka masiku wolawo ya mune endzhaku ka loko a file? Lazaro a nga vulanga nchumu lexi kombisaka leswaku a a hanya endhawini yin’wana eka masiku wolawo ya mune. Lazaro a a nga ri na moya lowu nga fiki lowu yeke etilweni. Loko Lazaro a pfuxiwa, Yesu a nga n’wi susanga etilweni ekusuhi ni Xikwembu a n’wi tisa emisaveni a n’wi tshikisa ku tiphina kwale. Kutani, xana Lazaro a a ri kwihi eka masiku wolawo ya mune? A a etlele esirheni.Eklesiasta 9:5, 10.

Tsundzuka, Yesu u fanise rifu ni ku etlela laha munhu a pfuxiwaka eku feni. Rungula ri hlayekisa xileswi: “‘Lazaro murhandziwa wa hina, u etlele, kambe ndzi ya ku ya n’wi pfuxa.’ Vadyondzisiwa va ku eka yena: ‘Hosi, loko a etlele, u ta hanya.’ Yesu a a vulavula hi ta ku fa ka Lazaro. Kambe vona a va anakanya leswaku u vulavula hi ta ku etlela vurhongo byinene. Kutani Yesu a va byela erivaleni, a ku: ‘Lazaro u file.’” (Yohane 11:11-14, BibeleMahungu Lamanene) Loko Yesu a pfuxa Lazaro, u tlhele a hanya kutani a tlhela a n’wi hlanganisa ni ndyangu wa ka vona. Wa nga vona nyiko yo hlamarisa leyi Yesu a yi nyikeke ndyangu wolowo!

Masingita ya ku pfuxiwa ka lava feke lawa Yesu a ma endleke loko a ri laha misaveni ma kombisa leswi a nga ta swi endla enkarhini lowu taka loko a ri Hosi eMfun’weni wa Xikwembu. * Loko Yesu a fuma misava a ri etilweni, u ta pfuxa vanhu lava etleleke emasirheni. Hi yona mhaka a nga te: “Hi mina ku pfuka.” Anakanya hi ntsako lowu u nga ta va na wona loko u tlhela u vona vanhu lava u va rhandzaka! Nakambe, anakanya hi ntsako lowu vanhu lava pfuxiweke va nga ta va na wona!Luka 8:56.

Anakanya hi ntsako lowu u nga ta va na wona loko u tlhela u vona vanhu lava u va rhandzaka!

NTSHEMBO WO KUMA VUTOMI LEBYI NGA HERIKI

Yesu u byele Marta a ku: “Loyi a kombisaka ripfumelo eka mina, hambiloko a fa, u ta hanya; naswona un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo.” (Yohane 11:25, 26) Vanhu lava Yesu a nga ta va pfuxa hi nkarhi wa ku fuma kakwe ka malembe ya 1 000 va ta va ni ntshembo wo hanya hilaha ku nga heriki—ntsena loko va kombisa ripfumelo ra xiviri eka yena.

“Loyi a kombisaka ripfumelo eka mina, hambiloko a fa, u ta hanya.”Yohane 11:25

Endzhaku ko vula marito wolawo lama hlamarisaka malunghana ni ku pfuxiwa ka lava feke, Yesu u vutise Marta xivutiso lexi tlhontlhaka mianakanyo, a ku: “‘Xana wa swi kholwa leswi ke?’ A ku eka yena: ‘Ina, Hosi; ndzi khorwile leswaku u Kreste N’wana wa Xikwembu.’” (Yohane 11:26, 27) Ku vuriwa yini hi wena—xana u nga tsakela ku va ni ntshembo wo fana ni lowu Marta a a ri na wona? Goza ro sungula i ku nghenisa vutivi malunghana ni xikongomelo xa Xikwembu hi vanhu. (Yohane 17:3; 1 Timotiya 2:4) Vutivi byo tano byi nga endla leswaku u va ni ntshembo. Ha yini u nga kombeli Timbhoni ta Yehovha ti ku kombisa leswi Bibele yi swi dyondzisaka hi mhaka leyi? Ti ta swi tsakela ku bula na wena hi ntshembo wo hlamarisa wa ku pfuxiwa ka lava feke.

^ ndzim. 2 Vona xihloko lexi nge “Rifu A Hi Makumu Ya Swilo Hinkwaswo!” eka tluka 6 ra nkandziyiso lowu.

^ ndzim. 9 Leswaku u kuma rungula leri engetelekeke malunghana ni xitshembiso lexi nga eBibeleni xa ku pfuxiwa ka lava feke enkarhini lowu taka, hlaya ndzima 7 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.