Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2013

 BIBELE YI HUNDZULA VUTOMI BYA VANHU

“Vanhu Vo Tala A Va Ndzi Venga”

“Vanhu Vo Tala A Va Ndzi Venga”
  • LEMBE RO VELEKIWA: 1978

  • TIKO: CHILE

  • MATIMU YAKWE: A A RI NA MADZOLONGA SWINENE

VUTOMI BYA MINA:

Ndzi kulele eSantiago, ntsindza wa Chile, exidorobanini lexi swidzidziharisi ni vugevenga a swi tolovelekile. Loko ndzi ri ni ntlhanu wa malembe, Tatana u dlayiwile. Endzhaku ka sweswo, Manana u tshame ni wanuna loyi a a ri ni tihanyi. A a tshamela ku hi ba mina na Manana. Hambileswi ku hundzeke malembe yo tala, swa ha ndzi kharhata.

Loko ndzi ri karhi ndzi kula, ndzi tekelele mikhuva yo biha hi ku va na madzolonga swinene. A ndzi yingisela vuyimbeleri bya huwa, ndzi nwa ku tlula mpimo naswona a ndzi pfa ndzi tirhisa swidzidziharisi. Nkarhi ni nkarhi a ndzi lwa ni vaxavisi va swidzidziharisi eswitarateni, lava ringeteke ku ndzi dlaya minkarhi yo hlayanyana. Eka xiendlakalo xin’wana, ntlawa wun’wana wo biha wu thole wanuna un’wana wa tihanyi leswaku a ndzi dlaya kambe ndzi swi kotile ku baleka hambileswi a ndzi ri na mbanga hikwalaho ko tlhaviwa. Eka xiendlakalo xin’wana, ntlawa wa vaxavisi va swidzidziharisi wu ndzi kombetele hi xibamu enhlokweni kutani wu ringeta ku ndzi sunga.

Hi lembe ra 1996, ndzi rhandzane na Carolina naswona hi tekanile hi 1998. Endzhaku ka loko n’wana wa hina wa jaha wa mativula a velekiwile, ndzi sungule ku tsemeka nhlana tanihi leswi madzolonga lawa a ndzi ri na wona se a ma fana ni ya tata wa mina wa vumbirhi, a ndzi xanisa ndyangu wa mina. Kutani ndzi lave mpfuno endhawini leyi ndzi tshamaka eka yona leyi ku pfuniwaka vanhu lava godzomberiweke hi swidzidziharisi. Ndzi kume vutshunguri kambe a byi ndzi pfunanga nchumu. Ndzi hambete ndzi hlundzukisiwa hi xilo xin’wana ni xin’wana lexitsongo; a ndzi nga ha lawuleki. Leswaku ndzi tshika ku xanisa ndyangu wa mina, ndzi ringete ku tidlaya. Nkateko wa kona, ndzi tsandzekile.

Ndzi hete malembe yo tala ndzi ri karhi ndzi tibyela leswaku Xikwembu a xi kona, kambe a ndzi swi lava ku pfumela eka xona. Kutani ndzi tihlanganise ni ntlawa wa vukhongeri ku ringana nkarhi wo karhi. Hi nkarhi wolowo, nsati wa mina a dyondza Bibele ni Timbhoni ta Yehovha. A ndzi ti venga Timbhoni naswona minkarhi yo tala a ndzi ti khahla. Kambe minkarhi hinkwayo a ti ndzi angula hi ndlela yo rhula ku nga leswi a ndzi nga swi rindzelanga.

Siku rin’wana Carolina u ndzi kombele leswaku ndzi hlaya Pisalema 83:18 eBibeleni ya mina. Ndzimana yoleyo yi swi veka erivaleni leswaku vito ra Xikwembu i Yehovha. Ndzi hlamarile loko ndzi xiya leswaku evukhongerini bya mina a ndzi dyondze hi xikwembu  ku nga ri hi Yehovha. Eku sunguleni ka lembe ra 2000, na mina ndzi sungule ku dyondza Bibele ni Timbhoni.

NDLELA LEYI BIBELE YI HUNDZULEKE VUTOMI BYA MINA HA YONA:

Loko ndzi ya emahlweni ndzi endla nhluvuko ndzi kume nchavelelo loko ndzi dyondza leswaku Yehovha u ni ntwela-vusiwana naswona i Xikwembu lexi rivalelaka. Hi xikombiso eka Eksoda 34:6, 7, Bibele yi hlamusela Yehovha tanihi “Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso, la hlayiselaka vanhu va magidi musa wa rirhandzu, la rivalelaka xihoxo ni ku tlula nawu ni xidyoho.”

Ndzi kume nchavelelo loko ndzi dyondza leswaku Yehovha u ni ntwela-vusiwana naswona wa rivalela

Nilokoswiritano, a swi nga olovi ku tirhisa leswi a ndzi swi dyondza. A ndzi tibyela leswaku a ndzi nge pfuki ndzi swi kotile ku lawula madzolonga ya mina. Nkarhi hinkwawo loko ndzi tsandzeka, Carolina a ndzi khutaza hi rirhandzu. U ndzi tsundzuxe leswaku Yehovha u ma xiyile matshalatshala ya mina. Nseketelo wakwe wu ndzi nyike matimba ya leswaku ndzi ya emahlweni ndzi ringeta ku tsakisa Yehovha hambileswi a ndzi pfa ndzi titwa ndzi nga ha ri na ntshembo.

Siku rin’wana, Alejandro, loyi a a ndzi dyondzisa u ndzi kombele leswaku ndzi hlaya Vagalatiya 5:22, 23. Tindzimana teto ti vula leswaku mbhandzu wa moya wa Xikwembu i “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.” Alejandro u ndzi byele leswaku loko ndzi lava ku va ni timfanelo teto a swi nga titsheganga hi matimba ya mina, kambe a swi titshege hi moya lowo kwetsima wa Xikwembu. Ntiyiso wolowo wu cince langutelo ra mina hi ku helela!

Endzhaku, ndzi ye eka ntsombano lowukulu wa Timbhoni ta Yehovha. Ku hleleka, ni ndlela leyi a ku base ha yona ni xinghana lexi ndzi xi voneke kwalaho swi ndzi tiyisekise leswaku ndzi kume vukhongeri bya ntiyiso. (Yohane 13:34, 35) Ndzi khuvuriwe hi February 2001.

NDLELA LEYI NDZI VUYERIWEKE HA YONA:

A ndzi ri wanuna wa madzolonga kambe Yehovha u ndzi pfunile ndzi va munhu wo rhula. Hakunene u ndzi ntshunxe entlhan’wini lowu a ndzi phaseke eka wona. Vanhu vo tala a va ndzi venga naswona a ndzi va soli. Hambiswiritano, sweswi ndzi tiphina hi ku tirhela Yehovha swin’we ni nsati wa mina ku katsa ni vana va mina vambirhi va majaha.

Maxaka na vanghana va mina va khale ya va hlamarisa ndlela leyi ndzi cinceke ha yona. Vuyelo bya kona hileswaku van’wana va tsakele ku dyondza ntiyiso wa Bibele. Ndzi tlhele ndzi va ni lunghelo ro pfuna van’wana leswaku va tiva Yehovha. Hakunene ndzi ve ni ntsako loko ndzi vona ntiyiso wa Bibele wu hundzula vutomi bya vona!