Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2013

 NHLOKO-MHAKA YA XIFUNENGETO | BIBELE YI TAMELE RUNGULA RIHI?

“Hi Kume Mesiya”!

“Hi Kume Mesiya”!

Kwalomu ka malembe-xidzana ya mune endzhaku ka loko xiphemu xa buku yo hetelela ya Bibele ya Xiheveru xi tsariwile, vuprofeta bya Mikiya malunghana na Mesiya byi hetisekile: Yesu u velekiwe eBetlehema. Endzhakunyana ka kwalomu ka malembe ya 30, hi 29 C.E., xiphemu xo sungula xa vuprofeta bya Daniyele malunghana ni ku ta ka Mesiya xi hetisekile. Yesu u khuvuriwile naswona Xikwembu xi n’wi tote hi moya lowo kwetsima. Hi nkarhi lowu faneleke, Mesiya loyi a ku ri khale a rindzeriwile, ku nga Mbewu, u fikile!

Hi ku hatlisa, Yesu u sungule vutirheli byakwe, “a chumayela ni ku vula mahungu lamanene ya mfumo wa Xikwembu.” (Luka 8:1) Hilaha swi profetiweke hakona, Yesu u tikombise a ri ni musa, a ri ni ku rhula ni ku tlhela a khathala hi van’wana. Tidyondzo takwe a ti twisiseka ti tlhela ti tsakisa naswona u horise vanhu va “vulema bya mixaka hinkwayo,” a kombisa leswaku Xikwembu xi na yena. (Matewu 4:23) Vanhu lavakulu ni lavatsongo va ye eka Yesu ivi va gimeta hi ku vula leswi: “Hi kume Mesiya”!—Yohane 1:41.

Yesu u profete leswaku emahlweni ko va Mfumo wakwe wu fuma hi ku helela, misava a yi ta va ni tinyimpi, ku tsekatseka ka misava ni swiphiqo swin’wana swo tala. U khutaze hinkwavo leswaku va ‘tshama va rindzile.’—Marka 13:37.

Yesu a a ri munhu loyi a a hetisekile loyi a hambeteke a yingisa Xikwembu, kambe a a ri ni valala lava eku heteleleni va endleke leswaku a dlayiwa. Kambe rifu rakwe ri nyikele xitlhavelo lexi hetisekeke xa leswaku hi tlhela hi hanya tanihi leswi Adamu na Evha va hi ngheniseke exidyohweni lexi a xi endle leswaku hi lahlekeriwa hi vutomi lebyi nga heriki eParadeyisini.

Rifu ra Yesu ri hetisise vuprofeta, tanihi leswi Xikwembu xi n’wi pfuxeke a ri xivumbiwa xa moya lexi nga ni matimba endzhaku ka masiku manharhu. Kutani Yesu u humelele eka vadyondzisiwa vakwe vo tlula 500. Emahlweni ko va a tlhandlukela etilweni, Yesu u lerise valandzeri vakwe leswaku va yisa mahungu lamanene malunghana na yena ni Mfumo wakwe eka “vanhu va matiko hinkwawo.” (Matewu 28:19) Xana xiavelo xexo va xi tamele hi ndlela yihi leyi humelelaka?

Byi sekeriwe eka Matewu, Marka, Luka, Yohane na 1 Vakorinto.