Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA SEPTEMBER 2013

 TSHINELA EKA XIKWEMBU

“Xikwembu Xi Rhandza Munyiki La Tsakeke”

“Xikwembu Xi Rhandza Munyiki La Tsakeke”

I nyiko ya njhani leyi nga ku endlaka u titwa u rhandziwa? A swi kanakanisi leswaku vo tala va hina hi nga tsaka ku nyikiwa nyiko hileswi munhu loyi a hi nyikaka yona a susumetiwaka hi rirhandzu ematshan’weni yo hi nyika yona hileswi a bohekaka. Loko munhu a nyika un’wana nyiko, leswi n’wi susumetelaka ku endla tano hi swona swa nkoka. Leswi n’wi susumetelaka ku endla tano i swa nkoka eka hina. Kasi nchumu wa risima swinene hileswaku i swa nkoka eka Xikwembu. Xiya marito lama huhuteriweke ya muapostola Pawulo lama tsariweke eka 2 Vakorinto 9:7.

Ha yini Pawulo a tsale marito wolawo? A a lava ku khutaza Vakreste va le Korinto leswaku va seketela ntirho wo phalala vapfumeri-kulobye va le Yudiya. Xana u ringete ku sindzisa Vakorinto leswaku va nyikela? Ku hambana na sweswo, u tsale a ku: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” A hi kambisiseni xikhutazo lexi hi vukheta.

“Hilaha a boheke hakona embilwini yakwe.” Pawulo u vula leswaku Mukreste wa ntiyiso u nyika hileswi a endleke xiboho “embilwini yakwe.” Hi nkarhi lowu fanaka, Mukreste u anakanyisisa hileswi vagandzeri-kulobye va swi pfumalaka. Xidyondzi xin’wana xi vula leswaku hi ku ya hi ririmi ro sungula, rito leri nge “boheke” ri vula ku “hlela kumbe ku anakanyisisa ka ha ri emahlweni.” Kutani Mukreste u anakanyisisa hileswi vapfumeri-kulobye va swi pfumalaka, xisweswo a tivutisa leswaku a nga endla yini leswaku a va pfuna.—1 Yohane 3:17.

“Ku nga ri hi ku vilela kumbe hi ku sindzisiwa.” Pawulo u boxa mixaka yimbirhi ya ku nyika leyi Vakreste va faneleke va yi papalata, ku nga ku kanakana ni ku sindzisiwa. Rito ra Xigriki leri hundzuluxeriweke ri va “vilela,” hi ku kongoma ri vula “ku nyika u nga tsakanga.” Buku yin’wana yi vula leswaku munyiki loyi a vilelaka kumbe a kanakanaka, u nyika “mbilu yakwe yi ri karhi yi vava hileswi a faneleke a humesa mali.” Munyiki la sindzisiwaka u nyika hikuva a titwa a susumeteleka ku endla tano. I mani eka hina loyi a lavaka ku nyikiwa nyiko hi munyiki loyi a kanakanaka kumbe a sindzisiwaka?

“Xikwembu xi rhandza munyiki la tsakeke.” Pawulo u vula leswaku loko Mukreste a kala a endla xiboho xo nyika, u fanele a nyika a tsakile. Hakunene, munyiki loyi a susumetiwaka hi leswinene u va ni ntsako. (Mintirho 20:35) Vanhu hinkwavo va ta swi vona leswaku loyi a nyikaka u tsakile. Entiyisweni, rito leri nge “tsakeke” ri nga vula ndlela leyi munhu a titwaka ha yona ni ndlela leyi a vonakaka a tsake ha yona. Munyiki la tsakeke u hi endla hi tsaka. U tlhela a tsakisa Xikwembu. Vuhundzuluxeri byin’wana byi ri: “Xikwembu xi rhandza vanhu lava rhandzaka ku nyika.”—Contemporary English Version.

“Xikwembu xi rhandza vanhu lava rhandzaka ku nyika”

Vakreste lava nyikaka va kongomisiwa hi marito lama huhuteriweke ya muapostola Pawulo. Ku nga khathariseki leswaku hi nyikela hi nkarhi wa hina, matimba kumbe swilo swa hina, a hi nyikeni hi ku tirhandzela naswona hi tsundzuka leswaku hi kuma ntsako lowukulu hi ku hanana eka van’wana, ngopfu-ngopfu lava pfumalaka. Ku nyika ko tano a ku nge endli leswaku hi tsaka ntsena kambe ku ta tlhela ku endla leswaku hi rhandziwa hi Xikwembu, hikuva “xi rhandza munyiki la tsakeke.”

Tindzimana ta Bibele leti u nga ti hlayaka hi September

Vakorinto wo Sungula ni wa Vumbirhi