Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  September 2013

Tinhlamulo Ta Swivutiso Swa Bibele

Tinhlamulo Ta Swivutiso Swa Bibele

U nga endla njhani leswaku u va ni ntsako evukatini?

Ndzayo ya Bibele malunghana ni ku va ni ntsako evukatini ya tirha hikuva yi huma eka Musunguri wa vukati, ku nga Yehovha Xikwembu. Yi hi dyondzisa ku hlakulela timfanelo leti nga endlaka leswaku ku va ni ntsako evukatini ni ku hi lemukisa malunghana ni leswi nga byi onhaka. Yi tlhela yi hi dyondzisa ndlela leyi hi nga vulavurisanaka ha yona leswaku hi va ni ntsako evukatini.—Hlaya Vakolosa 3:8-10, 12-14.

Vavanuna ni vavasati lava tekaneke va fanele va xiximana. Loko havumbirhi bya vona va amukela mintirho leyi Xikwembu xi va nyikeke yona evukatini, va nga va ni ntsako.—Hlaya Vakolosa 3:18, 19.

I yini lexi endlaka leswaku vukati byi khomelela?

Vatekani va nga tshama swin’we loko va rhandzana. Xikwembu xi hi dyondzisa ndlela leyi hi nga rhandzanaka ha yona. Xona ni N’wana wa xona, Yesu, i swikombiso leswinene swa rirhandzu leri pfumalaka vutianakanyi.—Hlaya 1 Yohane 4:7, 8, 19.

Loko vavanuna ni vavasati lava tekaneke va xixima vukati tanihi lunghiselelo ra Xikwembu, va ta tshama swin’we. Xikwembu xi endle leswaku wanuna ni wansati va tshama swin’we hilaha ku nga heriki leswaku ndyangu wu ta va lowu sirhelelekeke. Swa koteka leswaku vukati byi khomelela hikuva Xikwembu xi endle vavanuna ni vavasati va ri ni vuswikoti byo hetisisa swilaveko swa vona swa nyama ni swa mintlhaveko. Nakambe xi va endle hi xifaniso xa xona va ri ni vuswikoti byo tekelela rirhandzu ra xona.—Hlaya Genesa 1:27; 2:18, 24.

DYONDZA SWO TALA

U NGA VA NI NDYANGU LOWU TSAKEKE

Titshege Hi Xikwembu Leswaku U Va Ni Vukati Lebyi Tsakisaka

Ku tirhisa swivutiso swimbirhi swo olova swi nga ku pfuna leswaku u antswisa vukati bya wena.

XALAMUKA!

Ndlela Yo Pfumelelana Ni Swiyimo

Magoza ya mune lama nga pfunaka wena ni nkataku leswaku mi papalata ku holova kutani mi kuma ntlhantlho mi ri vambirhi.