Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA AUGUST 2013

 TSHINELA EKA XIKWEMBU

“Timfanelo Ta Xona Leti Nga Vonakiki Ta Voniwa”

“Timfanelo Ta Xona Leti Nga Vonakiki Ta Voniwa”

Xana wa pfumela leswaku Xikwembu xi kona? Loko swi ri tano, xana u ni vumbhoni bya leswaku xi kona? Ntiyiso hileswaku hi rhendzeriwe hi vumbhoni bya leswaku ku ni Muvumbi loyi a tlhariheke, loyi a nga ni matimba ni rirhandzu. Xana hi byihi vumbhoni lebyi nga kona naswona byi khorwisa ku fikela kwihi? Leswaku u kuma nhlamulo, xiya marito ya muapostola Pawulo loko a tsalela Vakreste va le Rhoma.

Pawulo u te: “Hikuva timfanelo ta xona [Xikwembu] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona, lerova a va swi koti ku tiyimelela.” (Varhoma 1:20) Hilaha Pawulo a vuleke hakona, ntumbuluko wu swi kombisa kahle leswaku ku ni Muvumbi hakunene. A hi ma kambisiseni hi vukheta marito ya Pawulo.

Pawulo u vule leswaku timfanelo ta Xikwembu a ti vonaka “ku sukela loko misava yi tumbuluxiwile ku ya emahlweni.” Hi ku ya hi mongo, rito ra Xigriki leri hundzuluxeriweke ri ku “misava” a ri vuli pulanete ya Misava. Kambe ri vula vanhu. * Hikwalaho, Pawulo u vula leswaku ku sukela loko vanhu va tumbuluxiwa, a va ti vona timfanelo ta Muvumbi hikwalaho ka swilo leswi a swi vumbeke.

Vumbhoni byebyo byi kona hinkwako-nkwako. A byi fihliwanga eka ntumbuluko kambe bya “voniwa.” Eka swilo leswikulu ni leswitsongo, ntumbuluko wu swi veka erivaleni leswaku ku ni Muvumbi ni leswaku u ni timfanelo letinene. Ndlela leyi Xikwembu xi vumbeke swilo ha yona yi kombisa leswaku xi ni vutlhari. Tilo leri teleke hi tinyeleti ni magandlati ya le lwandle swi kombisa matimba ya xona. Swakudya swo hambana-hambana swo nandziha ni ku xonga ka loko dyambu ri xa ni loko ri pela swi kombisa rirhandzu leri xi nga na rona eka vanhu.—Pisalema 104:24; Esaya 40:26.

Xana vumbhoni lebyi byi le rivaleni ku fikela kwihi? Byi le rivaleni lerova lava nga byi voniki ni lava alaka leswaku Xikwembu xi kona “a va swi koti ku tiyimelela.” Xidyondzi xin’wana xi byi hlamusela hi ndlela leyi: Anakanya hi muchayeri loyi a honisaka mfungho lowu nge “Gondzo Ri Pfariwile—Jikela eXimatsini.” Phorisa ra n’wi yimisa kutani ri n’wi tlhava thikithi. Muchayeri u ringeta ku tiyimelela a vula leswaku a nga wu vonanga mfungho. Kambe phorisa a ri swi twisisi hikuva mfungho lowu wu vekiwe erivaleni naswona muchayeri u vona kahle. Handle ka sweswo, tanihi muchayeri, u ni vutihlamuleri bya ku vona mimfungho yo tano ni ku yi landzela. Swi tano ni hi vumbhoni lebyi nga eka ntumbuluko bya leswaku Xikwembu xi kona. “Mfungho” wolowo wu lo dla erivaleni! Leswi hi nga swivumbiwa leswi nga ni vuswikoti bya ku ehleketa, ha swi kota ku wu vona. A ku na lexi hi nga tiyimelelaka ha xona loko hi wu honisa.

Ntumbuluko wu swi kombisa kahle leswaku ku ni Muvumbi hakunene

Hakunene, ntumbuluko wu hi dyondzisa swo tala hi Muvumbi wa hina. Kambe ku ni buku yin’wana leyi hi dyondzisaka swo tala swinene hi yena, ku nga Bibele. Eka yona hi nga kuma tinhlamulo ta xivutiso lexi xa nkoka: Hi xihi xikongomelo xa Xikwembu hi misava ni vanhu lava tshamaka eka yona? Ku kuma nhlamulo ya xivutiso lexi xa nkoka swi nga ku pfuna leswaku u tshinela swinene eka Xikwembu lexi ‘timfanelo ta xona ti voniwaka’ emisaveni leyi hi rhendzeleke.

Tindzimana ta Bibele leti u nga ti hlayaka hi August

Varhoma 1-16

^ ndzim. 5 Bibele yi tlhela yi vulavula hi “misava” tanihi leyi nga ni nandzu wa xidyoho naswona yi lavaka muponisi, leswi swi swi kombisaka kahle leswaku hi ku ya hi mongo, rito leri ri kombetela eka vanhu ku nga ri misava.—Yohane 1:29; 4:42; 12:47.