Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JULY 2013

Xana U Nga Byi Tshemba Vukhongeri Loko Swi Ta Eka Nyimpi?

Xana U Nga Byi Tshemba Vukhongeri Loko Swi Ta Eka Nyimpi?

Alberto u tirhe eka vuthu ra nyimpi ku ringana malembe ya khume. U ri: “Mufundhisi wa hina a hi katekisa, hi ku vula leswaku ‘Xikwembu a xi ve na n’wina.’ Kambe ndzi anakanye ndzi ku, ‘Ndzi ya eku dlayeni kambe Bibele yi vula leswaku “u nga tshuki u dlaya.”’”

Ray a a ri eka vuthu ra le matini eka Nyimpi ya Vumbirhi ya Misava. Siku rin’wana u vutise mufundhisi a ku: “U ta exikepeni kutani u khongelela mavuthu ya nyimpi leswaku ma hlula. Xana valala a va endli leswi fanaka?” Mufundhisi u hlamule hi ku vula leswaku Hosi yi tirha hi tindlela leti nga twisisekiki.

Loko nhlamulo yoleyo yi nga ku enerisi, a wu wexe.

XANA BIBELE YI DYONDZISA YINI?

Yesu u vule leswaku xin’wana xa swileriso leswikulu swa Xikwembu i ku “rhandza warikwenu kukota loko u tirhandza.” (Marka 12:31) Xana Yesu u veke swipimelo swa leswaku hi fanele hi rhandza warikwenu hi ku ya hileswaku u tshama kwihi kumbe i wa rixaka rihi? Doo! U byele vadyondzisiwa vakwe a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) Ku rhandzana ka vona a ku ta va mfungho lowu xiyekaka. A va ta nyikela hi vutomi bya vona hikwalaho ka munhu un’wana ku tlula ku dlaya van’wana.

Vakreste vo sungula a va hanya hi ku pfumelelana ni marito ya Yesu. The Encyclopedia of Religion yi ri: “Vafundhisi vo sungula va kereke, ku katsa na Tertullian na Origen va pfumela leswaku Vakreste a va yirisiwile ku dlaya munhu, ku nga nawu lowu a wu va sivela ku hlanganyela eka vuthu ra Varhoma.”

XANA TIMBHONI TA YEHOVHA TI SWI ENDLISA KU YINI?

Tanihi leswi Timbhoni ta Yehovha ti tshamaka eka tiko rin’wana ni rin’wana, tin’wana tona ti tikuma ti ri karhi ti tshama ematikweni lama nga ni timholovo. Ti tikarhatela ku hlayisa mfungho wa tona lowu xiyekaka wa rirhandzu.

Xana vafundhisi va dyondzisa rirhandzu ra xiviri ra Vakreste?

Hi xikombiso, hi 1994 eka hasahasa ya tinxaka exikarhi ka Mahutu ni Matutsi eRwanda, Timbhoni ta Yehovha ti hambete ti hlayisa vukala-tlhelo bya tona. Hakanyingi Timbhoni ta rixaka rin’wana a ti veka vutomi bya tona ekhombyeni hi ku tumbeta ta rixaka rin’wana. Loko Timbhoni timbirhi ta Mahutu leti tumbeteke vamakwerhu va tona va Matutsi ti kumiwile, masocha ya vuthu ra Mahutu lama vuriwaka Interahamwe ma vule leswi: “Mi fanele mi fa hikuva mi pfune Matutsi leswaku ma baleka.” Khombo ra kona, Timbhoni teto ta Mahutu hatimbirhi ka tona ti dlayiwile.—Yohane 15:13.

U anakanya yini: Xana swiendlo swa Timbhoni ta Yehovha swi pfumelelana ni marito ya Yesu malunghana ni rirhandzu ra ku pfumala vutianakanyi?