Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA JULY 2013

Xana U Nga Byi Tshemba Vukhongeri Loko Swi Ta Eka Mali?

Xana U Nga Byi Tshemba Vukhongeri Loko Swi Ta Eka Mali?

Estelle * a a nghena kereke ni vana vakwe vanharhu. U ri: “Ndzi byele mufundhisi wa mina leswaku ndzi lava ku dyondza Bibele.” Kambe a nga kalanga a n’wi dyondzisa. Eku heteleleni, u tshike kereke. U ya emahlweni a ku: “Varhangeri va kereke va ndzi tsalele papila kutani va vula leswaku loko ndzi nga ha swi koti ku ta, ndzi nga rhumela mali ntsena. Ndzi anakanye ndzi ku, ‘A va na mhaka ni leswaku ndza ya kumbe a ndzi yi; vona vo lava mali ya mina ntsena.’”

Angelina loyi ku nga khale a nghena kereke u ri: “Ekerekeni ya hina a ku fambisiwa xirhundzu ku ringana minkarhi yinharhu loko hi ri karhi hi gandzela naswona a ku languteriwe leswaku hi nyikela minkarhi hinkwayo. Nkarhi na nkarhi a va lava mali. Ndzi anakanye ndzi ku, ‘Vanhu lava a va na moya wa Xikwembu.’”

Xana vukhongeri lebyi nga endhawini ya ka n’wina byi tirhisa tindlela to karhi leswaku byi sindzisa vanhu ku nyikela? Xana sweswo swi fambisana ni Bibele?

I YINI LESWI BIBELE YI SWI DYONDZISAKA?

Yesu, musunguri wa Vukreste u te: “Mi amukele mahala, nyikani mahala.” (Matewu 10:8) Rungula ra risima ra Bibele a ri xavisiwi naswona ri fanele ri nyikiwa hinkwavo lava ri lavaka.

Xana Vakreste vo sungula a va swi hakela njhani swilaveko swa vandlha?

Un’wana ni un’wana a a nyikela “hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Muapostola Pawulo u te: ‘Ku chumayela ka hina mahungu lamanene eka n’wina hi ku endle hi ri karhi hi tirha vusiku ni nhlikanhi, leswaku hi nga rhwexi ni un’we wa n’wina ndzhwalo wo tika.’ (1 Vatesalonika 2:9) Pawulo a a rhunga matende leswaku a seketela ntirho wakwe wo chumayela.—Mintirho 18:2, 3.

XANA TIMBHONI TA YEHOVHA TI SWI ENDLISA KU YINI?

Hi ntolovelo, Timbhoni ta Yehovha ti hlangana emiakweni yo saseka leyi vuriwaka Tiholo ta Mfumo. Xana ti swi kotisa ku yini ku hakelela swilaveko swa tona? A ti jika-jikisi puleti ya minyikelo, kumbe ku rhumela timvhilopho leswaku ti kombela minyikelo. Ematshan’weni ya sweswo, munhu un’wana ni un’wana loyi a tlangelaka lunghiselelo leri ra moya a nga hoxa minyikelo yakwe ebokisini ra minyikelo leri nga eHolweni ya Mfumo.

Xana vukhongeri byi fanele byi hakeleriwa njhani?

Swi le rivaleni leswaku magazini lowu wu lava mali leswaku wu kandziyisiwa ni ku rhumeriwa. Nilokoswiritano, u nge pfuki u vone swinavetiso leswi ku komberiwaka mali. Mhaka-nkulu i ku hangalasa ntiyiso wa Bibele.

U anakanya yini: Xana ndlela leyi ya ku hakelela swilaveko yi fambisana ni marito ya Yesu ni xikombiso xa Vakreste vo sungula?

^ ndzim. 2 Mavito man’wana enxaxamelweni wa swihloko leswi ma cinciwile.