Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  July 2013

 BIBELE YI HUNDZULA VUTOMI BYA VANHU

“A Ndza Ha Swi Lavi Ku Cinca Misava”

“A Ndza Ha Swi Lavi Ku Cinca Misava”
  • LEMBE RO VELEKIWA: 1966

  • TIKO: FINLAND

  • MATIMU YAKWE: MULWERI WA TA NTSHAMISANO

VUTOMI BYA MINA:

A ndzi rhandza ntumbuluko ku sukela loko ndza ha ri ntsongo. Hakanyingi ndyangu wa ka hina a wu tiphina hi ku ya emakhwatini ni le mativeni yo saseka lama nga ekusuhi ni doroba ra le kaya ra Jyväskylä eCentral Finland. Nakambe ndzi rhandza ni swiharhi. Loko ndza ha ri n’wana, a ndzi rhandza ku vukarha swimanga ni timbyana leswi a ndzi swi vona! Loko ndzi ri karhi ndzi kula, hakanyingi a ndzi karhatiwa hileswi vanhu a va khoma swiharhi hi ndlela yo biha. Hi ku famba ka nkarhi, ndzi joyine nhlangano wa ku yimela timfanelo ta swiharhi, laha ndzi hlanganeke ni vanhu lava a va ri ni mavonelo yo fana ni ya mina.

Hi lwele timfanelo ta swiharhi. Hi hangalase rungula, hi hlela ku macha leswaku hi kombisa ku vilela hikwalaho ka switolo leswi xavisaka swilo leswi endliweke hi madzovo ya swiharhi ni tilaboratori leti tirhisaka swiharhi ku ringeta swilo. Hi sungule nhlangano lowuntshwa wa ku sirhelela swiharhi. Leswi a hi endla hinkwaswo leswi hi nga swi kotaka leswaku nhlangano lowu wu humelela, hakanyingi valawuri a va hi karhata. Ndzi khomiwile ni ku yisiwa ehubyeni ku ringana minkarhi yo hlayanyana.

Handle ka ku va ndzi khathala hi swiharhi, a ndzi karhatiwa ni hi maxangu man’wana lama nga kona emisaveni. Eku heteleleni, ndzi ve eka minhlangano yo hlayanyana ku katsa wa Amnesty International na Greenpeace. Ndzi hete nkarhi wa mina leswaku ndzi seketela leswi va swi endlaka. A ndzi yimelela timfanelo ta lava xanisekaka, lava nga ni ndlala ni lava nga riki na swa vona.

Hambiswiritano, hakatsongo-tsongo ndzi xiye leswaku ndzi nge swi koti ku cinca misava. Hambileswi minhlangano leyi yi koteke ku lulamisa swiphiqo swi nga ri swingani leswitsongo, swiphiqo leswikulu a swo ya swi nyanya. A swi tikomba onge leswo biha a swi khumba misava hinkwayo naswona a ku nga ri na loyi a a khathala. Ndzi titwe ndzi hele matimba.

NDLELA LEYI BIBELE YI HUNDZULEKE VUTOMI BYA MINA HA YONA:

Leswi a ndzi hlunamile hileswi a ku ri hava lexi a ndzi ta xi endla, ndzi sungule ku anakanya hi Xikwembu ni Bibele. A ndzi tshame ndzi dyondza Bibele ni Timbhoni ta Yehovha. Hambileswi a ndzi nkhensa hileswi Timbhoni a ti ri ni musa  naswona a ti khathala hi mina, a ndzi nga si swi lunghekela ku cinca vutomi bya mina. Sweswi, swilo a swi cincile.

Ndzi sungule ku hlaya Bibele ya mina. Yi ndzi chavelerile swinene. Ndzi xiye leswaku tindzimana to tala ta le Bibeleni ti hi dyondzisa leswaku hi swi khoma kahle swiharhi. Hi xikombiso, Swivuriso 12:10 yi vula leswaku “lowo lulama u khathalela moya-xiviri wa xifuwo xakwe.” Ndzi twisise leswaku Xikwembu a hi xona xi vangaka swiphiqo leswi nga kona emisaveni. Ematshan’weni ya sweswo, swiphiqo swa hina swi nyanyise hi ku va vanhu vo tala va nga wu landzeli nkongomiso wa xona. Ndzi tsakile loko ndzi dyondza hi rirhandzu ra Yehovha ni ku lehisa mbilu.—Pisalema 103:8-14.

Hi nkarhi wolowo, ndzi kume xiphephana xo kombela buku leyi nge Xana Bibele Yi Dyondzisa Yini Hakunene? kutani ndzi xi rhumela. Ku nga si hundza nkarhi wo leha, ndzi endzeriwe hi mpatswa lowu nga Timbhoni kutani wu kombela ku dyondza na mina Bibele hiloko ndzi pfumela. Ndzi sungule ni ku ya eminhlanganweni ya Vukreste eHolweni ya Mfumo. Hikwalaho ka sweswo, ndzi sungule ku rhandza leswi a ndzi swi dyondza eBibeleni.

Ndzi nkhensa Bibele hileswi ndzi koteke ku endla ku cinca ko tala. Ndzi tshike ku dzaha ni ku va xindzendzele. Ndzi cince ndlela leyi a ndzi languteka ha yona ni mavulavulelo. Ndzi cince ni ndlela leyi a ndzi va languta ha yona valawuri. (Varhoma 13:1) Ndzi tshike mahanyelo ya mina yo biha, ku nga nchumu lowu a ndzi nga koti ku wu lawula.

Ku cinca loku ndzi tikeleke ku ku endla a ku ri ku va ni langutelo lerinene hi minhlangano ya ku lwela timfanelo ta swiharhi ni vanhu. Swi ndzi tekele nkarhi wo leha. Eku sunguleni, a ndzi twa onge ndzi ta va ndzi xenga minhlangano yoleyo loko ndzi yi tshika. Hambiswiritano, ndzi sungule ku tsakela mhaka ya leswaku Mfumo wa Xikwembu hi wona ntsena ntshembo wa xiviri eka misava ya hina. Ndzi endle xiboho xa ku tirhisa matimba ya mina hinkwawo leswaku ndzi seketela Mfumo lowu ni ku pfuna van’wana leswaku va dyondza hi wona.—Matewu 6:33.

NDLELA LEYI NDZI VUYERIWEKE HA YONA:

Tanihi mulweri, a ndzi ava vanhu hi mintlawa yimbirhi—lavanene ni lavo biha—naswona a ndzi teka vanhu tanihi lavanene kumbe vo biha. Kambe ndzi nkhensa Bibele hileswi ndzi tshikeke rivengo. Ematshan’weni ya sweswo, ndzi ringeta ku hlakulela rirhandzu ra Vukreste eka vanhu hinkwavo. (Matewu 5:44) Ndzi kombisa rirhandzu leri hi tindlela to tala ku katsa ni ku vulavula ni van’wana hi mahungu lamanene ya Mfumo wa Xikwembu. Ndza tsaka ku vona leswaku ntirho lowu lowunene wu endla leswaku ku va ni ku rhula ni ntsako naswona wu nyika vanhu ntshembo wa xiviri.

Ndzi kume ntsako hikwalaho ka leswi timhaka hinkwato ndzi ti tshikeleke Yehovha. Ndza tshemba leswaku tanihi leswi a nga Muvumbi, a nge pfumeli leswaku swiharhi ni vanhu va xanisiwa hilaha ku nga heriki kumbe a pfumelela misava ya hina yo saseka yi lovisiwa. Ku hambana na sweswo, hi ku tirhisa Mfumo wakwe, u ta lunghisa ku onhaka hinkwako loku endliweke. (Esaya 11:1-9) A ndzi tsakisiwi ntsena hi ku va ndzi tiva swilo leswi kambe ni hi ku pfuna van’wana leswaku va va ni ripfumelo eka swona. A ndza ha swi lavi ku cinca misava.