Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA MAY 2013

Xana U Ta Tshemba Xikwembu?

Xana U Ta Tshemba Xikwembu?

ANAKANYA u ri ni munghana loyi u n’wi tsakelaka swinene, kambe a endla swin’wana leswi u nga swi twisisiki. Van’wana va sola swiendlo swakwe kutani va kanakana swikongomelo swakwe, va vula leswaku munghana wa wena u ni tihanyi. Xana a wu ta hatlisela ku pfumelelana na vona kumbe a wu ta yimela ku twa leswaku munghana wa wena u ri yini hi mhaka leyi? Loko a nga ri kona leswaku a ta hlamusela leswi endlekeke, xana u nga lehisa mbilu ni ku nga n’wi avanyisi hi nkarhi wolowo?

Emahlweni ko va u hlamula, swi nga ha endleka leswaku u lava ku tiva leswi engetelekeke. U nga tivutisa u ku, ‘Xana hakunene ndzi n’wi tiva ku fikela kwihi munghana loyi naswona hi xihi xisekelo lexi ndzi nga na xona xo va ndzi n’wi xixima?’ Xivutiso xexo i xinene. Kambe xiya: Xana a hi nge tirhisi milawu leyi fanaka eka xivutiso lexi xa loko Xikwembu xi ri ni tihanyi?

Swi nga ha ku tikela ku twisisa swilo swin’wana leswi Xikwembu xi swi endleke kumbexana u nga ha karhatiwa hileswi xi swi pfumeleleke leswaku swi endleka. Ku ni vanhu vo tala lava nga ta ku byela leswaku Xikwembu xi ni tihanyi ni lava nga ta ku khutaza leswaku u kanakana swiendlo swa xona hilaha vona va endleke hakona. Xana u nga xi lehisela mbilu ni ku nga xi avanyisi ku fikela loko u tiva leswi engetelekeke? Nhlamulo yi nga titshega hileswaku u xi tiva kahle ku fikela kwihi Xikwembu. Tivutise, ‘Xana Xikwembu i munghana wa njhani eka mina?’

Loko vutomi bya wena byi tika, u nga ha ringeka ku vula leswaku Xikwembu a xi si tshama xi va munghana wa wena. Kambe ehleketa katsongo. Xana Xikwembu xi ni vutihlamuleri eka ku tikeriwa loku u langutanaka na kona evuton’wini bya wena—kumbe xi ni vutihlamuleri eka mikateko leyi u yi kumeke? Hilaha hi swi voneke hakona, Sathana i “mufumi wa misava leyi.” (Yohane 12:31) Xisweswo i Sathana loyi a vangaka gome ni vuhomboloki emisaveni leyi. Kutani xana u nge pfumeli leswaku ku nga hetiseki ka hina ni swiyimo leswi nga languteriwangiki hi swona swi endlaka leswaku hi va ni swiphiqo?

Xana Xikwembu xi ni vutihlamuleri eka ku tikeriwa loku u langutanaka na kona evuton’wini bya wena—kumbe xi ni vutihlamuleri eka mikateko leyi u yi kumeke?

Hi hala tlhelo, hi byihi vutihlamuleri lebyi Xikwembu xi nga na byona? Xiya leswi Bibele yi swi vulaka: leswaku Xikwembu i “Muendli wa tilo ni misava”; leswaku mintirho yakwe yi katsa mimiri ya hina ya nyama leyi “[endliweke] hi ndlela yo hlamarisa”; ni leswaku Yehovha i “Xikwembu lexi ku hefemula ka wena ku nga evokweni ra xona.” (Pisalema 124:8; 139:14; Daniyele 5:23) Xana sweswo hinkwaswo swi vula yini?

Swi vula leswaku vutomi bya hina hi byi kolota Muvumbi wa hina. (Mintirho 17:28) Swi vula leswaku nyiko ya vutomi, vuxongi bya misava leyi hi nga eka yona lebyi hi rhendzeleke, ku tiphina hi rirhandzu ni xinghana, ku tiphina hi ku kota ku twa nantswo, ku khoma swo karhi, mpfumawulo ni nun’hwelo—hinkwaswo ka swona i tinyiko leti humaka eka Xikwembu. (Yakobo 1:17) Xana a wu nge pfumeli leswaku mikateko yoleyo yi endla leswaku a va Munghana loyi a faneriwaka hi xindzhuti ni ku tshembiwa hi hina?

Swi nga ha endleka leswaku swa ku tikela ku tshemba Xikwembu. Kumbexana u titwa onge a wu si xi tiva kahle lerova u nga xi tshemba. Sweswo swa twisiseka. Eka swihloko leswi swo koma, hi nge swi koti ku hlamusela swivangelo swa leswaku ha yini van’wana va vula leswaku Xikwembu xi ni tihanyi. Kambe xana ku tiva Xikwembu ku antswa a swi vuyerisi? * Ha tshemba leswaku loko u ri karhi u endla tano, u ta ya u tiva ntiyiso hi Xikwembu. Xana xi ni tihanyi? Nikatsongo: “Xikwembu i rirhandzu.”—1 Yohane 4:8.

^ ndzim. 8 Hi xikombiso, kuma rungula leri engetelekeke malunghana ni leswaku ha yini Xikwembu xi pfumelela ku xaniseka eka ndzima 11 ya buku leyi nge, Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

 

DYONDZA SWO TALA

Ha Yini Xikwembu Xi Pfumelela Vubihi Ni Ku Xaniseka?

Vubihi byi sungule njhani naswona ha yini Xikwembu xi byi pfumelele byi ya emahlweni? Xana ku xaniseka ku ta kala ku hela?