Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA APRIL 2013

 TSHINELA EKA XIKWEMBU

“Hambetani Mi Kombela, Mi Ta Nyikiwa”

“Hambetani Mi Kombela, Mi Ta Nyikiwa”

“Hosi, hi dyondzise ndlela ya ku khongela.” (Luka 11:1) Xikombelo xexo xi endliwe hi un’wana wa vadyondzisiwa va Yesu. Eka nhlamulo yakwe, Yesu u kombetele eka swikombiso swimbirhi leswi hi dyondzisaka ndlela yo khongela leswaku hi twiwa hi Xikwembu. Loko u tshame u tivutisa loko Xikwembu xi swi twa swikhongelo swa wena, u ta tsakela ku twa nhlamulo ya Yesu.—Hlaya Luka 11:5-13.

Xikombiso xo sungula xi dzika eka munhu loyi a khongelaka. (Luka 11:5-8) Eka rungula rero, wanuna u endzeriwa hi muendzi nivusiku naswona a nga na swakudya swo n’wi fihluta. Eka muendzeriwa mhaka leyi i ya xihatla. Ku nga khathariseki leswaku i nkarhi muni, u ya ekaya ra munghana wakwe a kombela leswaku a n’wi lomba xinkwa. Eku sunguleni, munghana wakwe a nga swi lavi ku pfuka hikuva u etlele ni ndyangu wakwe. Kambe hikwalaho ka ku phikelela, muendzeriwa loyi a tiyimiseleke u hambeta a kombela kukondza eku heteleleni munghana wakwe a pfuka kutani a n’wi nyika swakudya. *

Xana xikombiso lexi xi hi dyondzisa yini malunghana ni xikhongelo? Yesu u hi byela leswaku hi fanele hi phikelela—hi hambeta hi kombela, hi lava ni ku gongondza. (Luka 11:9, 10) Ha yini? Xana Yesu u kombisa leswaku Xikwembu xa kanakana ku yingisa swikhongelo swa hina? Doo! Yinhla ya Yesu hileswaku ku hambana ni munghana loyi a kanakanaka, Xikwembu xi tiyimisele ku nyika vanhu lava nga ni ripfumelo eka xona swilo leswinene. Hi kombisa ripfumelo ro tano hi ku phikelela ka hina. Loko hi kombela hi ku phindha-phindha, hi kombisa leswaku hakunene hi lava leswi hi swi kombelaka naswona ha tshemba hakunene leswaku Xikwembu xi ta hi nyika swona—loko leswi hi swi kombelaka swi fambisana ni ku rhandza ka xona.—Marka 11:24; 1 Yohane 5:14.

Xikombiso xa vumbirhi xi dzika eka “Mutwi wa xikhongelo,” ku nga Yehovha. (Pisalema 65:2) Yesu u vutise a ku: “Xana hi wihi tatana exikarhi ka n’wina, loyi loko n’wana wakwe a kombela nhlampfi, swi nga ha endlekaka a n’wi nyika nyoka ematshan’weni ya nhlampfi? Kumbe loko a kombela tandza, a nga n’wi nyikaka xipame ke?” Nhlamulo yi le rivaleni—ku hava tatana loyi a khathalaka loyi a nga nyikaka n’wana wakwe swilo leswi nga ni khombo. Kutani Yesu u hlamusele leswi xifaniso xi vulaka swona: Loko vatatana lava nga hetisekangiki va kota ku “nyika vana va [vona] tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene”—nyiko leyikulu—eka vana vakwe va laha misaveni lava n’wi kombelaka! *Luka 11:11-13; Matewu 7:11.

Xikwembu xi tiyimisele ku nyika vanhu lava nga ni ripfumelo eka xona swilo leswinene

Xana xikombiso lexi xi hi dyondzisa yini hi Yehovha, “Mutwi wa xikhongelo”? Yesu wa hi rhamba leswaku hi vona Yehovha tanihi Tatana loyi a khathalaka loyi a tiyimiseleke ku hlamula eka swilaveko swa vana vakwe. Hikwalaho, vagandzeri va Yehovha va nga titwa va ntshunxekile ku tshinela eka yena hi swikombelo swa vona leswi nga embilwini. Nakambe hi ku tiva leswaku u lava swa kahle eka vona, hi ku olova va nga amukela nhlamulo yakwe eka swikombelo swa vona, hambiloko ku nga ri yona nhlamulo leyi a va lava yona. *

Tindzimana ta Bibele leti u nga ti hlayaka hi April

Luka 7-21

^ ndzim. 4 Xikombiso xa Yesu xi kombisa mukhuva lowu tolovelekeke. Vayuda a va teka ku kombisa malwandla tanihi ntirho wa nkoka swinene. Ndyangu a wu baka xinkwa lexi eneleke xa siku, kutani ku lombana a swi tolovelekile loko swakudya swi hela. Nakambe, loko wu swerile, ndyangu hinkwawo a wu etlela ehansi endlwini yin’we.

^ ndzim. 6 Hakanyingi Yesu u tirhise marito lama nge “hilaha ku tlurisaka swinene” ku kandziyisa ndlela leyi Xikwembu xi antswaka ha yona ku tlula vanhu.

^ ndzim. 7 Leswaku u dyondza leswi engetelekeke malunghana ni ndlela yo khongela ni ku tlhela u twiwa hi Xikwembu, vona ndzima 17 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.