Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA MARCH 2013

 TSHINELA EKA XIKWEMBU

“Hi Xihi Xileriso Xo Sungula Eka Hinkwaswo?”

“Hi Xihi Xileriso Xo Sungula Eka Hinkwaswo?”

I yini leswi Xikwembu xi swi languteleke eka hina? Xana ku ni milawu yo tala leyi hi faneleke hi yi landzela? Doo! Hi ku ya hi N’wana wa Xikwembu la nga swakwe, ku nga Yesu Kreste, leswi Xikwembu xi swi languteleke eka hina swi nga katsakanyiwa hi rito rin’we.—Hlaya Marka 12:28-31.

Xo sungula, a hi kambisiseni mongo wa marito ya Yesu. A a ri karhi a dyondzisa etempeleni hi Nisani 11, emahlweni ka masiku ma nga ri mangani ya ku fa kakwe. Valala va Yesu va n’wi jikijele hi swivutiso swin’wana swo tika, hikuva a va lava leswaku a endla xihoxo. Nkarhi wun’wana ni wun’wana, tinhlamulo ta yena a ti va siya va ri hava xo xi vula. Kutani Yesu u vutisiwe xivutiso lexi nge: “Hi xihi xileriso xo sungula eka hinkwaswo?”—Ndzimana 28.

Xexo a ku ri xivutiso xo tika. Vayuda van’wana a va phikizana hi leswaku eka milawu leyi tlulaka 600 leyi a yi endla Nawu wa Muxe hi wihi lowu a wu ri wo sungula kumbe lowu a wu ri wa nkoka swinene. Swi vonaka onge van’wana a va lwa hileswaku swileriso hinkwaswo swa ringana naswona i swa nkoka ni leswaku a swi hoxile ku ehleketa leswaku swin’wana i swa nkoka swinene ku tlula swin’wana. Xana Yesu a a ta xi hlamula njhani xivutiso xexo?

Yesu u hlamule hi ku boxa swileriso swimbirhi ku nga ri xin’we. Xo sungula u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Ndzimana 30; Deteronoma 6:5) Rito leri nge “mbilu,” “mianakanyo,” “moya-xiviri” ni “ntamu” ma nga va ni nhlamuselo leyi fanaka. * Nhlamuselo hi leswaku: Munhu u fanele a rhandza Yehovha hi ku helela. Buku yin’wana ya tinhlamuselo ta Bibele yi swi veka hi ndlela leyi: “Xikwembu xi fanele xi rhandziwa hi ku helela.” Xisweswo, loko u rhandza Xikwembu, u ta endla hinkwaswo leswi u nga swi kotaka leswaku siku ni siku u hanya hi ndlela leyi nga ta endla leswaku u tsakeriwa hi xona.—1 Yohane 5:3.

Xa vumbirhi, Yesu u te: “U fanele u rhandza warikwenu kukota loko u tirhandza.” (Ndzimana 31; Levhitika 19:18) Ku rhandza Xikwembu ni warikwenu swa fambisana. Loko u rhandza warikwenu swi kombisa leswaku wa xi rhandza Xikwembu. (1 Yohane 4:20, 21) Loko hi rhandza varikwerhu kukota loko hi tirhandza, hi ta va khoma hi ndlela leyi hi lavaka leswaku na hina va hi khoma ha yona. (Matewu 7:12) Xisweswo, hi kombisa leswaku hi rhandza Xikwembu lexi vumbeke hina—swin’we na vona—hi xifaniso xa xona.—Genesa 1:26.

Hinkwaswo leswi Yehovha a swi languteleke eka hina swi katsakanyiwa hi rito rin’we: rirhandzu

Xana swileriso swa ku rhandza Xikwembu ni warikwenu i swa nkoka hi ndlela yihi? Yesu u te: “A xi kona xin’wana xileriso lexikulu eka leswi.” (Ndzimana 31) Eka rungula leri fanaka, Yesu u vule leswaku swileriso hinkwaswo swi titshege hi swileriso leswimbirhi.—Matewu 22:40.

Ku tsakisa Xikwembu a swi tiki. Hinkwaswo leswi xi swi languteleke eka hina swi katsakanyiwa hi rito rin’we: rirhandzu. Minkarhi hinkwayo Xikwembu xi lava leswaku malandza ya xona ma xi rhandza naswona swi ta tshamisa sweswo. Kambe rirhandzu a ro kombisiwa ntsena hi marito kumbe mintlhaveko; ri kombisiwa hi swiendlo. (1 Yohane 3:18) Ha yini u nga dyondzi ndlela leyi u nga ri hlakulelaka ha yona ni ku kombisa leswaku wa n’wi rhandza Yehovha, Xikwembu lexi nga “rirhandzu”?—1 Yohane 4:8.

Tindzimana ta Bibele leti u nga ti hlayaka hi March

Marka 9-16Luka 1-6

^ ndzim. 6 EBibeleni, rito leri nge, “moya-xiviri” ri kombetela eka munhu a helerile. Hikokwalaho, “moya-xiviri” wu katsa “mbilu,” “mianakanyo” ni “ntamu.”

 

DYONDZA SWO TALA

Xana Wa Swi Endla Leswi Xikwembu Xi Swi Lavaka?

Ku yingisa Xikwembu i swa nkoka, kambe ku laveka leswi engetelekeke leswaku u va munghana wa xona.