Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA MARCH 2013

 SWIVUTISO SWA VAHLAYI . . .

Xana Yesu U Tshembise Muendli Wa Leswo Biha Vutomi Bya Le Tilweni?

Xana Yesu U Tshembise Muendli Wa Leswo Biha Vutomi Bya Le Tilweni?

Xivutiso xi tlakuka hileswi Yesu a tshembiseke khamba leri a ri hayekiwe etlhelo kakwe vutomi bya nkarhi lowu taka eParadeyisini. Yesu u te: “Ndzi tiyisile namuntlha ndzi ri eka wena, U ta va na mina eParadeyisini.” (Luka 23:43) Xiya leswaku Yesu a nga vulanga leswaku Paradeyisi yi ta va yi ri kwihi. Kutani, xana Yesu a a vula leswaku muendli wa leswo biha u ta ya na yena etilweni?

Xo sungula, a hi kambisiseni loko ku ri hileswaku muendli yoloye wa leswo biha a a ti fanelekela timfanelo to ya etilweni. Vanhu lava nga ni ntshembo wo ya hanya etilweni va fanele va khuvuriwa ematini ni hi moya lowo kwetsima, leswi vulaka ku va vadyondzisiwa va Yesu swin’we ni vana va Xikwembu. (Yohane 3:3, 5) Mfanelo yin’wana hi leswaku va yingisa milawu ya Xikwembu ya mahanyelo naswona va kombisa timfanelo to tanihi ku tshembeka ni ntwela-vusiwana. (1 Vakorinto 6:9-11) Va fanele va tlhela va hambeta va tshembeka eka Xikwembu ni le ka Kreste ku fikela loko va fa. (Luka 22:28-30; 2 Timotiya 2:12) Loko ntsena va fikelela leswi lavekaka va nga faneleka ku teka vutihlamuleri bya swilo leswi va nga ta va va swi khathalela etilweni, ku nga ku tirha tanihi vaprista ni tihosi na Kreste va fuma vanhu ku ringana malembe ya gidi.—Nhlavutelo 20:6.

Ku hambana ni sweswo, muendli wa leswo biha loyi a hayekiwe ekusuhi na Yesu a a ri khamba naswona u fe a ri khamba. (Luka 23:32, 39-41) I ntiyiso leswaku u kombise langutelo leri nga ni xichavo loko a byela Yesu a ku: “U ndzi tsundzuka loko u nghena emfun’weni wa wena.” (Luka 23:42) Nilokoswiritano, a a nga khuvuriwanga, a a nga ri mudyondzisiwa wa Yesu loyi a hlawuriweke ku ya hanya etilweni naswona a nga tikombisanga leswaku a lulamile kumbe ku tshembeka evuton’wini byakwe. Xana swa twala leswaku Yesu a a ta n’wi tshembisa ku va hosi ya le tilweni etlhelo ka valandzeri vakwe lava tshameke va tshembekile eka Xikwembu ku fikela emakumu?—Varhoma 2:6, 7.

Hi xikombiso: Loko munhu la ku yiveleke mali a kombela ku rivaleriwa, u nga ha endla xiboho xa leswaku a wu nge n’wi khomisi. Kambe xana u nga n’wi tshemba leswaku a nga fambisa bindzu ra wena kumbe a khathalela ndyangu wa wena? A wu ta lava leswaku vutihlamuleri byebyo byi nyikiwa munhu loyi u n’wi tshembaka. Hilaha ku fanaka, lava nyikiwaka ntshembo wo ya hanya etilweni va fanele va tikombisa leswaku va nga swi kota ku tshembeka ni ku hanya hi milawu yo lulama ya Xikwembu loko va ri karhi va fuma vanhu. (Nhlavutelo 2:10) Hambileswi mudyohi loyi a kombiseke ku hundzuka hi nkarhi wo hetelela wa vutomi byakwe, a a nga tshembekanga.

Kutani Yesu a nga n’wi byelanga mudyohi loyi leswaku a a ta va na yena etilweni hi rona siku rero. Yesu a nga yanga etilweni hi rona siku rero. Ematshan’weni ya sweswo, a a ri “embilwini ya misava”—esirheni—ku ringana masiku manharhu. (Matewu 12:40; Marka 10:34) Hambi ku ri endzhaku ka ku pfuxiwa kakwe, u tshame emisaveni ku ringana masiku ya 40 a nga si tlhelela etilweni. (Mintirho 1:3, 9) Xisweswo, a swi nga ta koteka leswaku mudyohi loyi a va na Yesu etilweni hi rona siku rero.

Kutani xana mudyohi loyi u nghene eParadeyisini yihi? Endzhaku ko pfuxiwa, u ta va eParadeyisini ya laha misaveni, leyi Yesu a nga ta va a yi fuma. (Mintirho 24:15; Nhlavutelo 21:3, 4) Leswaku u dyondza leswi engetelekeke hi Paradeyisi leyi ni leswi Xikwembu xi swi lavaka eka wena leswaku u nghena eka yona, bula ni un’wana wa Timbhoni ta Yehovha.