Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA MARCH 2013

 DYONDZISA VANA VA WENA

Petro Na Ananiya Va Vulavule Mavunwa—Xana Hi Nga Dyondza Yini?

Petro Na Ananiya Va Vulavule Mavunwa—Xana Hi Nga Dyondza Yini?

Hilaha u swi tivaka hakona, mavunwa i nchumu lowu u wu vulaka u ri karhi u swi tiva leswaku a hi ntiyiso. Xana u tshame u vulavula mavunwa? * Hambi ku ri vanhu van’wana lava kuleke lava rhandzaka Xikwembu va tshame va vulavula mavunwa. Swi nga ha endleka leswaku eBibeleni u tiva munhu loyi a tshameke a vulavula mavunwa. Vito rakwe i Petro, ku nga un’wana wa vaapostola va 12 va Yesu. A hi rhiyeni ndleve eka rungula leri landzelaka kutani hi xiya leswaku ha yini a vulavule mavunwa.

Endzhaku ka loko Yesu a khomiwile, u yisiwe ekaya ra muprista lonkulu. A ku ri exikarhi ka vusiku. Petro u nghene exivaveni xa le kaya ra muprista handle ko xiyiwa. Loko va ri endzilweni, nhwanyana la nga nandza wa muprista lonkulu u byele Petro leswaku wa n’wi tiva. U te: “Na wena, a wu ri na Yesu.” Hikwalaho ko khomiwa hi rhumbyana, Petro u kanetile.

Bibele yi vula leswaku endzhakunyana ‘nandza un’wana wa xisati u n’wi xiyile.’ U te: “Wanuna loyi a a ri na Yesu.” Hiloko Petro a tlhela kaneta. Endzhaku ka nkarhinyana, van’wana va ye eka Petro kutani va ku eka yena: “Hakunene u wun’wana wa vona.”

Petro u khomiwe hi rhumbyana. Kutani u tlhele a vulavula mavunwa ra vunharhu a ku: “A ndzi n’wi tivi munhu loyi!” Nkuku wu ringile. Yesu u langute Petro hiloko Petro a tsundzuka leswi Yesu a ha ku swi vula endzhakunyana ka tiawara ti nga ri tingani, u te: “Nkuku wu nga si ringa, u ta ndzi ala kanharhu.” Petro u humele ehandle kutani a rila hi xiviti. U tisole swinene!

Xana swilo swo fana ni sweswo swi nga humelela eka wena?— Swi nga ha endleka u ri exikolweni kutani u twa swichudeni swi vulavula hi Timbhoni ta Yehovha. Xin’wana xi nga ha ku: “A ti losi mujeko.” Kutani xin’wana xi engetela xi ku: “A ti ri lweli tiko ra tona.” Hambiswiritano, xin’wana xi nga ha ku, “Hakunene a hi Vakreste hikuva a ti tlangeli Khisimusi.” Kutani xin’wana xi nga ku languta kutani xi ku vutisa xi ku, “Xana a wu Mbhoni ya Yehovha?” Xana u ta ku yini?

 Emahlweni ko va swilo sweswo swi humelela, u fanele u lunghekela ku nyikela tinhlamulo letinene. Petro a a nga lunghekanga. Loko a vutisiwa, u vulavule mavunwa! Kambe u tisole swinene hikwalaho ka leswi a swi endleke naswona Xikwembu xi n’wi rivalerile.

Mudyondzisiwa un’wana wa Yesu loyi a vuriwaka Ananiya, na yena u vulavule mavunwa. Kambe yena ni nsati wakwe, Safira, Xikwembu a xi va rivalelanga. U pfumelelane ni nuna wakwe leswaku va vulavula mavunwa. A hi voneni leswaku ha yini Xikwembu xi nga va rivalelanga Ananiya na Safira.

Endzhaku ka masiku ya khume Yesu a siye vaapostola vakwe kutani a tlhelela eka Xikwembu etilweni, vanhu va kwalomu ka 3 000 va khuvuriwile eYerusalema. Vo tala a va huma ematikweni ya le kule leswaku va ta tlangela Nkhuvo wa Paseka endzhaku ka loko va ve vadyondzisiwa va Yesu, a va lava ku tshama nkarhi wo leha leswaku va ta dyondza swo tala hi ripfumelo ra vona lerintshwa. Kutani van’wana va vadyondzisiwa va Yesu va tirhise mali ya vona leswaku va va khathalela.

Ananiya ni nsati wakwe va xavise ndhawu yin’wana leswaku va ta pfuna vanhu lava a va ha ku khuvuriwa. Loko Ananiya a tisa mali eka vaapostola, u vule leswaku u humese ntsengo lowu heleleke lowu a xaviseke ndhawu yoleyo ha wona. Kambe a wu nga helelanga! A a tumbete mali yin’wana leswaku yi va ya yena! Xikwembu xi endle leswaku Petro a swi tiva hiloko a byela Ananiya a ku: “U hembele Xikwembu, ku nga ri vanhu.” Hi nkarhi wolowo, Ananiya a wela ehansi a fa! Endzhaku ka kwalomu ka tiawara tinharhu, nsati wakwe a nghena. Leswi a a nga swi tivi leswaku ku endleke yini eka nuna wakwe, na yena u vulavule mavunwa kutani a wela ehansi ivi a fa.

Hakunene leyi i dyondzo ya nkoka: Ku vulavula ntiyiso i swa nkoka! Hinkwerhu hi fanele hi dyondza dyondzo leyi! Kambe hinkwerhu ha swi endla swihoxo, ngopfu-ngopfu loko hi ri vana. Xana a wu tsaki hileswaku Yehovha wa ku rhandza naswona u ta ku rivalela hilaha a endleke hakona eka Petro?— Kambe tsundzuka, hi fanele hi vulavula ntiyiso. Loko ho tshuka hi endla xihoxo lexikulu xo vulavula mavunwa, hi fanele hi kombela ku rivaleriwa eka Xikwembu. Leswi hi swona leswi Petro a swi endleke naswona u rivaleriwile. Loko hi ringeta hi matimba leswaku hi nga ha tlheli hi vulavula mavunwa, Xikwembu xi ta hi rivalela!

Hlaya matsalwa lawa eBibeleni ya wena

^ ndzim. 3 Loko u hlayela n’wana, mfungho lowu wu endleriwe ku ku tsundzuxa leswaku u yima, kutani u rindzela leswaku a hlamula xivutiso xa kona.