Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  March 2013

Ku Pfuxiwa Ka Yesu Ku Vula Vutomi!

Ku Pfuxiwa Ka Yesu Ku Vula Vutomi!

KU PFUXIWA ka Yesu a ko va mhaka ya khale leyi humeleleke leyi nga vuliki nchumu eka hina. Muapostola Pawulo u vule nkoka wa yona loko a tsala a ku: “Kreste se u pfuxiwile eka lava feke, a va xirhangana xa lava va etleleke eku feni. Hikuva tanihi leswi rifu ri nga kona hikwalaho ka munhu, ni ku pfuka ka vafi ku va kona hikwalaho ka munhu. Hikuva tanihi leswi hinkwavo va faka eka Adamu, kutani hinkwavo va ta hanyisiwa eka Kreste.”—1 Vakorinto 15:20-22.

Yesu u pfuxiwe hi Nisani 16, 33 C.E., ku nga siku leri fanaka ni leri Vayuda a va ya evukwetsimelweni bya tempele eYerusalema leswaku va ya nyikela eka Yehovha Xikwembu swirhangana swa swilo swo sungula leswi va swi tshoveleke. Hi ku vula leswaku Yesu i xirhangana, Pawulo a a vula leswaku ku ta va ni vanhu van’wana lava nga ta pfuxiwa.

Marito lama landzelaka ya Pawulo ma kombisa leswi ku pfuxiwa ka Yesu ku endleke leswaku swi koteka. Pawulo u te: “Tanihi leswi rifu ri nga kona hikwalaho ka munhu, ni ku pfuka ka vafi ku va kona hikwalaho ka munhu.” Hikwalaho ka xidyoho ni ku nga hetiseki loku hi hundziseriweke kona hi Adamu, hinkwerhu ha fa. Hambiswiritano, hi ku nyikela hi vutomi byakwe lebyi hetisekeke tanihi gandzelo, Yesu u pfule ndlela ya leswaku vanhu va ntshunxiwa eka vuhlonga bya xidyoho ni rifu. Loko a katsakanya mhaka leyi, eka Varhoma 6:23, Pawulo u te: “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.”

Yesu hi byakwe u hlamusele leswi rifu ni ku pfuxiwa kakwe swi vulaka swona eka hina. Loko a vulavula hi yena n’wini u te: “N’wana wa munhu u fanele ku tlakuseriwa ehenhla, leswaku un’wana ni un’wana loyi a kholwaka eka yena a kuma vutomi lebyi nga heriki. Hikuva Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:14-16.

Ehleketa hi vutomi lebyi nga heriki lebyi eka byona ku nga riki ni switlhavi, ku xaniseka ni mahlomulo! (Nhlavutelo 21:3, 4) I ntshembo lowu tsakisaka hakunene! Xidyondzi xin’wana xi te: “Leswi masirha ma nga ha tsundzuxaka munhu leswaku vutomi byi komile, ku pfuxiwa ka vafi ku nga tiyisekisa munhu leswaku rifu ri ta susiwa ku nga ri khale.” Ina, ku pfuxiwa ka Yesu ku vula vutomi!