Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA FEBRUARY 2013

 TSHINELA EKA XIKWEMBU

“I Xikwembu . . . Xa Lava Hanyaka”

“I Xikwembu . . . Xa Lava Hanyaka”

Xana rifu ri ni matimba ku tlula Xikwembu? Nikatsongo! Xana rifu—kumbe “nala” un’wana ni un’wana—a nga va ni matimba ku tlula “Lowa Matimba Hinkwawo”? (1 Vakorinto 15:26; Eksoda 6:3) Xikwembu xi ni matimba yo herisa rifu hi ku pfuxa lava feke naswona xi tshembisa ku endla tano emisaveni ya xona leyintshwa. * Xana xitshembiso xexo xi tshembeka ku fikela kwihi? Yesu N’wana wa Xikwembu, u hi byela hi marito lama nga ta endla leswaku timbilu ta hina ti va ni ntshembo.—Hlaya Matewu 22:31, 32.

Loko a vulavula na Vasaduki lava a va nga pfumeli eka ku pfuka ka vafi, Yesu u te: “Loko ti ri ta ku pfuka ka lava feke, xana a mi hlayanga leswi Xikwembu xi nga mi byela swona, xi ku, ‘Hi mina Xikwembu xa Abrahama ni Xikwembu xa Isaka ni Xikwembu xa Yakobe’? A hi Xikwembu xa lava feke, kambe i xa lava hanyaka.” Laha Yesu a a kombetela eka bulo leri Xikwembu xi veke na rona na Muxe eka xihlahla lexi pfurhaka hi 1514 B.C.E. (Eksoda 3:1-6) Hi ku ya hi Yesu, marito lawa Yehovha a ma byeleke Muxe—“Hi mina Xikwembu xa Abrahama ni Xikwembu xa Isaka ni Xikwembu xa Yakobe”—ma kombisa leswaku xitshembiso xo pfuxa lava feke xi ta hetisisiwa hakunene. Njhani?

Xo sungula xiya rungula leri. Hi nkarhi lowu Yehovha a vulavuleke na Muxe, se a ku ri khale mupatriyaka Abrahama, Isaka na Yakobe va funye buwa—a ku ri malembe ya 329 Abrahama a file, Isaka ya 224 kasi Yakobe ya 197. Kambe Yehovha u vule a ku, “Hi mina”—ku nga ri leswaku “a ndzi ri”—Xikwembu xa vona. Yehovha u vulavule hi vapatriyaka lavanharhu onge hiloko va ha hanya. Ha yini?

Yesu wa hlamusela: “[Yehovha] a hi Xikwembu xa lava feke, kambe i xa lava hanyaka.” Anakanya katsongo hi nhlamuselo ya marito wolawo. Loko ku pfuka ka vafi ku nga ri kona, swi vula leswaku Abrahama, Isaka na Yakobe a va nge pfuxiwi. Loko a swi ri tano, Yehovha a ta va Xikwembu xa vanhu lava feke hilaha ku nga heriki. Sweswo a swi ta vula leswaku rifu ri ni matimba ku tlula Yehovha—onge hiloko a nga ri na matimba yo ntshunxa malandza yakwe yo tshembeka eka rifu.

Xana hi nga gimeta hi ku yini malunghana na Abrahama, Isaka na Yakobe ni malandza hinkwawo yo tshembeka ya Yehovha lama feke? Yesu u vule marito lawa, lawa ya nga ni matimba: “Hikuva eka xona hinkwavo va hanya.” (Luka 20:38) Hakunene, xikongomelo xa Yehovha xa ku pfuxa malandza ya xona yo tshembeka lama feke xi ta hetiseka lerova u anakanya ha wona onge hiloko ma ha hanya. (Varhoma 4:16, 17) Yehovha u ta hlayisa vanhu hinkwavo lava feke emianakanyweni yakwe leyi hetisekeke.

Yehovha u ni matimba ku tlula rifu

Xana ntshembo wo hlanganisiwa ni varhandziwa va wena lava feke wa ku tsakisa? Loko swi ri tano, tsundzuka leswaku Yehovha u ni matimba hinkwawo lawa a ma lavaka yo pfuxa vafi. Ku hava lexi nga n’wi sivelaka ku hetisisa xitshembiso xakwe xo pfuxa lava feke. Ha yini u nga dyondzi leswi engetelekeke malunghana ni xitshembiso xa ku pfuxiwa ka lava feke ni hi Xikwembu lexi nga ta swi hetisisa? Hakunene ku endla tano swi ta endla leswaku u tshinela ekusuhi na Yehovha, “Xikwembu . . . xa lava hanyaka.”

Tindzimana ta Bibele leti u nga ti hlayaka hi February

Matewu 22-28Marka 1-8

^ ndzim. 3 Leswaku u kuma rungula leri engetelekeke malunghana ni xitshembiso xa Xikwembu xa ku pfuxa lava feke leswaku va ta hanya emisaveni leyintshwa yo lulama, vona ndzima 7 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.