Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA FEBRUARY 2013

Muxe—Wanuna Wa Ripfumelo

Muxe—Wanuna Wa Ripfumelo

I YINI RIPFUMELO?

Hilaha ri tirhisiweke hakona eBibeleni, “ripfumelo” ri vula ku pfumela hilaha ku heleleke eka nchumu lowu sekeriweke eka vumbhoni lebyi tiyeke. Munhu loyi a nga ni ripfumelo eka Xikwembu wa tiyiseka leswaku xi ta hetisisa switshembiso swa xona hinkwaswo.

XANA MUXE U RI KOMBISE NJHANI RIPFUMELO?

Muxe u endle swiboho leswi kombiseke leswaku a a tshemba switshembiso swa Xikwembu. (Genesa 22:15-18) A a hanya emafurheni aEgipta, kambe u tshike lunghelo rero, “a hlawula ku xaniseka ni vanhu va Xikwembu ku ri ni ku tiphina hi xidyoho swa nkarhinyana.” (Vaheveru 11:25) Xana xexo a ku ri xiboho lexi a xi endleke handle ko anakanya, lexi a a ta tisola ha xona hi ku famba ka nkarhi? Doo, hikuva Bibele yi vula leswaku Muxe u [hambete] a tserhama onge hiloko a vona Loyi a nga vonakiki.” (Vaheveru 11:27) Muxe a nga tisolanga nikatsongo malunghana ni swiboho leswi a swi endleke leswi sekeriweke eka ripfumelo leri a a ri na rona hi switshembiso swa Xikwembu.

Muxe a a lava ku pfuna van’wana leswaku va va ni ripfumelo leri tiyeke eka Xikwembu. Hi xikombiso, xiya leswi endlekeke loko Vaisrayele va ehleketa leswaku a va phasekile exikarhi ka vuthu ra Faro ni Lwandle ro Tshwuka. Leswi a va chavisiwe hi khombo leri a ri vonaka ri ri ekusuhi ni ku endleka, Vaisrayele va huwelele Yehovha na Muxe. Xana Muxe a a ta angula njhani?

Swi nga endleka leswaku Muxe a a nga swi tivi leswaku Xikwembu a xi ri ekusuhi ni ku ava mati ya Lwandle ro Tshwuka hi le xikarhi, xisweswo xi endla leswaku ku va ni ndlela leyi Vaisrayele a va ta baleka ha yona. Hambiswiritano, Muxe a a tiyiseka leswaku Xikwembu a xi ta endla swo karhi leswaku xi sirhelela vanhu va xona. Kutani Muxe a a lava leswaku Vaisrayele-kulobye va va ni ripfumelo ro tano. Ha hlaya: “Muxe a byela vanhu a ku: ‘Mi nga chavi. Yimani mi tiya mi vona ku ponisa ka Yehovha, loku a nga ta mi endlela kona namuntlha.’” (Eksoda 14:13) Xana Muxe u va pfunile Vaisrayele leswaku va va ni ripfumelo leri tiyeke? Hakunene u va pfunile, hikuva Bibele yi vula leswi malunghana ni Vaisrayele hinkwavo ku nga ri Muxe ntsena, yi ri: “Hi ripfumelo va pele Lwandle ro Tshwuka kukota etikweni leri omeke.” (Vaheveru 11:29) Ripfumelo ra Muxe a ri vuyerisanga yena ntsena kambe hinkwavo lava voneke vutlhari byo va ni ripfumelo eka Yehovha.

I YINI LESWI HI SWI DYONDZAKA?

Hi nga tekelela Muxe kutani hi endla swiboho leswi kombisaka leswaku hi tshemba leswi Xikwembu xi hi tshembiseke swona. Hi xikombiso, Xikwembu xi tshembisa ku khathalela swilaveko swa hina swa nyama loko hi rhangisa vugandzeri bya xona evuton’wini bya hina. (Matewu 6:33) I ntiyiso leswaku swi nga tika ku va hi nga rhangisi swilo leswi vonakaka evuton’wini, hikuva vanhu vo tala va swi rhangisa. Kambe hi nga tiyiseka leswaku loko hi endla hinkwaswo leswi hi nga swi kotaka leswaku hi olovisa vutomi bya hina kutani hi nga pfumeleli nchumu xi hi kavanyeta entirhweni wa Yehovha, U ta hi nyika hinkwaswo leswi hi swi lavaka. U hi tiyisekisa a ku: “Ndzi nga ka ndzi nga ku tshiki naswona ndzi nga ka ndzi nga ku fularheli.”—Vaheveru 13:5.

Nakambe hi tikarhatela ku pfuna van’wana leswaku va va ni ripfumelo leri tiyeke. Hi xikombiso, vatswari lava tlhariheke va xiya lunghelo lerikulu leri va nga na rona ro pfuna vana va vona leswaku va va ni ripfumelo eka Xikwembu. Vatswari va fanele va dyondzisa vana va vona ku sukela loko va ha ri vatsongo leswaku ku ni Xikwembu lexi hi dyondzisaka leswi nga swinene ni leswi nga riki swinene. Ku engetela kwalaho, vatswari va fanele va tlhela va tiyiseka leswaku vana va vona va twisisa ni ku tshemba leswaku ku landzela milawu ya xona i ndlela leyinene yo hanya ha yona. (Esaya 48:17, 18) Vatswari va nyika vana va vona nyiko ya risima loko va va pfuna leswaku va va ni ripfumelo ra leswaku Xikwembu “xi kona ni leswaku hi xona muhakeri wa lava va xi lavaka hi mbilu hinkwayo.”—Vaheveru 11:6.