Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA FEBRUARY 2013

Muxe—Wanuna Wa Ku Titsongahata

Muxe—Wanuna Wa Ku Titsongahata

I YINI KU TITSONGAHATA?

Ku titsongahata swi vula ku va munhu a nga tikukumuxi kumbe a nga ri na manyunyu. Munhu loyi a titsongahataka a nga tekeli van’wana ehansi. Munhu un’wana ni un’wana loyi a nga hetisekangiki loyi a titsongahataka u xiya ku tsana kakwe.

XANA MUXE U KU KOMBISE NJHANI KU TITSONGAHATA?

Muxe a nga sungulanga ku tikukumuxa loko a nyikiwa vulawuri. Hakanyingi loko munhu a nyikiwa vulawuri, u hatla a tikombisa loko a ri munhu wo titsongahata kumbe wa ku tikukumuxa. Robert G. Ingersoll mutsari wa lembe-xidzana ra vu-19 u swi veka hi ndlela leyi: “Vanhu vo tala va nga tiyisela maxangu. Kambe ndlela leyinene leyi munhu a kombisaka ha yona leswaku wa titsongahata i ndlela leyi a tirhisaka vulawuri byakwe ha yona.” Hi ndlela yoleyo, Muxe u veke xikombiso lexinene xa ku titsongahata. Njhani?

Muxe u nyikiwe vulawuri lebyikulu hikuva Yehovha u n’wi rhume leswaku a rhangela tiko ra Israyele. Kambe vulawuri byebyo a byi n’wi endlanga leswaku a tikukumuxa. Hi xikombiso, xiya ndlela leyinene leyi a xi hlamuleke ha yona xivutiso xo tika malunghana ni timfanelo ta ndzhaka. (Tinhlayo 27:1-11) Lexi a ku ri xiboho xo tika hikuva a xi nga ta tirha eka vavasati volavo ntsena kambe ni le ka switukulwana swa nkarhi lowu taka.

Xana Muxe a a ta angula njhani? Xana a a ta tibyela leswaku tanihi murhangeri wa Israyele a a xi tiva xiboho lexi a a fanele a xi endla? Xana a a ta titshega hi vuswikoti byakwe, hi malembe lawa a ma heteke a ri murhangeri kumbe hileswi a ri tiva kahle langutelo ra Yehovha?

Kumbexana munhu wa ku tikukumuxa a a ta va a endle tano. Kambe Muxe a nga endlanga tano. Rungula ra Bibele ri hi byela leswi: ‘Muxe u vike mhaka emahlweni ka Yehovha.’ (Tinhlayo 27:5) Anakanya hi mhaka leyi! Hambiloko Muxe a hete malembe ya kwalomu ka 40 a ri karhi a rhangela tiko ra Israyele, Muxe u titshege hi Yehovha ku nga ri yena n’wini. Hi swi vona kahle leswaku Muxe a a titsongahata swinene.

Muxe a nga kalanga a anakanya leswaku hi yena ntsena loyi faneleke a va ni vulawuri. U ve ni ntsako loko Yehovha a pfumelela Vaisrayele van’wana leswaku va va vaprofeta. (Tinhlayo 11:24-29) Loko mukon’wana wakwe a ringanyeta leswaku a hlawula vavanuna lava a va ta n’wi pfuna ku endla ntirho, Muxe u tirhise xiringanyeto xexo hi ku titsongahata. (Eksoda 18:13-24) Loko a ri ekusuhi ni ku fa, hambileswi a ha tiyile emirini, Muxe u kombele Yehovha leswaku a tota mutlhandlami wakwe. Loko Yehovha a hlawule Yoxuwa, Muxe u n’wi seketele hi mbilu hinkwayo, a khutaza vanhu leswaku va landzela nkongomiso wa Yoxuwa loko a va rhangela ku ya eTikweni leri Tshembisiweke. (Tinhlayo 27:15-18; Deteronoma 31:3-6; 34:7) Entiyisweni, Muxe a a swi teka ku ri lunghelo ku rhangela Vaisrayele evugandzerini. Kambe a a nga rhangisi vulawuri byakwe eka swilaveko swa van’wana.

I YINI LESWI HI SWI DYONDZAKA?

A hi swi lavi ku va lava tikukumuxaka hileswi hi nyikiweke vulawuri kumbe hileswi hi nga ni vuswikoti. Tsundzuka: Leswaku hi endla ntirho wa Yehovha hi ndlela leyinene, ku titsongahata ka hina i ka nkoka swinene ku tlula vuswikoti bya hina. (1 Samuwele 15:17) Loko hi titsongahata hakunene, hi ta tikarhatela ku tirhisa ndzayo ya vutlhari leyi nga eBibeleni, leyi nge: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini.”—Swivuriso 3:5, 6.

Nakambe xikombiso xa Muxe xi hi dyondzisa leswaku a hi fanelanga hi titshega ngopfu hi xikhundlha kumbe vulawuri bya hina.

Xana ha vuyeriwa hi ku tekelela xikombiso xa Muxe xa ku titsongahata? Handle ko kanakana ha vuyeriwa! Loko hi hlakulela ku titsongahata ka xiviri, hi ta endla leswaku vanhu lava hi tshamaka na vona va nga tikeriwi hi vutomi, leswi nga ta endla leswaku va hi amukela. Xa nkoka swinene, hi amukeleka eka Yehovha Xikwembu, loyi hi byakwe a kombiseke mfanelo leyi yo saseka. (Pisalema 18:35) “Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki.” (1 Petro 5:5) Wa nga vona xivangelo lexi twalaka xo tekelela ku titsongahata ka Muxe!