Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  January 2013

Eka Vahlayi Va Hina

Eka Vahlayi Va Hina

Magazini lowu u wu hlayaka sweswi wu sungule ku kandziyisiwa hi July 1879. Minkarhi yi cincile ku sukela hi nkarhi wolowo—ku fana ni magazini lowu. (Vona swifaniso leswi nga laha henhla.) Ku sukela eka nkandziyiso lowu, u ta swi xiya leswaku ku ni ku cinca kun’wana eka ndlela leyi Xihondzo xo Rindza a xi ri ha yona. I yini leswi nga ta va swi cincile?

Ematikweni yo tala, vanhu vo tala va rhandza ku lavisisa rungula eka Internet. A swi kali swi teka nkarhi ku va va kuma rungula ro tala leri kumekaka eka Internet ntsena. Tibuku to tala, timagazini ni maphepha-hungu ma nga hlayiwa eka Internet.

Leswi vanhu vo tala va tsakelaka ku hlaya eka Internet, ha ha ku cinca ndlela leyi Web site ya hina ya www. jw.org, yi langutekaka ha yona leswaku hi yi endla yi koka rinoko naswona yi olova ku yi tirhisa. Vanhu lava nghenaka eka Web site yoleyo va nga hlaya minkandziyiso leyi kumekaka hi tindzimi to tlula 430. Hambiswiritano, ku sukela eka n’hweti leyi, lava nghenaka eka Web site ya hina va ta kota ku hlaya ni swihloko swin’wana leswi a swi humesiwa eka timagazini ta hina kambe swi nga ta sungula ku huma eka Web site ntsena. *

Leswi swihloko leswi engetelekeke swi nga ta kandziyisiwa ntsena eka Internet, nkandziyiso wa vanhu hinkwavo wa Xihondzo xo Rindza wu ta hungutiwa wu suka eka matluka ya 32 wu ya eka 16. Ana se Xihondzo xo Rindza xi kandziyisiwa hi tindzimi ta 204. Leswi se magazini lowu wu komisiweke, swi nga ha koteka ku wu hundzuluxela hi tindzimi leti engetelekeke.

Hi ni ntshembo wa leswaku ku cinca loku ku ta endla leswaku hi kota ku fikelela vanhu lava engetelekeke hi rungula ra Bibele leri ponisaka vutomi. Hi tiyimisele ku tirhisa timagazini ni Internet leswaku hi hambeta hi nyikela rungula ro tala leri kokaka rinoko leri nga ta pfuna vanhu lava xiximaka Bibele leswaku va tiva leswi Bibele yi swi dyondzisaka hakunene.

Vakandziyisi

^ ndzim. 5 Exikarhi ka swihloko leswi nga ta humelela ntsena eka Internet ku ni swihloko leswi landzelaka: Xihloko lexi nge “Ta Vantshwa Va Hina,” lexi nga ta pfuna vantshwa va tsakela ku hlaya Bibele ni lexi nge “Tidyondzo Ta Mina Ta Bibele,” lexi endleriweke vatswari leswaku va xi hlaya ni vana lava nga ni malembe manharhu ni lama nga ehansi ka wona.