Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA DECEMBER 2012

 Dyondzisa Vana Va Wena

Yohatama U Hambete A Tshembekile Ku Nga Khathariseki Maxangu Lawa A Hlangavetaneke Na Wona Ekaya

Yohatama U Hambete A Tshembekile Ku Nga Khathariseki Maxangu Lawa A Hlangavetaneke Na Wona Ekaya

LOKO mutswari a hlawula ku tshika ku tirhela Xikwembu xa ntiyiso ku nga Yehovha, swi nga endla leswaku vutomi bya n’wana byi tika. A hi buleni hi Yohatama. Hi ta dyondza hi maxangu lawa a hlangavetaneke na wona endyangwini wa ka vona loko a ri karhi a kula.

Uzhiya, tata wa Yohatama, a a ri hosi ya le Yuda. A a ri wanuna wa matimba ku tlula hinkwavo etikweni. Uzhiya a a ri hosi leyinene ku ringana malembe yo tala Yohatama a nga si velekiwa. Kambe endzhakunyana, loko Yohatama a a ha ri ntsongo, Uzhiya u tikukumuxile kutani a tlula Nawu wa Xikwembu. Kutani Xikwembu xi n’wi be hi nhlokonho, ku nga vuvabyi lebyi vavaka. Xana wa swi tiva leswaku Yohatama u endle yini loko a swi vonisa sweswo? *

Yohatama u ye emahlweni a tirhela Yehovha. Swi nga ha endleka leswaku mana wakwe Yeruxa u n’wi pfunile. Nilokoswiritano, swi nga ha va swi n’wi tikerile ku ya emahlweni a tshembeka eka Yehovha endzhaku ka loko tata wakwe, Uzhiya, a hlongoriwe endlwini ya Yehovha.

Xana u nga titwa njhani loko tata wa wena kumbe mana wa wena vo tshika ku tirhela Yehovha? Swi ta ku tikela, a hi swona ke?— Kambe a swi hoxanga ku ehleketa hileswi u nga swi endlaka loko tata wa wena kumbe mana wa wena vo tshika ku tirhela Yehovha. Leswi Davhida a swi tsaleke eBibeleni swi kombisa mhaka leyi.

Tata wa Davhida, ku nga Yese, a ri wanuna lonene. U tirhele Yehovha naswona ha swi tiva leswaku Davhida a a n’wi rhandza tata wakwe. Kambe Davhida u kote ku rhandza Yehovha ku tlula ndlela  leyi a rhandza Yese ha yona. A hi voneni leswaku hi yi tiva njhani mhaka leyi.

Pfula Bibele ya wena eka Pisalema 27:10. Davhida u tsale a ku: “Loko tatana na manana vo ndzi tshika, Yehovha u ta ndzi teka.” Anakanya hi mhaka leyi: Leswi Bibele yi swi vulaka hileswaku loko tata wa Davhida, ku nga Yese kumbe mana wakwe vo tshika ku gandzela Yehovha, Davhida a ta ya emahlweni a N’wi gandzela.

Ku vuriwa yini hi wena? Xana u ta ya emahlweni u tirhela Yehovha hambiloko tata wa wena kumbe mana wa wena va nga ha n’wi tirheli?— Lexi i xivutiso xa kahle xo tivutisa xona. Xivangelo xa kona xi fambisana ni xileriso xa nkoka lexi nga eBibeleni. Xi ri: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.”

Xileriso lexi xi vula ku tshembeka eka Yehovha hambiloko swi tika ku endla tano. Xana u ehleketa leswaku i mani loyi a lavaka leswaku hi tshika ku tirhela Yehovha?— Nala wa Xikwembu ku nga Sathana hi yena a swi lavaka. Yesu u n’wi vitana “mufumi wa misava.” Bibele yi tlhela yi vula leswaku i “xikwembu xa mafambiselo lawa ya swilo.” Xana hi fanele hi chava Sathana?

A hi fanelanga hi n’wi chava. Ematshan’weni ya sweswo, hi fanele hi tsundzuka leswaku Yehovha u ni matimba ku tlula Sathana. Yehovha u ta hi sirhelela loko hi n’wi tshemba. Tihlayele eBibeleni ya wena hi ndlela leyi Yehovha a sirheleleke Davhida eka xihontlovila lexi chavisaka, Goliyadi. Na wena Yehovha a nga ku sirhelela loko u tshama u tshembekile eka yena.

^ ndzim. 4 Loko u hlayela n’wana, mfungho lowu wu endleriwe ku ku tsundzuxa leswaku u yima, kutani u rindzela leswaku a hlamula xivutiso xa kona.