Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  December 2012

Ntsako Lowu Tisiwaka Hi Ku Nyika

Ntsako Lowu Tisiwaka Hi Ku Nyika

“Ku nyika swi tisa ntsako lowukulu ku tlula ku amukela.”—MINTIRHO 20:35.

Lexi endlaka van’wana va tlangela Khisimusi.

Hilaha Yesu a vuleke hakona, ku nyika swi endla leswaku munhu loyi a nyikaka ni loyi a nyikiwaka va va ni ntsako. Leswaku va kuma ntsako lowu tisiwaka hi ku nyika van’wana, van’wana va teka ku nyika tinyiko tanihi timfanelo ta nkoka ta Khisimusi. Hi xikombiso, lembe leri nga hundza loko ikhonomi yi tsekatseka, vulavisisi lebyi endliweke le Ireland byi kume leswaku ndyangu wun’wana ni wun’wana a wu tiyimisele ku tirhisa mali yo tlula 500 wa ti-Euro (ku nga R5 500) leswaku wu xava tinyiko ta Khisimusi.

Ha yini ku ri xiphiqo?

Vanhu vo tala va ehleketa leswaku ku nyika tinyiko hi Khisimusi swi vanga ntshikilelo lowukulu, ku nga ri ntsako lowukulu. Njhani? Vanhu vo tala lava xavaka va twa va ri ehansi ka ntshikilelo wa ku xava tinyiko leti va nga taka va nga ti fikeleli. Ku tlula kwalaho, leswi vanhu hinkwavo va xavaka tinyiko hi nkarhi wun’we, mintshungu ni tilayini to leha eswitolo swi endla leswaku ku va mhaka leyi karharisaka eka vo tala.

Hi yihi milawu ya Bibele leyi nga pfunaka?

Yesu u te: “Hanyani hi ku nyika.” * (Luka 6:38) A nga vekanga siku ro karhi elembeni leri vanhu va faneleke va nyikana tinyiko ha rona. Yesu u khutaze valandzeri vakwe ku va lava nyikaka nkarhi wun’wana ni wun’wana.

“Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Buku yin’wana ya tinhlamuselo ta Bibele yi vula leswaku mongo wa marito ya Pawulo hi leswaku “munhu a nga fanelanga a nyika hi ku ‘sindzisiwa,’ kumbe hi ku titwa a boheka ku nyika.” Ku va “munyiki la tsakeke” swi endla leswaku munhu a nga titwi a boheka ku nyika munhu un’wana nchumu wo karhi hi nkarhi wo karhi—hilaha ku nyikana tinyiko hi Khisimusi swi nga hakona.

“Loko ku lungheka ku ri kona ku sungula, swi amukeleka hi ku hlawuleka hi ku ya hi leswi munhu a nga na swona, ku nga ri hi leswi a nga riki na swona.” (2 Vakorinto 8:12) Xikwembu a xi swi lavi leswaku Vakreste va tihoxa eswikweletini leswaku va kota ku hakela tinyiko leti durhaka. Ematshan’weni ya sweswo, loko munhu a nyika hi ku ya ‘hileswi a nga na swona,’ tinyiko takwe a to amukeleka ntsena kambe ti “amukeleka hi ku hlawuleka.” Vona ndlela leyi swi hambaneke ha yona ni marito ya vaxavisi hi nkarhi wa tiholideyi lama nge: “Xava sweswi u hakela hi ku famba ka nkarhi!”

^ ndzim. 8 Vuhundzuluxeri byin’wana bya Bibele byi ri: “Nyika.” Hambiswiritano, eka Xigriki xo sungula, riendli leri ri vula xiendlo lexi yaka emahlweni. Loko byi ri hlamusela hi vuenti rito leri Yesu a ri tirhiseke, Vuhundzuluxeri Bya Misava Leyintshwa byi ri, “hanyani hi ku nyika.”